Osmoniyə surəon-296

Osmoniyə surəon-296

Təkasur “kəsrəti” maddəkuye və çı sərvəti ziyod kardeyədə rəğobət iyən fəxr kardey mənoədəy. çı təfaxur iyən təkasuri əsliyə amilonku qıləyni,bə ilahi cəzo  və mıkofoti iyən miadi imon nıbey, cəhl iyən nodonətiye.çımisə əlovə insoni bəştə zəyifəti iyən zərəl ğəbul kardey bıə cəholət və həmçinin çəy ıştə bə əməl omeyku iyən ıştə ağıbətiku xəbəş nıbey,çın kibr və məğrurəti amilonkuye.bə həmonə dəlili xoto,Məcidə-Ğıron  bo ın təfaxuri darıştey xoto,navkonə ğovm və etnoson sərquzəşton mıxtəlifə ayəonədə bəhs kardedə və bə yod dənoydə ki,çokonə həmonə ğovmon deştə ziyodə ğudrət və imkonaton,de qıləy sodə metodi bənə qıləy tufoni, avəğurrə, buməlarzə icod kardey və ya de ovəyz vardə voşon voye məhf bin və çı miyoniku şiin.çın fəxr kardey coqləyni amil,həmonə məğlubiyyəton zəyfəti iyən həğorəti hisse və əvon boəy puşnero  bə iftixor iyən fəxr kardey soyəx şedən.liza,İmom Sadığ(ə)-iku qıləy hədisədə omə:”hiçkəs təkəbbır iyən fəxr kardeydəni illa bə qıləy zılləti xotoye ki,ıştə nəfsədə vindedə”.liza,fərdon çoko ki,hiss kardedən bə kəmoli həddi rəsən,həni bə fəxr və təfaxuri ehtiyoci vindedənin.....

Yəğın çı şəkki mığobilədə bıə noxtəy.çokoki,elm çı cəhli mığobil noxtəy və çı qıləy çi vazeh və subut bıey mənoədəy.mənbəonədə bə imoni ali və barzə mərhələ yəğın votey bedə.hədisonədə çı yəğıni həyğət bə Xıdo təvəkkul kardey,çəy pokə zoti mığobilədə təslim bıey,bəçəy ğəzo və ğədəri rozi bıey və ıştə qırd koon bə Xıdovəndi ehdə noey zıney bıə.

I dastə odəmon bə Peyğombəre-Əkrəmi(s) ərzışon karde:”əmə məsəmone ki,həzrəte İsa(ə)-i kali yaro-yavəron çı ovi sape pıyodəbin?həzrəti hamyeşe:”ehanə çəvon yəğın çəysə həmvey ğoym bıəbe,əvon bə həvo həm əşin”.

Mərhum Əllomə Təbotəbayi ın hədisi zikr kardey bəpeştə,əlovə kardedə:”həmmə çi bə Subhonə Xıdovəndi yəğıni məhvəri əsose və istiğloliku təkvini dınyo səbəbon məhf kardey təsirədə qardıdə.binobərin çanədə bə ilahi mıtğləğə ğudrəti etığod iyən imon vey ziyod bıbu,dınyo əşyo həmonə nisbətədə çəy mığobilədə muti bəbe və ım xılğəti aləmədə çı yəğıni de xariğul-addə təsərrufi rabitə rəmze”.

Təkasuri mıborəkə surə oxonə ayədə omə ki,beşək şımə həmmə ğıyoməti ruji çı nemətonku sıvol-cəvob bəbiyon.bəpe həmonə ruji şımə məlumkon ki,Xıdo doə ın neməton kon royədə və konco məsrəfon karde?......

Əsri mıborəkə surə Kərimə-Ğıroni sa seminə surəy,Hicrəti bənav nozil bıə 3 qılə ayəku iborəte. ın surə qıləy həddədə komil və har tərəfine ki,bəzi mıfəssır və təfsirəvonon çı Kərimə-Ğıroni qırd elm iyən məğsədonışon bın surədə xulosə kardəşone.

In surə de bə Əsri ğəssəm hardey bino bedə,çəy əzəmət iyən məğəddəsəti cəhəton həm bəyon kardedə və həmçinin insonon bə ın mıborəkə zəmoni dığğət kardey tələb kardedə və çəy bərəkətonku bəhrə bardey xoto,fırsəti ğənimət bızınon.

Əsri kəlmə mıtləğə formaədə zəmoni və çı bəşəri torıxi devron və ya zəmoniku i ibaxşi mənoədə oko doey bıə.liza,çın ğəssəmi təfsirədə kali mıfəssıron bə bəşəriyyəti qırd zəmon və torıxi işorə kardeyışon zınə ki,de oğoəkə və ibrətamizə hodisəon pure və coqləyniyon həm əsriku mənzur və məğsəd Xıdo-Rəsuli(s) zuhuri əsrışon zınə ki,islomi əsri zəmon bə bəşəri camiyə ufuği səmt peme  və ın vaxt həxı bə bıtıli ğələbə və zuhuri zəmone.....