Osmoniyə surəon-252

Osmoniyə surəon-252

Imruj əmə de Kərimə-Ğıroni hafto şəşminə mıborəkə surə oşno bəbemon.bo ın surə bənə Dəhr, Həl əta və İnson nomonışon zikr kardə ki,qırd ın kəlməon çın surə sıftəku peqətə bıə.çın surə mevzuonku kali qıləyni çımiku iborətin:insoni xılğət və çəy çı nutfəku ofəyə bıey,hidoyət və irodə ozodəti,ilahi hidoyəti mığobilədə mandə kəson mıxtəlifə əzobon,əbrar və çokə ko soybon mıkofoton,Kərimə-Ğıron və çəy hukmon icro kardey əhəmiyyət,insoni ıştə nəfsi səpe ko kardey,ilahi məşiyyəti çı insoni faili-muxtar beyədə bıə hakimiyyət.İnsoni mıborəkə surə Mədinədə nozil bıə və 31 qılə ayəku iborəte.

In surə sıftədə bə insoni xılğəti və bəçəy bə formə dəşey işorə kardedə.çıro ki,bə xılğəti dığğət kardey,bə Xıdovənde-Aləm,ğıyomət  iyən miadi ruji dığğət kardey zəminə hozzı kardedə. Xıdovənde İnsoni mıborəkə surə dıminə ayədə hamyedə:”əmə insonımon çı umujənə nutfəku ofəyəmone və əy imtovon kardedəmon(demiyən) əvımon əməs iyən əvind ğərol domone”. Kərimə-Ğıroni çandə qılə ayəonədə çı insoni xılğəti mərhələonku sıxan bı miyon omə ki,çı Kərimə-Ğıroni  ecozamizə məbhəs və bəhsonku bə hisob omeydə.bə ayəon əsos,Xıdovənde-Xalığ insoni nəslış çı tul və giliku ofəyəşe.peşo,nutfəş bə bastə bıə xuni oqordıneşe.muzğə (qujdə poə) çın xılğəti təkamuli coqlə mərhələ be.peşo bə astə surət dəşe və bın zəmon həmonə astə de qujdi puşniyə be və de ilahi rufi pu kardey,qıləy coqləyni xılğətış pəydu karde və bə insoni təbdil be.insoni xılğəti mərhələ bəyon karfdey bəy omutedə ki,de Ğadirə Xıdovəndi dasti ofəyə bıə bə ın mırəkkəb və lətifə xılğəti çok-çoki nəzəko və ilahi elm və ğudrəti dərkko. surə çəy bədiqə insoni bə təklif,məsuliyyət və imtovoni məğami rəseyku bəhs kardedə və çun ki, imtovon iyən təklif aqahəti nıbə holədə mumkin ni.dıminə ayə oxoyədə bə zıney əbzori yəni bə çəş iyən quşi işorə kardedə ki,çı insoni ixtiyorədə ğərolış doə.Dəhri mıborəkə surə seminə şərifə ayə çı bəşəri hidoyətiku sıxan votedə ki,Xıdovənde-Xalığ çı insoni dınyo iyən axırəti hərəbaxtəti roy bəy nışon doydə və oxoyədə insonon ya şukr kardedən və ın hidoyəti ğəbul kardedən və ya nunkurəti və tuğyongərəti kardedə və hakəs ıştə intixob kardə çiyon nəticə vindedən.

Insoni mıborəkə surə qıləy məşhurə şə`nı-nuzulış heste ki,şiyə iyən sınni mənbəonədə çı İbn Əbbosiku jıqo nəğl bıə:Həsən(ə) iyə Huseyn(ə) noxəş bin.peyğombər(s) deştə əshobonku idastə bəçəvon iyodət omin və bəvon osəşon ğande və Əli(ə)-i voteşone:Ha Əbul Həsən ha! boştə fərzəndon şifo pəydu kardero qıləy nəzr kardəbe çok əbi!

Əli(ə),Fatimə(s) və çəvon xıdmətkor bıə Fizzə nəzrışon karde se ruj bqəteyn tayinki,əvon şifo pəydukon.tikəy nıdəvarde ki,əvon hardıqləyni şifoşon pəydu karde.qıləy holədə ki,kə xıyzon azuğə cəhəto tanqə vəzyətışon hestebe,əve Əli(ə)i mığdor cəvış ğarzı karde və həzrəte Fatimə(s) həm çəy sedə i hissəş ordə karde və bo iftori nunış pate.əmmo,iftori zəmonədə qıləy fəğır ome və voteşe:”səlom bıbu bəşmə ha Muhəmmədi xıyzon ha! mı çı mısılmınon beçizə qıləynim,bəmı qıləy xorək bıdənən”.

Əvon həmməkəs həmonə miskin və beçizışon ıştəsə mığəddəm və bənavışon zıne və ıştə xorəki səhmışon bəy doşone və şəv fəğət ovışon harde.

Dıminə ruji ijən rujəşon qəte və iftori vaxti hozzı kardə bıə xorəkışon bəçəvon kə omə bə qıləy yətimi baxşışon karde,doşone və ijən de ovi iftorışon karde.peşonə ruji əvon ijən rujəşon qəte və seminə ruji həm həşi ğurubi vaxti bəçəvon kə qıləy əsir ome.əvon ijən ıştə xorəki səhmışon bəy əto kardeşone,doşone.sıbh bıə zəmonədə Əli(ə) Həsən(ə) iyən Huseyn(ə)-i dastonışon qəte və bə peyğombər(s)-i xıdmət rəseyədə,ə həzrəti mışohidəş karde ki.əvon bə vəşyanəti şiddəti xoto, larzedən.əve hamyeşe:”şımədə çımı vində hol,bomı vey qone”.peşo əyşte bəsə səpo və deəvon bə ico hərəkətış karde tayinki,bə kə daxil bin.vindeşe ki,Fatimə(s) ibodəti mehrobədə mandəbe və bə vəşyanəti şiddəti xoto,çəu luz bəçəy peşti dəçıkəbe və çəy çəşon bə dılə dəşəbe. peyğombər(s) vey norohət be və bın zəmon Cəbrəyil(ə) nozil be və voteşe:Ha Muhəmməd ha! Xıdovənd bə jıqo qıləy xanedani xoto,bətı təbrik votedə”.peşo Həl əta surə çı Əhli-Beyt(ə)-i təclil və ğədrdonəti həxədə boəy ğiroət kardeşe,handeşe”.