Osmoniyə surəon-271
Osmoniyə surəon-271
Ə`la mıborəkə surə Kərimə-Ğıroni həşto haftminə mıborəkə surəy ki,Məkkədə nozil bıə və 19 qılə ayəku iborəte.çın surə kulliyə mevzuon çımiku iborəte:Xıdovəndi təsbih və təğdis və çəy haft qıləynə sıfəton,hestemoni aləmədə nəzm,təvazun və hidoyəti ğanun,təzkiyə nəfs və ıştə nəfsi sape ko kardey,bə İbreym(ə) iyən Mosə(ə)-i kitob və səyfə təlimon işorə və sayirə...
Ə`la mıborəkə surə sıftədə de Xıdovəndi təsbih iyən mislış nıbə sıfəton dəvəti bino bıey,bə yod dənoydə ki,bəpe Xıdovəndi nom çı bıton nomon kəno və çəvon cərqədə ğərol qətey nıbu və bəpe çəy pokə zot çı harcurnə ayb iyən noxsaniku və məxloğ bıeyku mınəzzəh və pok zıney bıbu.de ayəon təbiri Xıdovənde-Xalığ çəmə təsəvvır kardə har curnə çi və kəsiku və harcurnə oşko iyən punhonə şırkiku barz iyən bəpeye.Əv qıləy Xıdoye ki,dınyoş ofəyə,bə ğaydəş noə, mınəzzəmış kardə iyən həmmə məxloğatış bə aliyə kəmolotan səmt hidoyətış kardə.Xıdovəndi hidoyət dı curnəy:təkvini və təşriyi.qıləy zəmon itərəfo bə inə və moə inəti şiddətinə hiss əto bedə və çəy sinə və şıt bo tifl iyən hırdəni hardemoniro hozzı bedə və co tərəfiku həm hırdənədə boştə inə şıti diye hissi icod kardedə.çı hədəfi royədə bə ım dı tərəfinə hozzıəti və cozibə təkvini hidoyət votey bedə və həmmə mevcudat və məxloğatədə mevcude.həlbəttə,çı insoni həxədə təkvini hidoyəti proqramisə əlovə,coqlə nev hidoyət həm mevcude ki,de vəhyi roy iyən peyğombəron vığandey vositə bə əməl omeydə və bəy təşriyi hidoyət votedən.ım hidoyət qırd zəminəonədə təkvini hidoyəti təkmiləkəy.Ə`la mıborəkə surə ayəon de bə beməyon iyən ço lınqə heyvonon xorəkon ki,Xıdovənde-Xalığ əvoni çı zəmini dıləku və kəfşəniku xaric kardedə, bekardedə,insoni çok-çoki de Xıdovəndi barzə rububiyyət iyən perosney məğami oşno kardedə və de Xıdovəndi kali neməton hikoyə kardey odəmədə təşəkkur və şıkk kardey hissi icod kardedə.....
Təğdiri məsələ pamuye və dınyo dəğiğə nəzmi mənoədəy və həmçinin umum mevcudaton hidoyət,çə məsələonkuye ki,çanədə zəmon həm çəyku dəvardo və çı bəşəri elm ozavziyo iyən inkişofko,ziyodə həyğəton çəyku ruşin iyən məlum bəbe.bın barədə ziyodə kitobon nıvıştey bıə və bəvonədə kayinati sırron təyin bıə.Kressi Morrison “insoni xılğəti sırron” kitobədə çı heyvonat və mıxtəlifə co coninə məxloğati hidoyətiku nımunəonış vardəşe:mıhocirə pərəndəon ki,qahi vaxti sori ərəzədə çandə həzo kilometr çı okeyan,cənqəlon iyən biyobononku dəvardedən, hiçvaxti ıştə lonəon qim kardedənin və oqardey bəpeştə bəştə əsliyə vətəni oqardedən.həmçinin meşi bızanq çanədə həm ıştə kandıku bə diyəro bışo və vavaz əvoni bın tərəf-bətərəf bıbardo, ijən dəyğən bəştə lonə oqardedən.qıləy holədə ki,inson bəştə ko oqardero bə dəğiğə adres iyən nışonəon ehtiyociş heste.inev hırdə moy çandə soron dıyoədə jimon kardedən,peşo bo moğnə noeyro bəştə həmonə bə dınyo omə ru və kanali oqardedə. In moy bə ləpəon zidd hərkət kardedə və boçəy perəseyro bıə mınosibə əsliyə vətəni çandə dırozə soron fosilə bədiqə pəydu kardedə...
