Osmoniyə surəon-298
Osmoniyə surəon-298
Osmoniyə surəon-298
Huməzə mıborəkə surə Kərimə-Ğıroni sa çominə surəy,Məkkədəd enovniyə bıə və 9 qılə ayəku iborəte.ın surə çə kəsonku sıxan votedə ki,ıştə qırd səy və cəhdi bo mol-devlət cəm kardey xoto sərf kardedən və ıştə vucudi həmmə erjon bəvədə xulosə kardedən.peşo,bə sərvətiku dastışon təy bıə kəson nisbətədə çəvon de həğorəti çəşi nəzə kardey iyən bəvon istehzo kardeyku sıxan votedə. Odəmon aybi dumo nəbe və qıləy irod qətey,sıxançinəti iyən çoğoləti kardə kəson iyən məsxərə əkəyon və çı mənfəəti dumo bıə sərvətinə odəmon,min cumlə fərdonin ki,surə bəvon xitob kardedə .ımon ə kəsonin ki,əvoni qıləy dardnok və ğəmqinə tale çəş kardedə və əvon de təhğıramizə formə bə cəhəndım şodey bəbeyn.joqo ki,cəhəndımi vəş qətə otəş harçisə bənav bəçəvon ğəlb və dılon musəllət bəbe və çəvon ruf iyən coni bə otəşi səmt bəşıkırne.
Kali mıfəssıron jıqo hisob kardedən ki,ın surə çı Vəlid bin Muğəyrə barədəy ki,hejo çı Peyğombəre-Əkrəmi(s) dumo ğeybət kardedəbe və ə həzrəti vindeyədə həm bəy ləğ-ləğə iyən istehzo kardedəbe. Bəziyon həm əy bənə Əxnəs bin Şəriğ,Uməyyə bin Xələf və As ibn Vayili bıə çı kali kin-kudurətin,məşhur iyən yolə mışrikon barədə zıneydən.əmmo,bəpe dığğət kardey bıbu ki,ım məsələ bə qırd ım sıfəton malik bıə həmmə kəson şomil beydə. “Vay bıbu bə har qıləy aybon bə miyon bekardə kəsi!əv ki,molış cəm kardə və əy aşmardedə. qımon kardedə ki,çəy mol əy əbədi obəqəte”.(1-3)....... Huməzə “Həmzi” maddəku əslədə darıştey mənoədəy və çun aybi bə miyon bekardə və ğeybət kardə kəson çı cokəson şəxsiyyəti darışteydən,əve bəvon huməzə şomil beydə. Luməzə həm ğeybət kardey iyən aybi dumo nəvey mənoədəy.bə kaliyon əğedə əsos,ın ayə bə cokəson ğeybəti kardə və de sıxançinəti iyən xəbərçinəti kardey çı milləti miyono kin-kudurət,deşmınəti iyən həsədi donə kaştə kəson çəşnavi və xəbərdorəti doydə.əvon ki,deştə tijətıki iyən deştə çəş və mijə çı fərdon peştono hərəkəton əncom doydən,çəvon ğeybəti kardedən və bəvon istehzo kardedən.......
Bə ın surə ayəon əsos,çı sərvət iyən mol-devləti qırdə kardey ofot iyən xətəronku qıləyni, cokəson təhğır kardeye.çən,ehanə ikəs ki,ziyodə sərvətış heste,bəpe bə dınyo moli məftun nıbu və deştə mol və sərvəti məğrur nıbu. Camaati aybon dumo nəve və çəvon abru bardey,qıləy rəzilətinə əxloğe ki,Kərimə-Ğıron de mıxtəlif nev təbiron əvış nəhy kardə və ın koş mızəmmət kardə.çı insoni fik iyən əməl ısət çı çok ya bevəcə inson bıbu,həm bəçəy ıştəni və həmən vey vaxti bə cokəson ziyodə təsir noydə. odəmon aybi bə miyon bekardey həm,bənə qıləy əxloği noxəşəti həm bə həmonə fərdi ıştəni və həmən bə cokəson mənfi iyən bevəcə təsiron noydə.min cumlə çəy yavə nəticəonku çı cokəson aybi bə miyon bekardey rısvoyətiye.Xıdovəndi palu çı mumini abru vey erjin iyən mehtərəme və Əv icozə doydəni ki,çəy bandəon heysiyyət və şəxsiyyət de co pəxıl iyən bədəzıvonə fərdon vositə jiyədə lınqon bımando.liza,bəsə uxrəvi cəzosə əlovə,həmonə bın dınyoədə həm milləti aybon bə miyon bekardə kəson rısvo bəkarde.İmom Sadığ(ə) Xıdo-Rəsuliku(s) nəğl kardedə: ”Muminon fırsiyə koonədə aybi dumo məbənən.zira,hakəs ki,ıştə bıvə səhfon dumo bınəvo, Xıdovənd çəy pefıskiye təğib bəkarde və hakəs ki,Xıdovənd çəy fırsiyeon təğibko,əv rısvo bəbe,harçənd ıştə kəy dələdə həm bıbu”.....
