Osmoniyə surəon-293

Osmoniyə surəon-293

Adiyati mıborəkə surə 6-ə şərifə ayədə hamyedə:”yəğınən inson ıştə pərvərdıqori mığobilədə vey noşukr və pəxıle”.

Im çı insoni xıslətonku qıləyniye ki,bəçəy xoto de ğəssəmi zikr bıə.Kərimə-Ğıronədə Xıdovənde-Xalığ çandə kərə çı insoni noşukrəti və nunkuətiku ıştə noroziyətiş elon kardə ki,iztiror iyən saxtə zəmonədə,Xıdo ıştə dıli nığliku və dıləsoxt vanq jeydə.əmmo,həmonə təhlukə iyən muşkil həll bıey bədiqə ijən Xıdoku ğafil beydə və çəy zikri ıştə viro bekardedə.qıləy inson ki,tərbiyəş vindəni və ilahi mərıfəti nuriku qıləy bəhrəş bardəni,bəştə şəhvəton tabe və təslim beydə  və tuğyongərəti kardedə.jıqo qıləy fərd pəxıləti kardedə və noşukrəti kardedə.odəmi dığəəti cəlb kardə çi ıme ki,əv ıştən çın mənoku xəbədo iyən bəştə nəfsi nsibətədə aqahe.ehanə əv ıştə daxili sıfəton çı hakəsiku həm punhonku,həni Xıdovənd və ıştə vijdoniku məxfi iyən punhon kardey nibəzıne.həyğətədə,çı bəşəri veyə bəlo,ofot iyən bədbəxtiyon rəğ-rişə çəy həmonə noşukrətiyədəy və nəhoyətən əv bə uxrəvi əzobi dıço bəbe.əv çı əmniyyət və hərəbaxtəti əvəzi,boştə şər və noəmnəti hozzı kardedə.liza əv fəğət ıştəni bəpe mızəmmətko bəm bəştə sə-sıxanko.

İnsoni bə dınyo moli qıləy şiddətinə məhəbbət və rəğbətış heste.çəy bə dınyo mol iyən sərvəti bıə həmonə ifroti iyən şiddətinə rəğbət,bəçəy pəxıləti,nunkuəti iyən kufri boyis bedə.

Adiyati mıborəkə surə 8-ə şərifə ayə de xeyri kəlmə bə moli itlağ iyən şomil kardey,dığğət doydə ki,mol iyən sərvət ıştən qıləy bevəcə çi ni və bə çandə nev xeyə koon vositə bıey bəzıne. əmmo, noşukr iyən pəxılə inson çı mol-devlətiku səhihə royədə istifodə kardedəni və çəyku boştə ləzzət və xudxahəti royədə oko doydə....

Kərimə-Ğıroni nəzəku ikəs ki,nunkuyəti kardedə,bə əzob iyən cəhəndımi loyığe.bə həmonə dəlili xoto,ayə dəparsedə:aya ım noşukr,pəxıl iyən dınyopərəstə inson zıneydəni ğıyoməti ruji ğəbədə bıə həmmə insonon bəyji iyən rost kardey bəbeyn? və çəvon sinəonədə bıə çiyon (kufr, imon,ixlos,riyo,nunkuəti,xey və şərə niyyəton)oşko bəbe? həmonə ruji şımə pərvərdıqor şımə niyyət və əməlonku komilə surətədə xəbədoe və bəçəvon kardə koon mıtobiğ cəzo bədoe. Xıdovənde-Xalığ hejo və ha holədə çı insoni daxili iyən xarici sırronku aqahe.əmmo,çın aqahəti təsir ğıyoməti ruji çı mıkofat iyən cəzo zəmonədə oşko və məlum bəbe.ım bə həmmə insonon qıləy çəşnavi və xəbərdorətiye ki,ehanə əvon həyğətən bə Xıdovəndi elm iyən aqahəti imonışon bıbu,ıştə iyən ıştə qınoon miyono qıləy ğoymə sədd icod bəkardeyn.....

Ğariyə mıborəkə surə Kərimə-Ğıroni sa iminə surəy.ın surə peyğombər(s)-i hicrəti bənav Məkkədə nozil bıə və 11 qılə ayəu iborəte.

Ğariyə ekkuye və hırd kardey mənoədəy və bın surədə çəyku məğsəd həm,ğıyoməti ruje ki, həmmə osmoni kurəon iyən hestemoni dınyo bəyənde ekkuye və viron bəbeyn və qıləy co dınyo bə əməl bome.

Ğariyə mıborəkə surə kulliyə surətədə çı miad iyən çəy mığəddiməku sıxcan votedə və peşo de oşko iyən məlumə təbiron insonon bə dıqlə dastə təğsım kardedə: ilahi ədolətinə məhkəmə tavzoədə çəvon əməlon sanqin bıə kəson dastə ki,çəvon mıkofot həmonə dınyo jimonədə de asyişi pure və əvon de Xıdovəndi  rəhməti hamusəyn.coqləyni dastə əvonin ki,tavzoədə çəvon çokə əməlon kame   və əvoni tatə otəş iyən vəş qətə cəhəndım çəş kardedə.