İmom Huseyn(ə),əxloğ iyən insoniyyəti rəhbər

İmom Huseyn(ə),əxloğ iyən insoniyyəti rəhbər

Hicri-Ğəməri çominə sori Şəbanə manqi seminə ruji zəmini dimisə həmməysə çokə kədə islomi peyğombəri(s) dıli əzizə hırdəni bə dınyo omey xəbə pevolo be.ın tojə bə dınyo çəş oj kardə hırdən,çı Əli(ə) iyən Fatimə(s) əğıl Huseyn(ə) be.əv bə dınyo çəşış oj karde ta çı peyğombəri(s) bino kardə roy dəvom bıdo.bın mıborəkə rujədə.

İmom Sadığ(ə)-iku rəvoyət bıə ki,İmom Huseyn(ə) bə dınyo çəş kardeyədə,Cəbrəyil-Əmin(ə) Xıdovənde-Mutəali tərəfiku məmur be ta de həzo qılə mələki bə həzrəte Fatimə(s) tojə bə dınyo vardə hırdəni çəş-ruşni doeyro zəminisə nozil bıbon.İmom Huseyn(ə)-I şərifə nom Tovratədə de “Şubr” ya ”Şubeyr” və İncilədə de “Tab” ya Təyyib”  nomi zikr bıə.çə həzrəti kunyə həm” Əba-Əbdullah” və “Seyyidi şəbabi əhli-cənnə” (vəhışti cıvonon əğə) kunyənonin.

İmom Huseyn(ə)-I şəxsiyyəti qıləy məxsusə imtiyozış heste.əv çı peyğombər(s)-I nəsliku be və şəş sor çə həzrəti mığəddəsə zoti kənoyədə jimonış karde və fovğəladə formadə çə həzrəti pokəti təsiri jiyədə be. bə ə həzrəti mənsub bıə qıləy zoyorətədə omə:”ha çımı sərvər ha!-Əba-əbdullah-şoydəti doydəm ki,tı barzə sulbon iyən pokə rəhimədə bıə nuriş(ıştı pıon nəsl ali və ıştı inəon pok bıə) ki,cohiliyyət deştə mırdoləti bətı roş pəydu kardəni”.

İmom Huseyn(ə)-I jimoni vey ğəşənq və barzə nuktəonku qıləyni,Peyğombər(s)-I bə ə həzrti iyən bəçəy yolə bo Həsən(ə)-I bıə mislış nıbə eşğ və dığğət be.İslomi Əzizə Rəsul(s)  deştə əshobon dastə bə mehmoni şeyədə,roysə İmom Huseyn(ə)-ış vinde ki,kuçədə hənək kardedəbe.Peyğombər(s) bənav şe ta əy bıqəto və İmom Huseyn(ə) həm bə hırdəon xass formadə binoş karde bo vite.həzrəte peyğombər(s) bəçəy fərol kardə har səmt de sırə formə şedəbe ta əy bıqəto.peşo peyğombər(s) deştə iqlə dasti çəy iqlə lınqiku və de coqlə dasti çəy gərdəniku qəteşe və binoş karde mıborəkə dimi pusə karde.peşo ə həzrəti hamyeşe:”Huseyn çımıku və mı çı Huseynikum.Xıdo həm bıpyo Huseyni piyəkəsi”.

İmom Huseyn(ə)-I bə dınyo omə iyən perəsə muhit,çı İmom Əli(ə) iyən həzrəte Fatimə(s) dığğəti mərkəzədə be.İmom Huseyn(ə) bın muhitədə çə buzurquvaron vucudədə təcəlli pəydu kardə de ədolət, fəzilət iyən de əxloği usuli həmməysə barzə cohəri rabitədə be.əv ıştə yolə tərbiyə doəkəson məntığiku sərəse ki,aliyə hədəfon nıbə holədə jimon de maqi bərobəre və ehanə həx de jimoni bə ico nıbu,həyot və jimon beməno bəbe.de qıləy co təbiri İmom Huseyn(ə) hejo ıştə hırdənətiku ilahi bə cuş omə feyzi mənbəon kəno jimoni səhih iyən insoniyə jimonış dərk karde.ə həzrət veyə vıronədə  bə peyğombər(s)-I vəhy nozil beyədə,bə Xıdo-Rəsul(s)-I çehrə nəzə kardeydəbe və çə həmonə pok iyən nuroni insoni vavriski doə çehrə həmməysə çokə sərmoyə boştə cəm kardedəbe və anədə boştə fəzilətonış bə dast varde ki,çı həmməkəson palu,hətto ıştə deşmınon tonoku həm qıləy yolə şəxsiyyətış pəydu karde.

İmom Huseyn(ə)-I sima delnışin iyən cəzbəkə be və çə həzrəti bəloğətinə kəlom,Əli(ə)-I xotırə dılonədə bəyji kardedəbe.əv ıştə cıvonətiyədə de şucoət iyən diroyəti ,islomi mıdofiyə iyən rəhbərəti kardey,ıştə jimoni muhimmə usulonku hisob kardedəbe.İmom Huseyn(ə)-I nəzəku elmi təhsil,çı kəmol iyən təali mığəddimə və vəsəy.ə həzrət ıştən çı elm iyən maarifi dıyobe və qır elmonku xəbədo  be.İmom Huseyn(ə) hamyedə:”Əmə əkəsonimon ki,Ğıroni elm və bəvədə bıə çiyon bəyon,çəmə paluye və çəmə palu bıə çiyon çı hiç Xıdo ofəyə məxloği tonoku ni.zira,əmə çı Xıdo sırron məhrəmimon”.

İmom Huseyn(ə)-I vucudədə bıə elm iyən irfon,çə həzrəti rufış lətif iyən xatırcəmış kardəbe.çə həzrəti ğəlb bo zəyif iyən məhrumon xoto jeydəbe və de Xıdovəndi razo-niyoz iyən bəy ibodət kardeyədə,çəy irfoni zumzuməon de mərıfət iyən eşği pur bıə qıləy dınyo bə nımoyiş noydəbe.

Peyğombər(s)-I rehlətiku fəğət penco sor dəvardə nıbe ki,botıl de həxı libosi cilvəş pəydu karde.idastə dınyotələbə insonon ki, həxiku bə diyəro bin.çəvon dılon de kin-kudurəti pur be və əvon de dini təhrif kardey iyən milləti təhğır kardey koy məşğul bin.İmom Huseyn(ə) zıneydəbe ki,ehanə çəy vaxtədə qıləy ko bə vırə nırosno,botıl tiki həm vey pevolo bəbe və həmməkəs bəştə nəfsi ləzzəti tori ebəqıne. ə həzrət çın koyku aqah be ki,ehanə həx kənoyədə bımando,həxı hədəfon hiçvaxti məğlub nibəbe,bəlkəm həmişə bəyji bəmande və torıxədə hejo dəbəvəşe.İmom Huseyn(ə)-I ğıyom çı Kərimə-Ğıroni barizə nımunəonku be ki,hamyedə:”bə dıqlə dastədə ki,deiyande(canqi meydonədə)dimbədim omin,boşmə nışonə(və ibrət) heste.iqlə qrup Xıdo royədə canq kardedəbin və coqləyni kofirə dastə bin…..(Ali-İmrani mıborəkə surə 13-ə ayəku i hissə.).de qıləy co iborəti İmom Huseyn(ə) iyən yəzid de iyande dimbədim omə çı həx iyən botıli cərəyon və dastə sivmol və təzahur bin.