Osmoniyə surəon-283

Osmoniyə surəon-283

İnşirahi mıborəkə surə 4-ə şərifə ayə Xıdovəndi bə Peyğombər(s)-i əto kardə nemətonku qıləyni çəy nomi barz zikr kardeye.deməkə ki,islomi deşmınon bəçəy ələyh hiyləon və bədxahətiyonışon karde,əmmo ımruj çı həzrəte Muhəməd(s)-i nom,islomi iyən Ğıroni barzə sədo həmmə vırədə pevolo bedə.ısət Xıdo-Rəsul(s)-i nom çı Xıdo nomi kəno haruj sıb iyən şəvədə de muəzzinon vositə və əzoni zəmonədə kəşey bedə və çı Xıdovəndi tohid iyən vohidəti kəno bə ə həzrəti risoləti şəhodət doey,islomi nışonə və həmonə pokə ayini ğəbuli dəlile.

Peyğombəre-Əkrəm(s)-i omə rəsə qıləy rəvoyətədə çın ayə təfsirədə handedəmon:Cəbrəyili bəmı voteşe:Xıdovənde-Mutəal hamyedə:ıştı məğami əzəməti həxədə hejo ım vəse ki,çımı nom zikr kardə bıə zəmonədə,ıştı nom həm deçımı nomi bə ico kəşey bedə”.

İnşirahi mıborəkə surə oxonə ayəon ımi bəyon kardedə ki,har qıləy muhimmə ko bə oxo rosney bədiqə,bəpe de qıləy co ko həm məşğul bıbu.liza,tovsiyə bedə ki,bəpe qırd cəhdon bə Xıdovəndi səmt cəhət doey bıbu və bə Xıdo-Rəsuli(s) yod dənoydə ki,hiçvaxti ıştə səy və cəhdiku dast nıkəşo,dayima mıcohidət və səyko və qırd bın holonədə bəştə pərvərdıqori dığğətko,çəy roziyəti dumo bıbu və bəçəy ğorbi səmt hərkətko....

Tini mıborəkə surə Kərimə-Ğıroni nəve pencminə surəy ki,Məkkədə nozil bıə və 8 qılə ayəku iborəte.ın surə bə insoni dəğiğ iyən reçinə xılğəti mehvər və dayirə ,çəy təkamul iyən inhitot və suğuti mərhələon devrə jeydə ki,ın mevzu de məno pur bıə ğəssəmon çı surə sıftədə bəyon bıə və çı insoni nicot iyən səbarzəti amilon bəyon kardey bədiqə,oxoyədə bə miadi məsələ təkid kardedə və çı Xıdovəndi mıtləğə hakimiyyəti işorə kardedə.çın surə nom surə sıftənə ayəonku peqətə bıə və inci mənoədəy.

Peyğombəre-Əkrəm(s) Məkkədə bə risoləti məbus bıə zəmonədə,Xıdo ğanun və təlimotonış bə həmmə kəson elonış karde və millətiku tələbış karde ki,bəştə həvaye-nəfsi iyən botılə ayinon tabe bıeyku dast bıkəşon və fəğət bə Xıdo dini tabe bıbon və pemandon.əmmo,Məkkə mışrikon bə peyğombər(s)-i sıxanon dığğət nıkardeşone və bəştə botıl iyən inhirofə roşon dəvom doe.jıqo qıləy şəroyitədə Tini  mıborəkə surə enovniye be və bə Xıdo dini barzəti və bəy pemandey əhəmiyyəti işorə kardedə və çəyku dim qordınə de insoniyə ağl iyən fitrəti mıxolifət kardey dəlili mızəmmət kardedə.......

“Ğəssəm bə tin iyən zeytuni və ğəssəm Turi Sini və ğəssəm bə ım əmnə şəhri”.(1-3).

Tin(İnci) və Zeytun dıqlə foydənin iyən şifobaxş kardə miyvəonin ki,ziyodə xorəki və damoniyə xısusiyyətış heste. İnci bənə vəhışti miyvəonku qıləyni zınye bıə və Kərimə-Ğıronədə Zeytuni do bənə “Şəcərəye-Mıborəkə” yəni mıborkə do nomi ğeyd bıə.kali mıfəssıron ım ğəssəmonışon bə ilahi dinon bə əməl omə sərzəminon dığğət kardey mənoədə zınəşone.həzrəte Nuh(ə) risoləti vırə qıləy bandı-ku vırə be ki,əyo ziyodə inci doon bıən.həzrəte İbreym(ə)-i besdəti məkon və vırə həm qıləy bandı-ku vırə be ki,de ziyodə zeytuni boğon pur be ki,Beytul-Mığəddəsi şəhr çəy dovnədə ğərolış qətəbe və həmçinin bə Turi-Sina işorə bıə ki,həzrəte Mosə(ə) əyo bə peyğombərəti məğami vıjniyə bıə və nəhoyətən bə əmnə şəhri bıə Məkkə şəhri ki,islomi peyğombər(s) əyo məbus bıə və bə peyğombərəti vıjniyə be.Xıdovənde-Aləm bə ın məkanon ğəssəmış hardə ta nışon bıdo de bənə Nuh(ə),İbreym(ə),Mosə(ə) iyən Muhəmməd(s)-i bıə yolə peyğombəron vığandey,ıştə dinış qırd məkon iyən zəmononədə bə insononış rosnə və dini-islom ilahi şəryəti komil və bə təkamuli halğə rəsə oxonə dine.

Xıdovənde-Xalığ Tini mıborəkə surədə oxoyədə de ın ğəssəmon hamyedə ki,əmə insonımon vey çokə şikil və formaədə ofəyəmone.”Təğvim” qıləy çi bə mınosibə surət,metədilə nizom iyən ləyoğətinə keyfiyyəti vardey mənoədəy mın məfhumi hevujəti bımi işorə kardedə ki,Xıdovənde-Aləm insonış har qıləy nəzəku mınəzzəm vıə loyığinə formadə ofəyəşe.həm cismi nəzəku və həmən rufi iyən ağli nəzəku mukəmməl.çıro ki,çəy vucudədə harcurnə istedodış ğərol doə ta əv çı kəmoli roy bızıno və bə royədə həm hərəkətko və peyğombəron həm bo ağli hidoyəti təğviyyət və zumand kardey xoto,məbus və vıjniyə bıən....