Osmoniyə surəon-279
Osmoniyə surəon-279
Leyl(Şəv)-i mıborəkə surə Kərimə-Ğıroni nəve dıminə mıborəkə surəy ki,Hicrəti bənav Məkkədə nozil bıə və 21 qılə ayəku iborəte.
Çın surə sıftədə bə xılğəti dınyo muhimmə təzahuron seqlə ğəssəmi bədiqə,milləti bə dıqlə dastə təğsım kardedə:təğvaninə infoğ kardə kəson və ğıyoməti ruji mıkofoti bə həşə jıə pəxılə odəmon.peşo çı səxovətinə insonon koy oxo və ağıbəti hərbaxtəti və xilos bıey və əmmo,çı pəxılə odəmon ağıbəti bədbəxti və saxti hisob kardedə.
Leyli mıborəkə surə coqlə baxşon çımiku iborətin:de Xıdo vositə çəy bandəon hidoyəti məsələ,Xıdovəndi bə qırd hestemoni aləmi bıə malikiyyət və soyb bıey,qınokoron iyən ilahi ayəon inkor əkəyon və duzəx iyən cəhəndımi sutunə otəş və çəy perəxə kəson......
Xıdo-Rəsuli(s) zəmonədə qıləy ərbob və puldorə merd ki,eyni holədə pəxıl və dınyopərəst be ki, çəy xımo do şoxəonku qıləyni bəçəy kəy kəno bıə qıləy fəğırə hamsuyə kəy səmt şat bıəbe.bəzi vaxt həm çə həmonə doku çandə qılə xımo eqıniyedəbe bə həmonə fəğırə odəmi so və çəy hırdənon həm əvoni hardedəbin.əmmo,çə do soyb omeydəbe və bəsə zəminisə eqıniyə xımoon çəvon dastiku seydəbe.həmonə fəğırə merd şe çı peyğombər(s)-i palu şe bo şikoyət kardero. peyğombər(s) həmonə pəxılə boği soybış vanq karde və bəy hamyeşe:aya hozzış ə həmonə xımoə doy bəmı bıdoş və çəy əvəzi tı həm çı vəhışti xımo do soyb bıboş?həmonə pəxılə merdi voteşe:çımı ziyodə xımo doonım heste.əmmo,çımı xımo doonku hiç qıləyni bənə ım do çokə bəhrəş ni.əve,az bo jıqo qıləy muamilə hozzı nim və ımi ğəbul kardedənim.peyğombər(s)-i kəno bıə əshobonku qıləyni ım sıxanış məse və voteşe:ha Xıdo-Rəsul ha!ehanə mı bışom həmonə do çə merdiku bıhırom və bətı bıdom,həmonə çiyki bə merdi doydəbiş,bəmı həm əto bəkardeyş? peyğombər(s) hamyeşe:bəle.həmonə səhobə şe çı pəxılə merdi palu və voteşe:aya dılı heste həmonə do bəmı bəhəvatoş?həmonə pəxılə merd bə təmo dəşe və çə həmonə xımoə do mığobilədə ziyodə məbləğış tələb karde.həmonə do hıryə kəsi de təəccıbi voteşe:vey əcibe! bo şat bıə xımo doy xoto,tı mıku veyə məbləğ tələb kardedəş?peşo tikəy tam jıey bədiqə voteşe :vey çok,çımi əvəzi az bətı çıl qılə xımo do bədom.muamilə əncom be və həmonə xımo do hıryə merd çı peyğombər(s)-i palu ome və ərzış karde:ha Xıdo-Rəsul ha!az həmonə xımo dom hırye və ısət həm əy bəşmə təğdım kardedəm.Xıdo-Rəsul(s) həm çə fəğırə merdi palu şe və bəy hamyeşe:çı ımrujnəku həni ə xımoə do ıştı və ıştı fərzəndone.iyo be ki,Leyli mıborəkə surə nozil be və çı pəxıl iyən səxovətinə insonon barədə bıə sıxanonış bəyon karde.....
Leyli mıborəkə surə de bə şəv iyən bəçəy toykiyəti iyən bə ruj və bəçəy ruşinəti ğəssəm hardey, bə xılğəti dınyo zevciyyət və qitəti iyən bəçəy cinsiyyəti işorə kardedə və hamyedə:”və ğəssəm bə əkəsi ki,merd iyən jenə cinsış ofəyə”.(3).
Zevciyyəti ğanun çı Kərimə-Ğıroni ecozamizə vıronkuye.çıro ki,inson,heyvon iyən beməyon aləmədə çın dıqlə vucudi bıey və çəvon nutfə zəmoniku de tosə təvəlludi zəmoni bıə təhəvvul və əvəzon və çın dıqlə cinsi bəştə mıtonosib fəoliyyətonədə bıə xısləton rəğmən,qırd ımon xılğəti dıjdə dınyoku ilahi nışonəonin və deçəy ro vositə əvoni ofəyə xalıği əzəməti dərk kardey bəzıneyn.
