İlahi əsma və nomon-2
İlahi əsma və nomon-2
Dəvardə bərnomədə bə Xıdovəndi veyçokə nom və əsma işorə be.Xıdovəndi çəməku tələbış kardə ki, bənə Rəhmon, Rəhim, Lətif, Həkim, Əziz və sayirə nomom vanqkəmon.joqo ki,Ərafi mıborəkə surə 180-ə ayədə hamyedə:”və lillahi ...veyçokə nomon bə Xıdo məxsuse.çən,əy de(həmonə nomon) vanqkənən”.
Xıdovənde-Mutəal ıştə nomonış boştə rəhməti hevujətiro və ıştə məxloğati hocəton bə vırə rosnero ğərol doşe ta əvon deçəy nomon zikri,çəy foydəonku bəhrə bobon.Xıdovənde-Xalığ Kərimə-Ğıronədə bə ıın nomon işorə kardedə ki,har qıləy ko bəştə məxsusə nomon nisbət doydən.məsələn,Zuməri mıborəkə surə 62-ə ayədə hamyedə:”Əllahu....xaliğu.yəni Xıdovənd çı harçi Xalığe və əve bo harçi vəkile”.bın şərifə ayədə har qıləy çi xılğət iyən icod kardey,de xalıği nomi bəştə nisbətış doə.de qıləy co iborəti bın ayədə hamyedə ki,Xıdo de xalıği ism və nomi həmmə çiyon ıştən xəlğ kardedə....həmçinin Ənami mıborəkə surə 95-ə şərifə ayədə çı donəon və tumon poə bıey və çəvon daxiliku qıləy nuyə həyğəton oşko və zohir bıey de Faliğ nomi bəştə nisbət doydə.
Xıdovənde-Aləm bo ıştəni mıərrifi və təğdım kardero,de məxsusə sıfəton təcəlliş pəydu kardə və məxsusə əsma və nomonış bə əməl vardə.əmmo,ın nomon miyono qıləy nisbət bərğərole.ım nomon bənə bə qıləy ləşkəri ğıvvonin ki,həm bəpe və həmən jinə dastonış heste.yəni çoko ki,çı hərbiçiyon miyono mayor və kapitani təsəllut və sultəş heste,əmmo əvon ıştən həm ıştəsə bəpe bıə məğam soybon yəni polkovniki əmri jiyədəy.Xıdovəndi nomon həm jıləvoniye və qıləy rutbə və dərəcəş heste.bın mənoədə ki,Xıdovəndi kali ismon umumi və hevujə məno doydə və ıştə nomon məcmuədə coqlə nomon ehtıvo kardedə.məsələn,çun Xıdovənde-Mutəal bə noxəşi şifo doydə,əve əv Şafiye.Şafi nom çı rəzzaği nomi kompleksi hiyədə.çun,əv mıxtəlifə rızğo-ruziyon nozil kardedə ki,şifo çəvonku qıləyniye.Rəzzağ həm çı Xalıği məcmuə jiyədəy.çıro ki,sıftədə bəpe qıləy mevcud xəlğ bıbu ta Rəzzoği nom bə ko booy və rızğo-ruziş hozzı bıbu.həmçinin,Xalığ həm çı Ğadiri nomi məcmuədəy. çun, Xıdovənd bə har qıləy çi ğudrətış heste ki,Xəlğ kardey həm çəvonku qıləyniye.bəçımi əsos,har qıləy məxsusə ismi coqləyni nom heste tayinki,ım ismon silsilə bə Xıdovəndi həmməysə barz və hevujə qıləyni yəni bə Allah nomi rəsedə.İsmi Əzəm ki,həni coqlə nomon məcmuə jiyədə ni və qırd nomon de deştə mərtəbəon oqətey,çəy məcmuə jiyədəy.liza Allah qıləy isme ki,bə qırd əsma və sıfəton hakime və qırd kəmolaton ıştədə ehtivo kardedə.
