Osmoniyə surəon-268

Osmoniyə surəon-268

Inşiğaği mıborəkə surə ayəon ibaxş de seqlə muhimmə ğəssəmon həmmə kəson çı xılğət və təbyəti reçinə təzohuron həxədə bo əndişə və fik-fam kardero vodor kardedə.bə “şəfəği” hanqomi ğəssəm hardey həmonə çı şəvi sıftədə ruşinəti de toykiyəti umuj qıniyeye ki,ım həm dınyoədə qıləy əvəzon və təhəvvuliku xəbə doydə və çı ruji oxo iyən şəvi bino bıey elon kardedə və çımonsə əlovə qılıəy çəy qıləy məxsusə reçinəti və cilvəş heüte ki,əv həm məğrıb ya şam nımoji vaxte.

Bə Şəvi ğəssəm hardey bəçəy dılədə noə bıə ziyodə sırr və təsiron xotoye və bə zəmon həmmə inson iyən heyvonat bəştə kə-bə və lonəon oqardedən.şəvi nəticə çı umum coninə məxloğati oroməti iyən osoyişe və seminə ğəssəm həm bə komilə ovşımiye.

Kərimə-Ğıroni ayəonədə bəvon ğəssəm hardə bıə təzahuron,bə ın həyğəton təkid kardedə ki, qırd xılğəti dınyo,məxsusən inson iyən bəşəri camiyə dayima təhəvvul,hərəkət və təkamuli seyrədəy və ım ıştən çı hestemoni aləmi məxloğ və bə əməl omey isbotiro qıləy dəlile.ım reçinə məxloğat və çəvon hərəkət və təkamul  çı insoni əndişə və təfəkkuri təhrik kardedə ta əv çı xılğəti həxədə fik-famko və çın nığılə əvəzonku ibrəti dərsi peqəto və de miadi məsələ iyən Xıdovəndi ğudrəti tiki həm vey oşno bıbu.

Inşiğaği mıborəkə surə de Xıdovəndi nışonəon bəyon kardey,çı insoni kufr iyən inodkorətiku təəccıb kardedə və hamyedə:bəvon çiç bıə ki,imon vardedənin?insoni coni dılədə və kayinatədə bıə Xıdoşınosi və Xıdopərəsti dəlilon,ziyod iyən oşkoye.ın məxloğ çıro bəpe bə Ğıron,nıbuvvət, axırət iyən co həyğəton imon nıvardon? Və boçi Kərimə-Ğıron boəvon handey beyədə,əvon çı Ğıroni soyb və zəmin iyən osmoni pərvərdıqori mığobilədə bandəçəti kardedənin və bəy itoət kardedənin?...

Buruci mıborəkə surə Kərimə-Ğıroni həşto pencminə surəy və 22 qılə ayəku iborəte.ın surə Məkkədə çı peyğombər(s)-i besəti sıftənə soronədə nozil bıə.

Çın surə iminə ayədə bə bırcon soyb bıə osmoni ğəssəm hardey bıə.osmoni bırcon osmonədə çı astovəon seyri xət və vırəy.bəziyon həm əvışon çı fələki donzə qıləynə bırcışon hisob kardə. yəni çı astovəon kompleks ki,çəmə nəzədə bənə zəmini mevcudaon qıləyniye və həşi har məhazi yəni vəynə mandə və paralelə manqədə çəvonku qıləyniyədə ğərol qəteydə. həlbəttə, həşi hərəkət kardedəni, bəlkəm zəmin çəy qırdo qardedə.əmmo jıqo bə nəzə rəseydə quya həşi vırə bə vırə bedə və çı fələki surəton qıləyniyədə vəynə mandedə.veyə təfsiron heste ki,buruc və bırcon jıləvoni təbirışon kardə.