Osmoniyə surəon-297

Osmoniyə surəon-297

Əsri mıborəkə surə Kərimə-Ğıroni sa seminə surəy,Hicrəti bənav nozil bıə 3 qılə ayəku iborəte. ın surə qıləy həddədə komil və har tərəfine ki,bəzi mıfəssır və təfsirəvonon çı Kərimə-Ğıroni qırd elm iyən məğsədonışon bın surədə xulosə kardəşone.

In surə de bə Əsri ğəssəm hardey bino bedə,çəy əzəmət iyən məğəddəsəti cəhəton həm bəyon kardedə və həmçinin insonon bə ın mıborəkə zəmoni dığğət kardey tələb kardedə və çəy bərəkətonku bəhrə bardey xoto,fırsəti ğənimət bızınon.

Əsri kəlmə mıtləğə formaədə zəmoni və çı bəşəri torıxi devron və ya zəmoniku i ibaxşi mənoədə oko doey bıə.liza,çın ğəssəmi təfsirədə kali mıfəssıron bə bəşəriyyəti qırd zəmon və torıxi işorə kardeyışon zınə ki,de oğoəkə və ibrətamizə hodisəon pure və coqləyniyon həm əsriku mənzur və məğsəd Xıdo-Rəsuli(s) zuhuri əsrışon zınə ki,islomi əsri zəmon bə bəşəri camiyə ufuği səmt peme  və ın vaxt həxı bə bıtıli ğələbə və zuhuri zəmone.....

“Yəğınən həmmə insonon ziyonədən”(2).

İnsonon ıştə vucudi sərmoyəon ısət çı bıpyişone ya nıpyişone,çı dasto doydən və çəvon umri ləzəon,rujon,manqon iyən soron de surəti dəvardedə.çı odəmi maddi ğıvvon bə kam bedə və çəy zu iyən ğudrətiku bə kam bedə.çoko ki,iqlə dıl və ğəlbi bo jıeyo qıləy mıəyyənə ğudrətış heste və çoko ki,həmonə ğudrət bə oxo rəseydə,həmonə ğəlb həni mandedə və ko kardedəni.hətto hiç qıləy noxəşəti iyən səbəb nıbə holədə.çı insoni vucudi co dastqo və aparaton və çəy mıxtəlifə sərmoyə iyən istedodon həm jıləvoniye.

Islomi dınyo vindemonədə dınyo bənə qıləy çı bıdə-bıstən və ticorəti vıjore.İmom Hadi(ə) hamyedə:”dınyo qıləy vıjore ki,idastə əyo mənfəət kardedə və coqləyni dastə həm ziyon vindedə”.

Inson bəştə tuğyongərə ğərizə və şəhvəton malik bıey xoto,bın dıjdə vıjorədə çı ziyon iyən suğuti mə`rəzədəy.illa ki,iqlə dastə və əvon ki,imonışon vardə,salehə əməl əncom doydən  iyən iyənde bə həx,səbr və istiğaməti səmt tovsiyə kardedən....

Kərimə-Ğıroni yolə mıfəssır iyən təfsirəvon seyd Məhəmməd Huseyn Təbatəbayi bın barədə jıqo hamyedə:”inson hejo bəyji bıə qıləy mevcude və çəy jimon de mardey bə oxo rəseydəni.çəy mardey həyğətədə çı qıləy kəyku bə coqlə kə intiğal  və ovaşteye.çı insoni dayimiyə jimoni i hissə həmonə dınyo jimone.qıləy həyot və jimon ki,çı imtovoni vırəy və tale həll kardedə. həmonə dınyo jimonədə çəy jimoni coqlə ğısməti tale yəni axırəti ruji həyot mıəyyən bedə.əvon ki,həmonə axırəti jimonədə bə hərəbaxtəti rəseydən və ya bədbəxt beydən,ıştə baxtəvərəti iyən siyubəxtətişon bın dınyoədə hozzışon kardə.odəmi sərmoyə çəy jimone.inson deştə jimoni sərmoyə vositə ıştə axırəti jimoni eyşo-işrəti kəsb kardedə.ehanə inson ıştə əğedə və əmələdə, bə həxı tabe bıbu pemando,çəy bıdə-bıstən və ticorət səmərənin,çəy kəsb bərəkətin bəbe və ayəndədə həm çı şərriku əmonədə bəmande.əmmo,əgər əv bə botıli pemando və bə Xıdo imon nıvo iyən salehə əməl bə vırə nırosno,çəy savdı və ticorət de zərəli obərəxe.əv nəyinki,ıştə umri sərmoyəku hiç qıləy sərmoyə bə dast nibəvarde,bəlkəm ım sərmoyə bəçəy bədbəxtəti boyis bəbe və axırətədə həm çəy xəyriku məhrum bəmande.liza,əsri mıborkə surə insoni bə ın məsələ dığğət doydə”.....

Əsri mıborəkə surə seminə şərifə ayədə qıləy bərnomə nışon doydə ki,inson de əy bə vırə rosney çı zərəlo-ziyoniku ozod bedə.sıftədə çı imoni əsl və prinsipiku bəhs kardedə ki,ım həm çı insoni həmmə fəoliyyəton əsosi təşkil doydə.çıro ki,insoni əməlon de əğedə və əməlon ovəynə və buruz pəydu kardə vırəy.bə həmonə dəlili xoto,qırd ilahi ənbiya və peyğombəron harçiku bənav deştə umməton əğedə əsoson islohi koy məşğul bedəbin və məxsusən de şırki mıborizə bardeəbin ki,çı çandə nevə rəziləton,bədbəxtiyon iyən pərokəndəgi sərçeşməy.

In kərimə ayə peşo salehə əməlon çı nicot iyən perəxey zamin elon kardedə.salihat həmonə ləyoğətinə əməlon nin ki,fəğət ibodət,infoğ,cihod və elm kəsb kardeyku iborəte.bəlkəm,har qıləy zəminədə bə insoni camiyə perəsey,təkamul,əxloğ iyən ozavziye boyis bıə har qıləy çokə əməli şomil bedə.

İmon iyən salehə əməlon hejo və dayimi surətədə bıbu və həmməkəs bəpe iyande bə həx, mərıfət,səbr  iyən isytiğaməti səmt dəvət kardedən.iyande bə həx iyən səbri dəvət və sıfarış kardey,çı insoni qıləy bərnoməku ğərol doydə ta inson çı fəsod iyən ziyoniku əmonədə bımando və bə kəmol iyən insoniyyəti barzə noxtə bırəso...