Osmoniyə surəon-267

Osmoniyə surəon-267

Inşiğaği mıborəkə surə həşto çominə mıborəkə surəy,Məkkədə enovniyə bıə və 25 qılə ayəku iborəte.Inşiğaği mıborəkə surədə bə ğıyoməti ruji zuhuri əloməton və bə dınyo nizomi vırto-volo bıey işorə bıə.

In surə həm bənə veyə surəon Məcidə-Ğıroni oxonə siminə cuzi surəonkuye ki,çı Miadi mevzu həxədə sıxan votedə.sıftədə bə dınyo oxo və ğıyoməti sıftədə bıə hovlknok və tarsnokə hodisəon işorəon kardedə.çok və bədə ko soybon əməlon və çəvon sərnıvışt,bə ilahi əzob və cəzo boyis bıə əməlon,insoni dınyo iuən axırəti jimonədə bıə seyr və mərhələon və çı çok və bədə insonon cəzo və mıkofoti iyən co mevzuon bın surədə bəhs bıə.

Dınyo oxoyədə dıjdə hodisəonədə ki,inson və qırd mevcudat komilə surətədə çəy mığobilədə təslim bəbeyn,ımi bəyon kardedə ki,zəmin,osmon,insonon iyən co kurəon fəno və məhf bəbeyn və bə qıləy co muhim və barzə dınyo yəni axırəti dınyo mərhələ daxil bəbeyn.həmçinin qırd ım hodisəon Yolə Xıdovəndi bə həmmə çiyon məxsusən bə miad iyən ğıyoməti ruji bıə ğudrəti nışonənkuye.

Inşiğaği mıborəkə surə 6-ə ayə bə insonon xitob kardedə və çəvon vədə bıə tale və sərnıvışti ruşin iyən məlum kardedə.joqo ki,hamyedə:”ha inson ha! tı de cəhd iyən renci(əziyyəti) bəştə pərvərdıqori səmt şeydəş və əy mıloğat bəkardeyş(bəvindeyş)”.ın ayə bə həmmə insonon jimonədə bıə qıləy əsosə əsl və prinsipi işorə kardedə və əv həm ıme ki,hejo çı bəşəri jimon de zəhmət və renci bə icoye.ısət çı bə dınyo məta və moli rəsey bıbu ya bə axırət,əbədi hərəbaxtəti iyən pərvərdıqori ğurbi rəsey bıbu.dınyo jimoni təbyət jıləvoniye,hətto dınyo rofihinə jimoni barzə həddə jiyə fərdon həm bıbu,əvon həm ijən çı renc,dard iyən əzob-əziyyətonku bə kəno nin. hestemoni aləmi kərvonədə səy kardə insoni dayimi hərəkət ısət çı bıpyişe ya nıpyişe,bə Subhonə Xıdo səmte və inson deştə ım renc,əziyyət və təloşon bəştə pərvərdıqori rəseydə. həyğətədə,səy və təloş çı Xıdovəndi bo insoni perosney və bə təkamuli rosney bərnoməonku qıləy cuz və ğısme.

Inşiğaği mıborəkə surə ayəon dəvomədə çı çok iyən yavə insonon tale və sərnıvşti bəyon kardedə.joqo ki,12-ə ayədə hamyedə ki,çı bəd və yavə insoni cəzo ıme ki,əv bə cəhəndımi otəşi dılə şodey bəbe və əyo bəsute.peşonə dıqlə ayə çın ko dəlili jıqo bəyon kardedə ki,əv ıştə xıyzon iyən odəmon miyono de şəhvoni və heyvoni ləzzəton məst be və deştə kardə qıno iyən kufri şoyvonəti kardedəbe.əv jıqo qımon kardedəbe ki,bo hisob-kitobiro həni hiçvaxti bə Xıdovəndi tərəf oqordıney nibəbe.

Inşiğaği mıborəkə surə ayəon ibaxş de seqlə muhimmə ğəssəmon həmmə kəson çı xılğət və təbyəti reçinə təzohuron həxədə bo əndişə və fik-fam kardero vodor kardedə.bə “şəfəği” hanqomi ğəssəm hardey həmonə çı şəvi sıftədə ruşinəti de toykiyəti umuj qıniyeye ki,ım həm dınyoədə qıləy əvəzon və təhəvvuliku xəbə doydə və çı ruji oxo iyən şəvi bino bıey elon kardedə və çımonsə əlovə qılıəy çəy qıləy məxsusə reçinəti və cilvəş heüte ki,əv həm məğrıb ya şam nımoji vaxte.

Bə Şəvi ğəssəm hardey bəçəy dılədə noə bıə ziyodə sırr və təsiron xotoye və bə zəmon həmmə inson iyən heyvonat bəştə kə-bə və lonəon oqardedən.şəvi nəticə çı umum coninə məxloğati oroməti iyən osoyişe və seminə ğəssəm həm bə komilə ovşımiye.

Kərimə-Ğıroni ayəonədə bəvon ğəssəm hardə bıə təzahuron,bə ın həyğəton təkid kardedə ki, qırd xılğəti dınyo,məxsusən inson iyən bəşəri camiyə dayima təhəvvul,hərəkət və təkamuli seyrədəy və ım ıştən çı hestemoni aləmi məxloğ və bə əməl omey isbotiro qıləy dəlile.ım reçinə məxloğat və çəvon hərəkət və təkamul  çı insoni əndişə və təfəkkuri təhrik kardedə ta əv çı xılğəti həxədə fik-famko və çın nığılə əvəzonku ibrəti dərsi peqəto və de miadi məsələ iyən Xıdovəndi ğudrəti tiki həm vey oşno bıbu.