Osmoniyə surəon-277

Osmoniyə surəon-277

Bələdi mıborəkə surə Kərimə-Ğıroni qədə surəonkuye ki,Məkkədə nozil bıə və kırt bıə holədə dıjdə həyğəton ıştədə ehtivo kardedə.ın surə 20 qılə ayəku iborəte.çın surə kali mətləbon çımiku iborəte.bə Məkkə şəhri ğəssəm hardey,insoni jimoni de renc,zəhmət və əzobi bə ico bıey, Xıdovəndi bənə çəş,zıvon və lıvi bıə erjinə neməton və insoni bə qırd ın neməton nunkuəti,bə ın neməton şık kardey xoto,bə ehtiyocinə şəxson iyən yətimon koon rəsey,dıqlə dastə insonon və çəvon tale və sərnıvışt.

In surə sıftədə bo ın həyğəti ki,insoni jimon hejo de zəhmət və əzob-əziyyəti bə icoye və ın dınyo jimonədə dayima istirohət və xoşəti ni,bəyon kardero,ğəssəm hardedə və hamyedə:”əmə insonımon rencədə(əziyyətədə) ofəyəmone”.....

Bələdi mıborəkə surə 5-ə şərifə ayə dığğət doydə ki,insoni jimon de dard,əzob-əziyyət və renci umuj qıniye,bımi dəlile ki,əv ımoni bərtərəf kardey ğudrət və zuş ni,əmmo çoko ki,bə zumandəti iyən ğudrəti rəseydə,bə har qıləy xilofə ko və qınon mırtəkib bedə.joqo ki,jıqo bızın ıştəni çı cəzoku əmno-əmniyyətədə vindedə və hiskəs əy oqətey zıneydəni.

Qıləy zəmon ki,bə tuğyongərə insoni xeyə koonədə ıştə moli sərf kardey təklif doey bedə,əv de məğrurəti iyən yoləşəxəti votedə:mı bın royədə ziyodə molım sərf kardə.qıləy holədə ki,bo Xıdo hiççiş infoğ kardəni ya ehanə bə ikəsiş ki,qıləy molış doəbu,bo ıştəni nışon doey və ya şəxsi məğsədon xoto bıə.ayəon dəvomədə Xıdovəndi bə insoni əto kardə maddi iyən mənəvi neməton muhimmə baxşon aşmardedə ta i tərəfo çəy ğəflət iyən ğururi darışto və co tərəfiku həm əy vodor ko ta əv çın neməton Xalıği həxədə təfəkkur iyən fik-famko və ıştə coni dılədə de şık kardey hissi təhrik kardeyəy bə Xalıği mərıfəti səmt sovğ bıdo.joqo ki,hamyedə:”aya boəy dıqlə çəş ğərol nıdomone?və iqlə zıvon iyən dıqlə ləv? Və əvımon bə xəy iyən şəri roy(səmt) hidoyət kardemone”(8-10)......

Bo bəşəri ehtiyoci əbzor bıə ın neməton təkamuli royədə hərəkət kardey xoto lozıme.çəş insoni de xarici dınyo rabitədə həmməysə muhimmə rabitət.çı çəşi mevuzəvari ecozkorəti bə mığdorədəy ki,bərosti insoni ıştə Xalıği mığobilədə bə muti bıey vodor kardedə.çəşi haft curnə təbəğon har qıləyni əcib,zərif iyən insoni bə təəccıb vardedə ki,bə nur iyən ovəynəon ayid bıə fizika ğanunon de vey dəğiğə formə bəvon həmmə rioyət bıə.zıvon həm çı insoni de coqlə insoni rabitə bərğərol kardero ya qıləy ğovmon məlumaton bə coqlə nəslon ovoştıneyro vey muhimmə vositəy.və ehanə ın rabitə vositə bıənəbe,hiçvaxti inson elm,maddi mədəniyyət iyən mənəvi məsələon sahədə bın həddədə tərəğği pəydu kardey nıəzıni.lıbuton təkəllum iyən sıxan kardeyədə vey təsirəkə rolışon heste.çıro ki,vey zəmonədə hərfon və sıxanon çı de ləv və lıbuton vositə ədo bedə və çımisə əlovə lıbuton bə xorəki cuye,qəvi dılə rutubəti oqətey və ovi peşomey ziyodə komək kardedə və ın ləvon bıənəbe,insoni hardey-peşomey və hətto çəy çehrə mənzərə bə ıştə qəvi ovi bə bi ru kardey həm bıənəbe,çəy qıləy de təəssıfi pur bıə vəzyətış əbi.

Əli(ə) hamyedə:”çın insoniku təəccıbədəm ki,de i tikə piy(çəşi) vindedə və de i qətə qujdi(zıvoni) sıxan votedə və de qıləy astə(quşi) məsedə və qıləy hıliku(viniku) nəfəs kəşedə”!.

Demiyən,roy vıjniye  çı insoni ıştən ixtiyorədəy.əve ki,ıştə çəş iyən zıvoni həlol və həromə roy iyən məsirədə qordıney bəzıne və əv ıştən dıqlə xəy iyən şərə caddə və royədə hərəkət kardey ixtiyorış heste.

Bələdi mıborəkə surə ayəon i baxş qıləy qərdənə və dəvardəco zikr kardedə ki,inson de çəyku dəvarde bəştə əbədiyə xilos iyən hərəbaxtəti rəsey bəzıne.ım qərdənə və qəvolə “bandə ozod kardey” ya “bə vəşyanon ğəhəti iyən vəşyanəti zəmonədə xorək doey”,”bə nezə odəmon yətimon koon rəsey” və ya”bə zəyif iyən ocizə şəxson komək kardey”-mənoədəy.