Osmoniyə surəon-310

Osmoniyə surəon-310

Məsədi mıborəkə surə ki,təğribən peyğombər(s)-i oşkoə dəvəti sıftənə soronədə nozil be və fəğət bın surədə bə zəmon islomi peyğombəri(s) deşımınonku qıləyni yəni bə əbu ləhəbi qıləy şiddətinə həmləy.çın surə mehtəvo iyən məzmun nışon doydə ki,əbu ləhəbi de peyğombər(s)-i məxsusə deşımınəti kardedəbe.əbu ləhəb iyən çəy jimoni həmro  bə peyğombəri(s) vey əziyyət kardedəbin.nəğl bıə qıləy ruj ki,peyğombər(s) bə Səfa bandı-ku şe və vanqış je:qıləy muhimmə xəbəm heste.çoko ki,Məkkə millət ım sədoşon məse,voteşone:kiye jıqo fəryod jeydə? voteşone: Muhəmməd.cəmyət bə ə həzrəti soyəx şin.

Ə həzrəti hamyeşe:bəmı bıvotən ehanə bəşmə qıləy xəbə bıdəm ki,ımruj əsri zəmonədə ya maşki sıbi vaxti çı deşmıni suvariyon çın bandi kənoku bəşmə həmlə bəkardeyn,aya şımə çımı sıxanon təsdığ bəkardiyon?voteşone:əmə hiçvaxti ıştıku duyə sıxanımon məsəmon ni. hamyeşe:mı şıməni de qıləy şiddətinə əzobi(bə bıton pərəstış kardey xoto) inzar kardedəm.(tars doydəm).əbu ləhəbi voteşe:ehanə mı ıştı ayni ğəbulkom,çımı bə co mısılmınon bıə nisbətım çokonə bəbe? Xıdo-Rəsul(s) hamyeşe:əgər tı çımi dini ğəbulkoş,tı həm bənə coqlə mısılmononku qıləyni və bənə qıləy mısımonə fərdi bəbeyş və həni co qıləy imtiyozı nibəbe.zira,çımı vardə din çı bıvəti iyən bərobərəti dine.bın dinədə qırd mısılmınon iqlə cərqədə və i formədən.əbu-ləhəb Xıdo-Rəsul(s) ın sıxanon məsey bədiqə vey norohət və ğeyzin be və de yavə sıxanon bə ico voteşe:tı həlok və məhf bıbuş vədeştə vardə joqo dini.

Məsədi mıborəkə surə çı əbu ləhəbi ım yavə sıxanon mığobilədə nozil be və çəy sıxanış bəçəy ıştəni oqordınışe və hamyeşe:çı əbu ləhəbi daston bırniyə bıbu və maq bıbu boəy.

Əbu ləhəb dayima bənə qıləy soğnə çı peyğombər(s)-i dumo şeydəbe.həzrət qıləy ğəbilə bə islomi səmt dəvət kardə zəmonədə,bilafosilə əbu ləhəb bə islomi zidd sıxanon bino kardedəbe və votedəbe:əv şıməku tələb kardedə lat iyən uzza bıton bə kəno bınənən.əv dılış heste şımə ıştə ro qimkon.məbodə şımə bəçəy sıxanon quş bıdənən.əbu ləhəb hiçvaxti de Xıdo-Rəsul(s)-i mıxolifət kardeyku dastış nıkəşe və ıştə dasto omə har qıləy pojənətiş əncom doe.əv deştə yavə zıvon iyən yavə sıxanon har vırədə bə həzrəti ələyh sıxan kardedəbe və ğasbu həm bə ın hərəkəti xoto çı peyğombər(s)-i həmməysə şiddəinə deşmın bə hisob omeydəbe.bə həmonə dəlili xoto,çın surəon ayəon de ojə-oşkoə holəti əy iyən çəy jimoni həmro tənğıd kardedə.

Tarığ Məharibi nomo qıləy şəxs nəğl kardedə:az “Zil-Məcazi” vıjorədə bim.(Məkkə kəno və Ərəfati nezi qıləy vırə)ğəflətən qıləy merdım vinde ki,vanq jeydəbe:”ha millət ha!bıvotənən Lailahə illəllah ta bə hərəbaxtəti bırəsən”. və qıləy merdım vinde ki, bəçəy peşt iyən lınqon sığ ğandedəbe.joqo ki,çə merdi lnqonədə xun rubedəbe və və həmonə sığ ğandə merd həm vanq jeydəbe:ha millət ha!ın fərd duyəvıje,əy təsdığ məkənən.mı sıvolım karde ki,ım cıvonə merd kiye?voteşone: həmonə merd Muhəmməde ki,peyğombərəti iddio kardedə və ın piyə merd həm çəy amu əbu ləhəbe ki,əy duyəvıj hisob kardedə....

Kərimə-Ğıron əbu ləhəb iyən çəy jimoni həmro barədə hamyedə:əvon har dıqləyni cəhəndımi otəşənd.əbu ləhəbi jen ummul cəmil çı bəni-uməyyəku və çı əbu-sufyani hovə be.votedən:ın jen idastə teği de jiyə dəvastedəbe və bəşəvnəy deəy bə Xıdo-Rəsul(s)-i həml kardedəbe və bə ə həzrəti əziyyət kardedəbe.Kərimə-Ğıron hamyedə: əv ğıyoməti ruji həmonə surətədə yəni jiyə çəy qiyədə və kulədəş həm ezım bıə formədə bə cəhəndımi otəşi daxil bəbe......

İslosi mıborəkə surə Kərimə-Ğıron sadı donzəminə mıborəkə surəy,Məkkədə nozil bıə və 4 qılə ayəku iborəte.ımn surə çı Xıdoşınsoi iyən tohidi həxədə sıxan votedə və çoqlə kırtə ayədə Xıdovəndi vohidəti komilə surətədə vəsf kardedə.bəçəy xoto çın surə coqləyni nom tohide.

İmom Sadığ(ə)-iku nəğl bıə:”yəhudiyon Xıdo-Rəsul(s)-iku tələbışon karde ta Xıdovəndi boəvon tovsif və vəsfko.peyğombər(s) həm bəvon hiç qıləy cəvobış nıdoe və se ruj tamıj ta nəhoyətən ıən surə enovniye be və çəvon cəvobış bəyon karde”.

Həmçinin torıxi sənədonədə omə ki,çı mışrik iyən əhli-kitobi Xıdo-Rəsul(s)-iku Xıdo vəsf kardey tələbi bədiqə,ixlosi suə bo Vohidə Xıdo elon kardero nozil be və Xıdovəndış çı harcurnə pı-mo, fərzənd,şərik iyən misl bıeyku pok və mınəzzəhış zıne.

İxlosi mıborəkə surə de qıləy kutoə iborə,Xıdovəndi komilə sıfətış bəyon karde ki,çı həmməysə barzə sıfəti soybe.tohid yəni çı Xıdovəndi zoti vohidəti və harcurnə şəbih iyən mısl nıbeye....