Osmoniyə surəon-281

Osmoniyə surəon-281

Leyli mıborəkə surə 12-ə şərifə ayə bımi işorə kardedə ki,insonon hidoyət kardey ko bəçəmə ehdəy.ilahi hidoyət bın dınyoədə bə həmmə mevcudaton şomil bedə və inson Xıdo hidoyəti nışonəon əsəri həmonə mevcudatonədə mışohidə kardey bəzıne ki,çokonə aləmon pərvərdıqor  əvoni de qıləy məxsusə dığğət və nəzmi və bəçəvon zərfiyyəti mıtonosib hidoyət və rəhbərəti kardedə.qıləy donə və tum zəminədə dılədə ğərol qəteydə və de aləmon pərvrədıqori hidoyəti vositə ıştə royədə de qıləy dəğiğə nəzm və hisobi ruşd kardedə,ozavziyedə və boəy təyin bıə bə kəmoli rəseydə.qırd xılğəti ofəyə Xıdo insonış həm jələvoni hidoyətış kardə iyən bəy roş nışon doə və bəştə vocib kardə və lozımış zınə ki,roy bəy nışon bıdo və əy bə məğsəd bırosno. həlbəttə,de ım şərti ki,insoni ıştən bıpyişe ki.bın baxtəvərəti iyən hərəbaxtəti royədə hərəkətko.

Zuha  mıborəkə surə çı Kərimə-Ğıroni nəve seminə surəy ki,Məkkədə nozil bıə və 11 qılə ayəku iborəte.vəhyi mıvəğğəti nozil nıbıey cərəyon.Xıdovəndi bə peyğombər(s)-i dınyo iyən axırətədə əto kardə lutfon bəyon kardey və çandə qılə muhimmə əxloği iyən iştimoyi fərmonon,mevzuonin ki,bın surədə çəvonku bəhs bıə.

Çın surə şə`nı-nuzul ya nozil bıey səbəbi həxədə İbn Əbbos jıqo votedə:ponzə ruj dəvarde və bə peyğombər(s)-i hiç qıləy vəhy nozil nıbe.mışrikon voteşone:çı Muhəmmədi(s) xıdo əvış vadoə və deəy deşmıne.ehanə rost votedə ki,əv çı Xıdovəndi tərəfikuye,bəpe vəhy de tərtibi,

Zuha  mıborəkə surə sıftədə həm əmə de dıqlə ğəssəmi dimbədim omeydəmon.ğəssəm bıbu bə nuri mənoədə bıə Zuha və ğəssəm bıbu bə zıməti mənoədə bıə Səca!.

Səca ruji sıftə və əvvəli mənoədəy,ə mevğıyyət ki,həşi bə osmoni barzə vırə omeydə və çəy nur bə həmmə vırə təsəllut pəydu kardedə və ın həyğət çı ruji həmməysə çokə mevğıyyəte.Səca əslədə “sukun iyən oroməti” mənoədəy  ki,şəvi zəmonədə hukmronəti kardedə və insoni bo ruji səy və təloşonro hozzı kardedə.çın nəzəku ım vey muhimmə neməte ki,loyığe deəy ğəssəm hardey bıbu.

Surə de ım dıqlə ğəssəməi hardey bə peyğombər(s)-i bəşorət doydə ki,Xıdo hiçvaxti tınış ıştənbəsə vadoəş ni.peşo bə peyğombər(s)-i dılvandi və təsəlli doydə ki,bızıno ehanə qahi vaxti çı vəhyi nozil bıey bə təxir eqıniyedəbe,bə məsləhəti əsose ki,Xıdo zıneydə və hiçvaxti bımi dəlil ni ki,bə deşmınon votey əsos,Xıdovənd bəy nisbətədə ğəzəbin bıə ya əy tərk kardeyış bıpyo, bəlkəm peyğombər(s) həmişə bə Xıdovəndi məxsusə lutf iyən inoyəton şomil bedə və hejo çı Xıdovəndi məxsusə himoyə jiyədəy.Xıdovənd bə ə həzrəti anədə baxş kardedə  ta əv rozi bıbu. əv,dınyoədə bəştə deşmınon səbarz bəbe və çəy vardə din qırd dınyo dəbəqəte iyən axırətədə həm əv bə vey yolə neməton şomil bəbe.min cumlə ə həzrəti de xatəmul-ənbiya və bəşəriyyəti aləmi rəhbər nomi çəy ıştə umməti həxədə bıə şəfoət ğəbul bəbe və əv vey rozi bəbe....