Osmoniyə surəon-257
Osmoniyə surəon-257
Mursəlati mıborəkə surə 20-ə şərifə ayə insonon bə dol və ruşeymi aləmi dığğət kardedə və Xıdovəndi əzəmət və ğudrəti və bın əsraramizə dınyoədə çəy neməton ziyodəti bəvon nışon doydə ta itərəfo miad iyən ğıyoməti ruji bərpo bıeyədə bə Xıdovəndi ğudrəti işorə kardedə və co tərəfiku həm inson ıştəni bə qırd ım ilahi neməton ğarzıxo zıneydə və bəy sə təzim kardedə.joqo ki,hamyedə:”aya əmə şıməmom qıləy exroc və beçizə oviku ofəyəmonni? Peşo əvımon oqətə bıə və hozzıə ğərolqoədə (rəhımədə) ğərol domone”.qıləy ğərolqo ki,çı insoni nutfə həyot, ozavziye iyən perəsey qırd şərayit əyo təmin bıə və qırd ımon vey əcib iyən dəğiğə formadə ofəyə bıə ki,har qıləy insoni bə təəccıb iyən çoçinəti vodor kardedən....
Xıdovəndi bın yolə dınyoədə bıə ayəon,nışonəon və neməton,bəçəy hevujə rəhmət və ğudrəti bəyon kardedə və həmçinin bə miadi imkon bıey qıləy dəlile və hamyedə:”aya əmə zəminımon çı insonon iştimo mərkəz ğərol nıdmone?.həm çəvon həyot və həmən maqi holədə”.(25-26).
Zəmin bo həmə insonon qıləy ğərolqohe və əyo jimon kardə kəson ıştə səpe cəm kardedə və zəmin çəvon qırd ehtiyocon çəvon ixtiyorədə ğərol doydə və çəvon bımyon həm ıştədə vırə doydə ki,ehanə zəminədə mardə insonon dəfn bıənəbe,ufunət və infeksiyə və çəyku bə əməl omə noxəşətiyon bo bəyjiyə kəson jimoniro qıləy faciyəvi hole.
Peşo bə Xıdovəndi zəmini dimisə bıə yolə neməton işorə kardedə və hamyedə:”və bəvədə ğoym iyən barzə bandon ğərol domone”.ım bandı-kuon ki,bə osmoni səmt bılınd bıən və çəvon veyni rəğ-rişə bəyənde anqılin və co tərəfiku həm əvon bənə zirehi zəmini dəqətedən.əvon zəmini çı daxili iyən xarici təzyiğonku oqəteydə və co tərəfiku həm osmoni həvo de zəmini bəyənde qıniye vəy qətedə və bə həvo pəncə və çanq ğandedə və əy deştə bə ico qordınedə.co tərəfiku həm çı tufon iyən dıjdə vavzon zəhron kontriol kardedə və de ın tərtibi mıxtəlif cəhəto bə zəmini əhli qıləy oroməti baxş kardedə.
De qırd ımon bə ico ilahi ğudrəti nışonə və ayəon və çəy həmmə nemətonədə ğərğ bıə və deştə çəşon vində və mışohidə kardə kəson,ijən ilahi ədolət və hikməti məzhər bıə miad və ğıyoməti ruji məhkəmə bə həşə jeydən və inkor kardedən....
Ğıyoməti ruji xısusiyyətonku co qıləyni Mursəlati mıborəkə surə 35-ə ayədə zikr bıə ki, Xıdovənde-Xalığ bə ruji bə qınokor iyən mucrimon qəvon çı sukut və tam jıey mıhi bəjeyn və bəvon icozə doey nibəbe ta əvon uzrxahəti bıkon.nə bəvon bo ıştəni mıdofiyə kardey icozə doey bəbe və nə sıxan votey icozə.çıro ki,qırd həyğəton əyo məlume və bo voteyro həni hiççi lozım ni.dınyoədə deştə zıvonon suyi-istifodə kardə və ənbiya və peyğombəron təkzib və bəvon istehzo kardə,botıli həx nışon doə və həxı botıl nışon doə qınokoron zıvonon bə haçar bəqıniye və həni ko nibəkarde.hejo ım ıştən qıləy dardnokə işkəncə və əzobe ki,jıqo qıləy səhnədə insoni həni bo ıştəni mıdofiyə və uzrxahəti kardero qıləy ğudrətış nibəbe.
Bə zəmon Xıdovənd bəhamye:”ısət ehanə çımı mığobilədə (cəzoon çənqaliku fərol kardero) çorəon heste,əncom bıdənən”.aya şımə çımı hukuməti əraziku fərol kardey bəzıneyon?ya şımə jəqo qıləy ğıvvon heste ki,fidyə bıdon və ıştəni ozodkon? Və ya şımə çəmə bəşmə hisobi rəsə kəson bə dast dənoey bəzıniyon? Şımə dasto omə har qıləy koon bə vırə rosnə,əmmo bızınən ki,şımə hiççi kardey nibəzıniyon.
Ayəon co tərəfiku ğıyoməti ruji de “yəovmul-fəsl” nomi yəni de co bıey ruji sədo jeydə və co tərəfiku həm bəy “yəovmul-cəm” yəni iştima və cəm bıey nomış noə ki,çın dıqləku har qıləyni iqlə zəmonədə mumkine.sıftədə həmmə millət ilahi dıjdə məhkəmədə cəm kardey bəbe və peşo əvon bəştə əğedə və kardə əməlon xoto,de mıxtəlifə səf və cərqəon iyandeyku co kardey bəbeyn.hətto əvon ki,bə vəhışti səmt hərəkət bəkardeyn,mıxtəlifə dərəcə və səfonışon bəbe və həmçinin cəhəndımi əhl həm de nevbənevə mərtəbə və cərqəonədə ğərol bəqəteyn......
Mursəlati mıborəkə surə 50-ə ayə Kərimə-Ğıroni har qıləy zəmonədə nu və tojə elon kardedə ki, de eyni dəvardəyon dastoni iyən ilahi hukmon bəyoni Xıdo zikri insonədə bəyji kardedə.ın ayə ki,çın surə oxonə ayəy,de qınokoron huccəti timom və təmom kardedə.ə kəsonki,zıneydən həmmə çiyon Ğıronədə heste və çəvon təbironədə munəkis bıə,əmmo ijən coqlə roy qəteydən. çən,həni şımə peşo çın həxə sıxani bədiqə bə kon sıxani imon bəvardiyon? Ehanə şımə de Kərimə-Ğıroni hidoyət nıbiyon,şımə həlokət hətmi və hukməne və həmonə Ğıron ğıyoməti ruji şımə təkzib iyən cinoyəton bəşmə ələyh şoydəti bəkarde....
