Osmoniyə surəon-239

Osmoniyə surəon-239

Nuhi mıborəkə surə 5-ə şərifə ayəku jəqoşə,çandə qılə ayədə bə həzrəte Nuh(ə)-i bə Xıdovəndi dərqo bıə şikoyəti işiorə kardedə:”Xıdolim ha! mı ıştə ğovmım bəşəv-bəruj(bəştı səmt) dəvət kardıme.əmmo,çımı dəvəti ğərəz çəvon viteysə co çi ziyodış nıkrde.əmmo,havaxti əvonım dəvət karde ta (imon biyən və) tı əvoni imtovonkoş,(əvon)ıştə anqıştəşon bəştə quş dəje və ıştə olətonışon bəştə sə kəşe(dəkırneşone) və (mıxolifətədə)isror kardeşone iyən de şiddəti təkəbbırəti kardeşone”.

Dığğət kardənine ki,dəvəton bə qıləy nev hozzıəti və fərdonədə əsıləti ehtiyociş heste ta bəvon təsir bıno.iyo təəccıb kardənin ni ki,hozzı nıbə dılonədə qıləy əks və mnfiyə təsir bıno.de qıləy co iborəti həxı deşmınon Xıdo ovliyaon dəvəti məsə zəmonədə,çəy mığobilədə mandedən və mığovimət nışon doydən.çəvon həmonə mığovimət və inodkorəti əvoni çı Xıdovəndiku bə diyəro kardedə və çəvon kufr və nifoği rəğ-rişəon tiki həm ğoym kardedə.

Nuh(ə)-i ğovm ıştə dasti anqıştəon bəştə quşi dılə dənoydəbin ta həxə sədo nıməson.əvon ıştə oləton bəştə sə kəşedəbin ta hiç qıləy sədo bəçəvon quşi nırəso.əvon de ın ko ğasbu həm dılışon hestebe

ıştə dimı bıpuşnon,dəqəton ta nıbobənıbo çəvon çəşon bə ilahi yolə pəyğombər bıə Nuh(ə)-i dimi nıdəqıno.

Bərosti,ım heyrətəngiz və təəccıbavəre ki,inson de həxı deşmınəti bə mərhələ və etapi bırəso ki, hətto bəştə icozə nıdo çəy barədə qıləy çi bıməso ya bıvindo.bə 7-ə ayə əsos,çəvon de həxı deşmınəti kardey illət və səbəb istikbar,yoləşəxəti iyən məğrurəti be.insoni məğrurəti və təkəbbır,əy bə həxı rəseyku oqəteydə.de ın holi Nuh(ə) ıştə tulani və dırozə umri zəmonədə ijən bəştə ilahi dəvəti dəvomış doe və hiçvaxti bın royədə sısti nıqəte və onıqıne...

Nuh(ə) bəştə pərvərdıqori dərqo bıə ıştə sıxanon dəvomədə ərzış karde:”Xıdolim ha! peşo əvonım oşko dəvətım karde.mı,umumi məclisonədə əvonım de barzə vanqi bə imoni roy səmt dəvətım karde.hətto,bımi həm ğane nıbim və oşko iyən niyon çı tohid iyən imoni həyğətım boəvon bəyonım karde.əmmo,çımı sıxanon bə həmonə inodkorə ğovmi hiç qıləy təsirış nınoe.

Ehanə inson botıli royədə jıqo hərəkətko və bənav bışo ki,fəsod çəy vucuədə rəğ-rişə icodko,ın holət bənə çəy dıminə zot və təbyəti bəbe.bın surətədə Xıdo ovliyaon dəvət və həxə sıxan bəçəy vucudi hiç qıləy təsirış nibəbe.çın surə ayəon çı Nuh(ə)-i Xıdo həxə royədə bıə əcib və bemislə hovsələ,səbr və istiğoməti bəyon kardedə.nəğlışon kardə ki,Nuh(ə)-i bın nəvsa penco sor dəvəti dırozi bəy fəğət çandə kamə nəfəri imonış varde.ə həzrət boştə yoləşəxə və inodkorə ğovmi hidoyəti xoto,bəvon mıjdəvoni doydəbe ki,ehanə əvon çı şırk iyən qınoku tobəkon,Xıdo həm ıştə lutf və rəhməti bəvon bəçəy dimi oj bəkarde və çəvon qınonku dəbəvarde.....

Nuhi mıborəkə surə 10-12-ə ayəon Nuh(ə)-i sıxanon jıqo nəğl kardedə:”bəvon voteme:ıştə pərvərıdqoriku məğfırət tələbkənən ki,Əv,vey əbaxşe ta boşımə osmoniku dumo yənde və de bərəkəti  voş bıvğando və bəşmə de mol iyən fərzəndon koməkko və boşımə boğ iyən ruon cariko”.

Nuh(ə) ıştə sıxanon dəvomədə hestemoni aləmədə bıə ilahi əzəməti bəyon kardedə və təəccıb kardedə ki,çıro inson de qırd ım oşkoə nışonəon mışohidə kardey və vindey,ijən inodkorəti və həxı inkor kardedə.joqo ki.hamyedə:”bəşmə çiç bıə ki,Xıdo əzəmətiku tarsedəniyon?qıləy holədə ki,şımə mıxtəlifə mərhləonədə ofəyə bıon(ta nutfəku bə komilə inson mərhələ rəsəyon). aya vindedəniyon Xıdovəndi çokonə haft qılə osmonış yənde sape ofəyəşe və çəvon miyono ovşımış nur iyən həşiş nuraniyə çoş ğərol doə?və Xıdovənd şımənış bənə beməyon zəminiku perosneşe,peşo şıməni bə həmonə zəmini obəqordıne və ijən sənibəton şıməni çəyu xaric bəkarde və Xıdovənd zəminış boşmə hevujə xolçəş ğərol doə ta çəy hevujə caddə və roonədə hərəkətkon”.(13-20).