Osmoniyə surəon-243

Osmoniyə surəon-243

“Cinn”-i mıborəkə surə 25-27-ə ayəonədə bə ın həyğəton işorə kardedə ki,Xıdovənde-Xalığ ğeybiku xəbədo və əy zıneydə.Kərimə-Ğıron bə yod dənoydə ki,ğıyoməti ruj bome bərəse və həmonə ruji kofiron iyən mucrimon bəştə kardə yavə əməlon xoto,ıştə cəzoon bəvindeyn və bəy bərəseyn.çın sıvoli cəvobədə ki,ın ilahi vədə keynə bome bərəse,Kərimə-Ğıron jıqo hamyedə: ”vuji:mı zınedənim bəşmə vədə doə bıə çi neze ya çımı pərvərdıqor qıləy(dırozə)zəmon boəy ğərol bədoe?.əv,ğeybi zıneydə  və hiçkəsi bəştə ğeybi oşko kardedəni illah çəy vıjniyə rəsulon”.

Imi həm zikr kardey lozıme ki,elmi-ğeybi həxədə dıqlə dastə ayə mevcude:sıftə ə ayəon ki,elmi-ğeybi fəğət bə Xıdo məxsus zıneydən və ğərəz əv cokəson əy zıney ko nəfy və inkor kardedən. bə ın ayəon əsos elmı-ğeyb fəğət bə pokə zoti soyb bıə Xıdo məxsuse və əv piyəşe ki,ğeybi məsələon ıştə bandəonku məxfi oqəto ta çəvon imtovoni mevzu komil bıbu.

Dıminə dastə ayəon de ruşin və oşkoə formə nışon doydə ki,ilahi ovliyaon icmolən ğeybiku xəbədo və aqah bıən və Xıdovənde-Aləm ıştə elmı-ğeybi i ğısmətış ıştə vıjniyə rəsul və peyğombəron ixtiyorədə ğərolış doə.umumən,osmoniyə vəhy ki,bə peyğombəron nozil bedə, inev ğeybe ki,çəvon ixtiyorədə ğərol doey bıə.çımisə əlovə,ziyodə rəvoyəton nışon doydə ki, peyğombəron iyən məsumə imomon icmolən elmı-ğeybiku aqah bıən və qahi vaxti həm çəyku xəbəşon doə.məsələn,islomi-peyğombər(s) Mutə canqi,Cəfər ibn Əbi-Tolıb(ə) və çandə co komandanon şəhodəti həxədə hejo çı canqi bino bıə zəmonədə bə Mədinə mısılmınon xəbəş doə.həlbəttə,bənə jıqo xəbəon islomi-peyğombər(s)-iku vey varid bıə.

Muzzəmmili mıborəkə surə Məkkədə,peyğombər(s)-i  bə Mədinə hicrət kardey bənav nozil bıə və 20 qılə ayəku iborəte.ın surə de Kərimə-Ğıroni cəm kardey tərtibi hafto seminə və de nozil bıey tərtibi seminə surəy ki,”Ğələm”-i surə bədiqə və “Muddəssir”-i surə bənav enovniyə bıə. Muzzəmmili mıborəkə surə ıştə oləti bəştə dəqətey mənoədəy və çəyku məğsəd və murad həm Xıdo-Rəsule(s).

Rəvoyətədə omə ki,peyğombər(s) ıştə dəvəti oşko kardə  zəmonədə,Ğureyşi yolon “Darun-Nudvə”-də cəm bin ta de ə həzrəti mıborizə bardero qıləy ro pəydukon.çəvonku bəzi qıləyni voteşe ki,bəy çı kahini nomi bınəmon.əmmo,i dastə de ın təklifi mıxolifətışon karde.kali qıləyniyon həm tərcihışon doe ki,bə həzrəti sahir və sehrboz bıvoton ki,ım təklif həm ğəbul nıbe. nəhoyətən,voteşone ki,harçi ki,heste,əv çəmə duston miyono qıləy coəti və təfrığəş eğandə. peşo.əyo cəm bıə mışrikon iyandeyku co bin şin.

Im sıxan bə peyğombər(s)-i rəse və ə buzurquvarə həzrət ıştə risolət və missiya sanqinəti və saxtəti dərəse və ıştə olətış bəştə dəqəteşe və de istirohəti məşğul be.bın zəmonədə Cəbrəyil-Əmin(ə) nozil be və Muzzəmmili mıborəkə surəş bo ə həzrəti handışe.

Muzzəmmili mıborəkə surə ayəon iminə baxş,islomi-peyğombəri(s) bo bəşəvnəy ibodət iyən Kərimə-Ğıroni tilovət kardey ko dəvət kardedə və ə həzrəti bo qıləy sanqinə ibodi bərnomə ğəbul kardey hozzı kardedə.

Ayəon dəvomədə peyğombər(s)-iku hovsələ və səbr kardey iyən deştə mıxolifon  mudorə və çəvon mığobilədə mığovimət kardey dəvət kardedə.miad,həzrəte Mosə(ə)-i bə fironi səmt vığandey və çəy tuğyongərəti iyən bə əzobi mıbtəlıo bıəey barədə bıə bəhson,şəvi ibodəton həxədə bıə dəstur və fərmon,bo Kərimə-Ğıroni tilovət kardey dəvət kardey,nımoj votey,zəkoti pərdaxt kardey və doey,Xıdo royədə infoğ və baxş və istiğfor kardey həmçinin çın mıborəkə surə coqləyni baxşonkuye.