Osmoniyə surəon-231

Osmoniyə surəon-231

 Çəvon miyono qıləy muminə şəxs ki,əvoni çı pəxıləti iyən hərisətiku nəhy kardedəbe,bəvon voteşe:”aya bəşmə nıvotıme çıro Xıdo təsbihi votedəniyon?”.əvon bəştə ğəflət,xudxahəti iyən qıno etırof kardeşone və voteşone:”çəmə pərvərdıqor (harcurnə zılmiku) mınəzzəhe (poke). beşək,əmə zolım bıəmon”.əmə həm bəştə və həmən bə cokəson sıtəm kardemone.çən.peşo bə iyande dim qəteşone və binoşon karde iyənde mızəmmət karde.hakəs əsliyə qıno bə iyande qıy şododəbe və bəy de şiddəti sə-sıxan kardedəbe.boği soybon çoko ki,ıştə bədbəxtəti nığlılətiku aqag bin,de fəryodi vanqışon je:”vay bıbu bəmə ki,əmə tuğyongər bimon”.

Kərimə-Ğıroni metod ıme ki,çı çok iyən bevəcə insonon tərcumeyi-holi iyande mığobilədə ğərol doydən ta de iyande mığoyiəsədə vey çok zıney bıbu.ayəon dəvomədə həm çı pərhizkoron mıkofot iyən kofiron cəzoku sıxan votedə və çı mışrikon nokoməti iyən xəsorəti coqlə tablo çəvon mığobilədə bə nımoyiş noydə.

Ğələmi mıborəkə surə 43-44-ə ayəonədə hamyedə:”(bə yod dənənən)qıləy ruj ki,(dəhşəti şiddətiku) po(lınqi) şıvək uryon bəbe və həmmə bə səjdə iyən bə pərvərdıqori mığobilədə xuzu dəvət bəbeyn,əmmo mucrimon(qınokoron) səjdə ğudrətışon ni. Im qıləy holədəy ki,çəvon çəşon (dast xəcoləti)saru eqıniyə iyən zıllət və xarəti çəvon qırd vucudış dəqətə.”mucrim iyən qınokorə fərdon məhkəmədə məhkum beyədə,adətən ıştə sə saru doydən və çəvon vucud de zılləto-xarəti pur bedə.İlahi məhkəmə məhkumon həm əkəsonin ki,dınyoədə hiçvaxti ıştə həyğiyə mədubi mığobilədə təzim və səjdəşon kardəni.əvon ıştə yoləşəxəti iyən inodkorəti tələb kardə rufışon deştə bə ğıyoməti səhnəşon vardə və de ın holi çokonə əvon çı səjdə kardey ğudrətışon heste?.                                                                                                                                                                                                                                   

Ğələmi mıborəkə surə oxonə ayəon bə mışrikon həsrət və nokom mandey ko işorə kardedə və ijən mışrikon çı peyğombər(s)-i cındoəti barədə bıə sıxənon nəğl kardedə və çı Kərimə-Ğıron iyən peyğombər(s)-i həxəti təsığ kardedə və oxonə ayədə təkid kardedə:” ın ilahi kitob bo aləmi əhli ğərəz pand iyən nəsyəti  və oğoəti co çi ni”.

Hağğə mıborəkə surə çı Kərimə-Ğıroni şesto-nəvminə mıborəkə surəy,Məkkədə nozil bıə və 52 qılə ayəku iborəte. Kulliyə formaədə çın surə mətləbon çımiku iborəte: ğıyoməti ruj və çəy bə əməl omey kali əlomət və nışonəon,navkonə,məxsusən Ad və Səmud ğovmi,həmçinin firon iyən Lut(ə)-i ğovmi kofiron tale və sərnıvışt,imon vardə kəson tale və ağıbət,həxı təkzibəkəyon telə sərquzəşt və çı Kərimə-Ğıroni əzəmət  iyən peyğombər(s)-i məğami barədə bıə bəhson.....

“həmonə həxə(ğıyoməti)ruj.çiçe həmonə həxə ruj?və tı çı zınedəş həmonə hətmiyə vağiyə çiçe?(1-3-ə ayəon).

Kərimə-Ğıron çı dınyo oxoyədə vağe bıə hodisəon i baxşi bə təsvir kəşedə.hədəf ıme ki,inson dığğətin bıbu və çın dınyo umi oxoyədə ğıyomət bərpo bəbe ki,qıləy barz və əbədiyə aləme. beşək,ğıyoməti bərpo bıey bənav,mıxtəlifə muhimmə hodisəon bə əməl bome.ısətnə dınyo bəyənde bəqıniye və çın vironə və xərob bıə dınyo sape.qıləy co nuyə dınyo bərpo bəbe.bın zəmon insonon bə axırəti aləmi daxil və varid bəbeyn.

Çın surə ayəon  umumən bo de ğıyoməti ruji təkzib kardə iyən bə Xıdovəndi vığandə rəsulon nıpemandə fəzo iyən sfera mıborizə bardero nozil bıə və çəvon bə ğıyoməti ruji bovə nıkardey bəçəvon ıştən xəsorət iyən suğuti boyis bıey hisob kardedə. təğribən,umum mıfəssır iyən təfsirəvonon çın surə əvvələdə omə “hağğə” kəlmə,bə ğıyoməti ruji təfsirışon kardə.