Miyonə Şərğ dəvardə haftədə
Miyonə Şərğ dəvardə haftədə
Dəvardə Miladi 2018-ə sori oxonə haftədə həm Livan ijən bə Devləti Kabineti təşkil kardey bə oxo rəsey şoyd nıbe.Livani parlamenti vıjnemon 5 sor təxiri bəpeştə nəhoyətən 2018-ə sori mayə manqədə bərpo be və Sə`d Həriri vəzifəş ım be ki,həm çə həmonə manqiku bo kabineti təşkil kardeyro cəhdko.əmmo,de 2018-ə sori bə oxo rəsey və nuyə milodi sori bino bıey bə ico,ijən bo Kabineti təşkli doeyro mıəyyənə perspektivon bə çəş çiyedəni.həmonə şərayit bə Livani milli əmniyyəti ələyh mənfi hodisəon bə əməl ome boyis be.
Həminə cəhətədə Livanıjə fəhlə və koəvonon dəvardə əynə ruji de koəkə və koəvonon cəmyəti iyən çandə qılə partiyəku dəvətışon kardə ta kişvəri qırd vıronədə etırozinə mitinqon dəvordınon və livani məmləkəti tojə devləti kabineti təşkil doeyışon tələb kardə.etırozəkəyon de “pokə daston devləti təşkil” şuari bın kişvərədə siyosi keşməkeşon bə kəno noey iyən tojə devləti təşkil doeyışon tələb kardə.
Bəşarə Ələsmər Livani umum koəvonon cəmyəti rəyis dəvardə bın etırozinə aksiyonədə çı devləti kabineti təşkil nıbeyışon tənğıd kardə və votəşe:”8 manqi bəpeştə bo devləti kabineti təşkil doeyro siyosi ğudrəton ocizəti Livanədə ixtisodi iyən sosyal vəzyətış vey yavə kardəşe.
Bın holədə seonist rejim həm Livani devləti kabineti təşkil nıbey sayədə,çın kişvəri coğrafi sərhəddiku dəvardedə və mıxtəlifə formədə min cumlə bə Suriyə ələyh casusəti,həmlə iyən təhdidi koon kardedə. israyli hərbi kontinqenton dəvardə haftədə bə Livani məxsusə reqinoal ovon daxil bıə və çın kişvəri ovi marzonku dəvardə.israyli rejim bə Suriyə həmlə kardero həm çı Livani marzonku dəvardedə və hətto Livani həvo marzonədə bıə ğeyri-hərbi təyyorəon əmniyyəti həm de təhlukə dim bədimış kardə.
In ğeyri-ğanuni hərəkəton boyis bıə Livan dəvardə haftə çı israyliku bə İMT əmniyyət şurə şikoyətko və ın rejimış de 1701 ğətnomə mıttəhəmışon kardə.Əmniyyət Şurə 1701-ə ğətnomə 2006-ə sori çı sionist rejimi de Livani 33 rujnə canqi bəpeştə bekardey be.ın ğətnomə seonist rejimi bə livani zidd deşmınə hərəkətonku ğədəğən kardedə və oqəteydə.əmmo ın rejim hejo bə ğətnomə be etino bıə və çı Livani marzonku ısət çı həvo bıbu ya dıyo,ğeyri-ğanuni surətədə dəvardə.
Livani xarici koon vəzir Cəbran Basiil 2018-ə sori oktyabrə manqədə Beyrutədə qıləy xəbə konfransədə voteşe:caris sori sıftəku 1417 kərə seonist rejim çı zəmin iyən həvoku Livani marzonku ğeyri-ğanuni dəvardə.ım yəni har manqədə 150 kərə.israyli bə ın mevzu vərdışış kardə.
