Osmoniyə surəon-251

Osmoniyə surəon-251

Vicdoni de ğıyoməti ruji əcibə formaədə bıə bəyənde mande və şəbohət,bə miadi məsələ fitri iyən ğəti bıey qıləy co nışonəy.ayəon dəvomədə bə ın sıvoli cəvob dodyə ki,ğıyoməti ruj kon ruje? sıftədə bə ğıyoməti ruji bənav bıə hodisəon yəni dınyoədə bıə bə dıjdə hodisəon işorə kardey lozıme ki,həmonə ruji qırd dınyo nizom iyən sistem vırto-volo bəbe.joqo ki, hamyedə: ”(qıləy ruj ki,)həmonə ruji çəşon bə vəhşəti şiddəti xoto,bə qardış bome və ovşım benur bəbe və həşi iyən ovşım bə ico cəm bəbeyn”.(7-9).

Həşi de Ovşımi bə ivrə cəm bıey barədə ım ehtımol mevcude ki,Ovşımə tədricən bə həşi cozibə təsiri ji dəbəşe,bəy nez bəbe və oxoyədə bəçəy səmt cəzb bəbe və cəm bəbeyn və har dıqləyni benur bəbeyn.nəticədə zəmini kurə bə qıləy vəhşətnok iyən dəhşətinə zılmət iyən toykiyəti dıço bəbe.

De ın tərtibi de qıləy dıjdə inğılob iyən əvəz bıey(ki,çı sıftənə nəfxə və pu kardey nəticəy)ısətnə dınyo bə oxo bərəse.peşo de qıləy co dıjdə təhəvvuli(de dıminə suri pu kardey)çı insonon ijən sənibəton bəyji bıey proses bino bəbe.həmonə ruji ğıyoməti ruji inkor kardə və bə həşə jıə kofir iyən qınokorə fərdon,bəştə tarsi və vəhşəti şiddəti xoto,dumo qıləy pənohqo bəbeyn və bə qıno sanqinəti iyən əzobi tarsi xoto,vitey iyən fərol kardey fikədən.əmmo,bəvon votey bəbe:”hiçvəxti jıləvoni ni,fəroli roy iyən qıləy pənohqo mevcud ni.həmonə ruji oxonə ğərolqo fəğət bəştı pərvərdıqori səmte.bə ruji insonon ıştə bənav vığandə qırd koonku aqah bəbeyn”.

Ğıyoməti mıborəkə surə ibaxş çı çokə ko soyb bıə muminon de yavə ko soyb bıə kofiron çehrəon ğıyoməti ruji bə təsvir kəşedə və jıləvoni hamyedə:həmonə ruji surəton şo və xoşholin və bəştə pərvərdıqori nəzə kardeydən və bəçəy mıslış nıbə zoti,bəçəy mutləğə kəmol iyən cəmoli  səmt cəzb bedən.çın m muminə dastə mığobilədə,rıkin və bəyənde qıniyə surət və çehrəon mevcude.əvon çoko ki,bə əzobi nışonəon nəzə kardedən və ıştə çı xəyə koyku təy bıə iyən de yavə koon pur bıə nameye-əmali mışohidə kardeyədə,pərişon,məhzun iyən ğəmqin bəbeyn.çəvon simaon ğəzəbin bəbe və zınedən ki,navədə qıləy əzob əvoni çəş kardedə.

Ğıyoməti mıborəkə surə 26-ə şərifə ayə dardnokə maqi ləzə və ani tərsim kardedə ki,bə coqlə dınyo səmt qıləy qədə bəy.əmmo,bə ın ayəon əsos,ım ləzəbo rostəvıjə muminon hoston dəbəvarde.qıləy holədə ki,əv bo beimonə fərdon vey saxt və şiddətin dəbəvarde.İmom Sadığ(ə) hamyedə:”maq bo mumini nisbətədə bənə qıləy vey xoşə bu doə ətriye ki,əy bu bəkarde və bənə hani qıləy çi boəy bə əməl bome və dard iyən əzob-əziyyət kulliyə formaədə çəyku bırniye bəbe və bə kofiri nisbətədə bənə əfi mori ya əğrəbi jıey ya çəysə həm şiddətine”.

İnsoni maqi zəmonədə ki,çəy con bəçəy xılx və xırtə rəseydə,hicobon bə kəno şedə və həmonə fərd ıştə əzob iyən cəzo nışonəon vindedə və ıştə əməlon ağıbətiku vağif iyə xəbədo bedə. həmonə ləzə və anədə əv imon vardedə,əmmo çəy bə zəmon vardə imoni boəy hiçvəxti qıləy foydəş nibəbe.bın zəmon çəy ətrofədə bıə kəson dastpoçə və de həyəconi boçəy nicotiro qıləy ro dumo hərəkət kardedən və votey bəbe: “aya ikəs hete ki,(ım noxəşi çı maqiku) peroxno” 27. çoko ki,noxəş ıştə jimoniku mıtləğə surətədə məyus bıə”və bə dınyoku co bıey yəğınış pəydu kardə  və (çəy)lınqi şıvəkon (bə con doey saxtəti xoto)bəyənde pepuştedə və əv bə Xıdovəndi səmt oqardedə və ilahi məhkmədə hozzı bəbe.ım çı həmmə insonon tale və sərnıvışte  ki,qırd əvon jıqo bə Xıdo səmt obəqardeyn.

Ğıyoməti mıborəkə surə oxonə ayəon çı miadi həxədə bə dıqlə cozibədorə istidloli işorə kardedə.sıftənə mərhəldə bə xılğəti bə qıləy hədəfi əsos bıey işorə kardedə və hamyedə:”aya inson qımon kardedə ki,behədəf va doey bəbe?(ayə-36)çokonə bovə kardey bəbe ki,Xıdovənd ım hevujə dınyo de qırd ım əzəmət və mecuzəon,bo insoni xoto ofəyəşe,əmmo insoni xılğətədə hiç qıləy hədəfış nıbu?peşo ilahi ğudrəti zikr kardedə və hamyedə:”aya əv,bə rəhım ru kardə bıə məniku qıləy nutfə nıbe?”.peşo(ın mərhələku dəvarde və) bə xuni surət ome və Xıdovəndi əvış ofəyə və soxteşe. və ijən ın mərhələ nımande.peşo çəyku dıqlə merdı-jeni cinsış xəlğ karde.”.

Aya hikməti soyb bıə Xıdo çı inə luz-ləvə toykiyətiyədə qıləy hırd iyən be erjə nutfəku ofəyəşe, ha ruj qıləy tojə xılğət xəlğ kardedə,çı jimoni nuyə oləti bəçəy tan kardedə və bəy qıləy tojə çehrə və sima baxş kardedə,nəhoyətən əv bənə qıləy komilə insoni formə çı moəku bə dınyo omeydə,ısət aya jıqo kəs kardey nibəzıne bımyon və mardə kəson ijən sənibəton bəyjiko?.