Osmoniyə surəon-265

Osmoniyə surəon-265

İnfitari mıborəkə surə Kərimə-Ğıroni həşto dıminə surəy və ım surə bə qır mıfəssır və təfsirəvonon ittifoği rayi əsos,Məkkədə yəni peyğombər(s)-İ bə Mədinə hicrəti tikəy bənav 13-ə sori nozil bıə və 19 qılə ayəku iborəte.İnfitar luğətədə qıləy çiyədə təhəvvul və əvəzon icod kardey mənoədəy.joqo ki,əv ıştə navnə holəti çı dasto doydə və qıləy nu və tojə holət və formə pəydu kardedə.çun ın surə de(izəssəmaun-fətərəti)-bino bedə və ğıyoməti astanədə osmoniyə cismononədə qıləy dıjdə təhəvvul və əvəzonku sıxan votedə,əve ın nom bə ın surə noey bıə.Kərimə-Ğıroni çandə qılə ayəonədə bə ğıyoməti ruji hicob,maneə və pardəon bə kəno şıey təkid kardedə və bəruji çı həyğəton uryon və oşko bəeyku sıxan votedə.

İnfitari mıborəkə surə 6-ə şərifə ayədə hamyedə:”Ha inson ha!çiç boyis bıə ki,tı ıştə Kərimə Pərvərdıqori mığobilədə məğrurəti kardedəş?”.ın ayə və çın surə ğəşənq və çəşnavi doə ayəonkuye.bərosti qıləy Xıdo ki,hetsemoni aləmi və qırd dınyo əvəz kardey zıəneydə və inson dayima çəy himoyə çətri jiyədə ğərol qəteydə və əv çı insoni perosney koy bəştə ehdə peqəteydə və çı Xalığı həkimonə lutf və kərəmi jiyədəy və Xıdovənd bəy maddi iyən mənəvi neməton əto kardedə,çən zəyifə inson jıqo qıləy Xıdo mığobilədə təkəbbırəti yoləşəxəti iyən inodkorəti kardedə?

Bın ayə iyən co veyə ayəonədə Xıdovənd de insoni xılğəti mərhələon bəyoni bə harçi çi viro bekardə və məğrurə insoni vodor kardedə ta əv ıştəni çok-çoki bızıno.İnfitari mıborəkə surə ibaxş çı insoni ğəfləti amilon təhğığ kardedə və çəy bənə bə bəştə həkimonə xılğət və bə ğıyoməti ruji dığğət nıkardey işorə kardedə.peşo çı firiştə və mələkon çı insoni əməlon səbt və nıvıştey bəyon kardedə və əvoni bə dı dastə əbrar yəni çokə ko soybon və fuccar yəni bədə ko soybon təğsım kardedə və çəvon vırə və məğami bəyon kardedə.peşo hamyedə ki,ğıyoməti ruji fəğət çı Xıdovəndi əmr və fərmon cari bəbe və əv de komilə dığğəti bə həmmə insonon koon hisobi bərəse.