Osmoniyə surəon-306

Osmoniyə surəon-306

Kafirun mıborəkə surə Kovsəri mıborəkə surə bəpeştə ğərolış qətə və çı Kərimə-Ğıronisa nəvminə surəy.ın surə Məkkədə nozil bıə və 6 qılə ayəku iborəte.

Kafirun mıborəkə surə qıləy zəmonədə nozil be ki,mıslılmınon kamə cəmyətışon hestebe,kofiron əksəriyyət bin və peyğombər(s) çəvon tərəfiku bə təzyiğ iyən əzob-əziyyəton məruz mandəbin. Mışrikon isror kardedəbin ki,peyğombər(s) məcbur bıbu ta çəvon dıli piyə çiyon ğəbulko.əmmo, peyğombər(s) çəvon ım təklifış ğəbul nıkarde və əvonış kulliyə formaədə məyusış karde.

Ğureyşi mışrikon yolonku idastə bənə Vəlid ibn Muğəyrə,As ibn Vayil və Haris ibn Ğeysi voteşe: ha Muhəmməd ha! tı boy bəçəmə din iyən ayini pemand və tabe bıbi.əmə həm bəştı din iyən ayini tabe bəbemon və əmə tıni ıştə qırd imtiyozonədə şərik ğərol bədomon.i sor tı bəçəmə xıdoon ibodətkə və isor həm əmə ıştı Xıdo pərəstış bəkardemon.

Peyğombər(s) hamyedə:bə Xıdo pənoh ki,mı qıləy co çi çəy həmto və şərik ğərol bıdom.əvon voteşone:hiç nıbu tı çəmə kali xıdoon ləmskə və əvoni təbərrıkkə.çımi mığobilədə əmə həm tıni təsdığ bəkardemon və ıştı Xıdo pərəstış bəkamon.bın zəmon Kafirun mıborəkə surə enovniye bevə.peşo Rəsulullah(s) bə Məscidul-Həram ome.qıləy holədə ki,Ğureyşi mışrikon yolonku idastə əyo cəm bıəbin.peyğombər(s) ın surəş de tosə oxo handeşe.əvon çoko ki,ın surəşon məse,komilə surətədə noumu və məysu bin və binoşon karde bə peyğombər(s) iyən bə ə həzrəti əshobon əzob-əziyyət karde.

“Vuji:ha kofiron ha!mı şımə pərəstış kardə çi ibodət kardedənim.və şımə həm çımı pərəstış kardə çiyon pərəstış kardedəniyon və nə az şımə pərəstış kardə çiyon pərəstış bəkardem və nə şımə çımı pərəstış kardə çiyon pərəstış bəkayon.(ısət ki,jıqoe)şımə ayin bovə çımı din (həm) bomıye”.....

Bın surədə çı mışrikon ibdoət iyən pərəstış kardə çiyonku bezo bıey və bə diyəro mandey,tikror bıə ta de ruşinə formə tohidi xət çı şırki xəttiku co bıbu və mışrikon çı mısılmınon təslim bıeyku noumu və məyus bıbon.Peyğombər(s)-i  mənzur və məğsədış ım be ki,Ğureyş bızıno ki, mısılmınon hiçvaxti bə şırk iyən bıtpərəstəti səmt dim nibəqəteyn və mışrikon həm bəştə inodkorəti iyən bəştə dədə-bobon kur-kuronə şikilədə təğlıd kardey xoto,həmçinin bəçəvon bıtprəstətiku bə dast omə mənfəəton xoto,bo həmonə şırki ayini tərk kardey iyən bo Xıdopərəstəti dini ğəbul kardey hozzı nibəbeyn.

Həyğətədə,Peyğombər(s) çı tohidi de şırki miyono saziş iyən aşti kardey ğeyri-mumkin zıneydə və ijən bıtpərəston de mısılmınon saziş basteyku məyus kardey xoto,təkid kardedən ki,” və nə mı hiçvaxti şımə pərəstış kardə çiyon pərəstış kardedənim və nə şımə çımı pərəstış kardə çiyon pərəstış kardeedon”.

Kərimə-Ğıroni istilohədə şırkiku murad və məğsəd  bo Xıdovənde-Aləmi qıləy şərik,misl iyən həmto ğərol doeye və çun tohidi dini tərəfdoron çı şırkiku dimışon qordınə və bo Xalığ,hikməti soyb iyən tədbirəkə Xıdo hiç qıləy misl və həmto şərik ğərol doydənin,əve əvon şırki qıləy yolə zəlolət hisob kardedən ki,əy baxşey həm mumkin ni.....