Osmoniyə surəon-290

Osmoniyə surəon-290

Zilzali mıborəkə surə Kərimə-Ğıroni nəve nəvminə surəy,Mədinədə nozil bıə və bənə Bəyyinə mıborəkə surə 8 qılə ayəku iborəte.Zilzal çın mıborəkə surə həməysə məruf iyən məşhurə nome.bın mıborəkə surədə bə zəmini ğıyoməti ruji vəhşətnokə larzemon iyən fırsemoni hodisə işorə kardedə.ım nuktə Kərimə-Ğıronədə de coqlə kəlməon bə ico şəş kərə oko doey bıə.

Zilzali mıborəkə surə kulliyə fromaədə seqlə mehvər və dayirə ətrofədə qardedə.bənə zəmini şiddətinə formadə bıə ğıyoməti ruji hodisə nışonəonku bəhs kardedə və çəy dumo həm çı zəmini  bə Odəmi qırd əməlon şəhodət doey və şoydəti kardey,seminə baxşədə həm milləti bə dıqlə çokə ko soyb iyən yabvə ko soybon dastəş təğsım kardə və hakəsi bəştə əməlon cəzo rəseyku bəhs kardedə....

Zilzali mıborəkə surə həmməysə muhimmə bəhsonku qıləyni,bə dınyo oxoyədə ğıyoməti ruji sıftədə bıə buməlarzə və zəlzələ hodisəy.bın ruji zəmin de şiddəti bəlarze və bın ruji insonon bə jıqo yolə hodisə xoto,çı heyrət və təəccıbi dılədə bəbeyn.zəmin,xəzinəon,mədən və mineriyal maddəon iyən ov bıə maddəon ıştə daxiliku xaric bəkarde.bə ziyodə mıfəssır iyən təfsirəvonon nəzə əsos-bə ğıyoməti ruji şiddətinə larzə hodisə xoto,zəmin ıştə dılədə bıə qonə bo və şələon bə bi bebəkarde-nımunə,dıjdə insonon dastəy ki,çı ğəbon dıləku xaric bəbeyn.həmonə ruji inson torıxədə nıbə çın səhnə vindeyku bə təəccıb dəbəşe,de şiddəti bətarse,çın hodisəon bə əməl omey illət və səbəbi dəbəparse və bəvote:çiç bıə ki,zəmin jələvoni larzedə və ıştə dılədə bıə çiyon bə bi bekardedə?

Bə Zilzali mıborəkə surə ayəon əsos,zəmin həmonə ruji ıştə qırd xəbəonku qəp bəje və çı zəmini səyfədə vağe bıə həmmə çokətiyon,bevəcətiyon və xey və yavə əməlon həmmə bərməlo və oşko bəkarde.həyğətədə,həmonə ruji çı insoni əməlon şoydəti həmməysə muhimmə qıləyni,həmonə zəmine ki,əmə ıştə əməlon çəy səpe bə vırə rosnedəmon və zəmin bəçəmə qırd kardə əməlon şoyde.peyğombər(s)-iku qıləy hədisədə rəsə omə:”aya zıneydon iyo çı əxbar və xəbəonku məğsəd çiçe? Voteşone:Xıdo iyən çəy Rəsul bəzıne. hamyeşe:məğsəd ıme ki,zəmin ıştə səpe bıəə çı merd iyən jenon əməlon ku xəbə bədoe, bəvote:fılon şəxs fılon ruji fılon koş vinde,ıme çı zəmini xəbə doey......

Ğıyoməti ruji bə insonon dəğyğə şikilədə hisob-kitobi həyğəti işorə,çı Zilzali mıborəkə surə coqləyni bəhs və məbhəsonkuye.ım məzmun Nisa,Yunis,Ənbiya və loğmani mıborəkə surədə həm omə.Zilzali mıborəkə surə həyğətədə ın nuktə bə yod dənoydə ki,inson ğıyoməti ruji omey bənav,bəpe əmə de çokə əməlon,bə ğıyoməti ruji səhnə varid bıbəmon.

Zilzali mıborəkə surə 8-ə ayədə handedəmon:”və hakəs həm qıləy zərrə vəznədə ko bıko,əy bəvinde”.zərrə iyo həmməysə kamə vəzne.zohirən ın ayəon həm bə əməlon təcəssım məsələ ijən təkid kardedə və əməli ıştən mışohidə ısət çı çok bıbu ya bəd,ğıyoməti ruje.ayə bəy işorə kardedə ki,hətto ehanə çı darzəni tıki qədər həm qıləy çok ya bevəcə ko bə əməl boy,çəy soybi mığobilədə mucəssəm və təcsim bəbe və əvon əy mışohdiə bəkardeyn və de xeyə ko soybon həmnişin bıey bə şoyvonəti iyən deştə qıno səhnə vindey,bəçəy renc iyən bəlo boyis bəbe....   

De qıləy co iborəti ım təbiron nışon doydə ki,ilahi ədolətinə dərqoyədə və həmonə yolə hisobi ruji,həmməysə hırd və qədə koon həm nııvıştey bəbe və çəşnavi doydə ki,millət nə qədə qınon be əhəmiyyətə hisobkon və nə qədə xeyə koon.qıləy çi ki,ilahi hisob və mıhosibəku dəbəvarde, harçənd həm kam əhəmiyyət həm bıbu.bəçəy xoto,Zilzali mıborəkə surə dığğət doydə ki, insonon ğıyoməti ruji deştə əməlon dimbədim bomeyn və bəçəvon yod dənoydə ki,əvon ıştə əməl və rəftoronku mığət və hodi bıbon.