Osmoniyə surəon-236

Osmoniyə surəon-236

Məarici mıborəkə surə 3-4-ə ayəonədə bə ğıyoməti ruji ayid bıə vəğayə və hodisəon işorə kardedə və hamyedə:”qıləy ruj ki,osmon bənə mısi sı kardey bəbe və bandon bənə paşmə (volo)bəbeyn”.

Osmon həmonə ruji bənə sı kardə bıə metali və filizi ov kardey bəbe və bandon vırto-volo iyən fəzoədə pevolo bəbeyn.jıqo bızın paşməy ki,vo və kulok əy bardə jıqo-jəqo.çın vironəti bədiqə, qıləy nuyə dınyo bə əməl bome və insonon qıləy nuyə jimon bino bəkardeyn.

Ayəon dəvomədə bəyon kardedə ki,axırəti dınyo bərpo bıə zəmonədə,bə hisob-kitobi rəsey proses jıqo saxt iyən şiddətin bəbe ki,hakəs ıştə nicot iyən perəxey fikədə bəbe.həmonə ruji hiç qıləy səmimi və nezə dust,bəştə dusti soyəx nibome və çəyku hiççi xəbə nibəstəne.jıqo ni ki, duston əyo iyande nızınon,bəlkəm əvoni bə iyənde nışon bədon,əmmo qınokor jıqo bəştə koon giriftore və fərdon vucud jıqo tarsi eqətəşe ki,hiçkəs çı co kəsi həxədə fik kardey zınedəni.

Həmonə dəhşətinə vəzyətədə  qınokorə fərd oruzu bəkarde ki,ey kaş bo çın ruji əzobiku ozod bıeyro,ıştə fərzəndon,həmçinin jimoni həmnro və bıvon fidyə və ğıboni doey zınəşbe.dınyoədə bəy pənoh doə ğovm-ğəbilə və zəmini dimisə bıə qırd milləti əvəz əkəy ta əv ıştə coni peroxney bızıno.əmmo,həmonə ruji boəy hiç qıləy nicot və perəxey ro nibəmande.

Məarici mıborəkə surə 19-ə şərifə ayədə bə insoni çand qılə xısusiyyəton işorə kardedə və hamyedə:”bə rosti ki,inson həris iyən kamhovsələ(kamtağət)ofəyə bıə.qıləy zəmon ki,bəy bevəci bırəso,tov vardedəni və qıləy zəmon ki,bəy çoki bırəso,bə cokəson pəxıləti kardedə”.

Kərimə-Ğıron bo insoni çı nevbənev bənə hərisəti iyən pəxıləti bıə əxloği noxəşətiyonku nicot pəydu kardey iyən perəxey xoto,nımoji nusxəş bəoy təcvizış kardə,nıvıştəşe.de  şifobaxşə dəmoni nomi,nımoj iyən Xıdo zikr kardey,insoni çı əxloği rəzilət və bevəcə sıfətonku bə diyəro kardedə. Məarici mıborəkə surə 22-23-ə şərifə ayəonədə jıqo hamyedə:”illa nımojəvoton,əkəson ki,dayimi(surətədə) nımoj votedən”.

Im çı qıləy ləyoğətinə insoni sıfətonkuye ki,hejo de ilahi mutəalə dərqo irtibat və rabitəş heste və ım rabitə de nımoji roy vositə təmin bedə.nımoj,insoni çı munkər,fəhşo iyən yavə çiyonku oqəteydə,bəçəy ruf və coni səfo baxşeydə və Xıdo yod və zikri həmişə çəy dıl və ğəlbədə bəyji oqəteydə.insoni dayimi formaədə bə aləmi pərvərdıqori kardə dığğət,bə ğəflət,məğrurəti,bə şəhvəti ğirdabi ğərğ bıey və xudpərəstəti mane bedə.

Çı çokə insoni coqləyni sıfətonku ıme ki,ıştə mol-əmvolədə bo sail iyən məhrumi məlumə həxı co kardedən.yəni əvon hejo çı ehtiyocinə şəxson fikədən və bəvon ıştə molonku infoğ və baxşeş kardedən.əvon de Xalığə  Xıdo rabitə basteysə əlovə,de xəlğe-Xoda yəni de Xıdo ofəyə məxloği həm ıştə rabitə bərpo kardedən və çəvon dastiku qəteydən.

Sail və peçın əkəse ki,ıştə hacəti votedə və çı cokəsonku komək tələb kardedə.əmmo,məhrum əkəse ki,ehtiyociş heste.əmmo çəy abru-həyo mane bedə ta əv ıştə məhrumiyyət və ehtiyocin bıey bıvoto və oşkoko...

Peşonə ayəon bə çok iyən ləyoğətinə insonon co xısləton işorə kardedə və hamyedə:”əkəson ki,bə cəzo ruji bovəşon heste və əkəson ki,ıştə pərvərdıqori əzobiku tarsedən.zira,pərvərdıqori əzobiku qıləy əmonə vırə ni.və əvon ki,ıştə dovnə(qınoku)oqəteydən illa bəştə jimoni həmro və kənizon ki(bın surətədə) mızəmmət bıənin nin”.

Zikr kardey lozıme ki,insoni cinsi ğərizə və tələb,çı insoni tuğyongərə tələbe ki,bəpe bəy de səhih iyən ğanuni roy vositə cəvob doey bıbu.çıro ki,ın ğərizə və tələb çı bəşəri camiyə veyə inhirof və ğeyri-normativon sərçeşməy.liza,əy kontrol və bəçəy hədd və marzon rioyət kardey,çı təğva və pərhizkorəti nışonəonku bə hisob omeydə. Bə həmonə dəlili xoto,Kərimə-Ğıronədə çı nımoj,bə ehtiyocinə fərdon komək kardey,bə ğıyoməti ruji imon vardey iyən ilahi əzobiku tarsey bədiqə,bə ın ğərizə və tələbi kontrol və nəzorət kardey işorə bıə.....