Osmoniyə surəon-311

Osmoniyə surəon-311

İxlosi mıborəkə surə Kərimə-Ğıron sadı donzəminə mıborəkə surəy,Məkkədə nozil bıə və 4 qılə ayəku iborəte.ımn surə çı Xıdoşınsoi iyən tohidi həxədə sıxan votedə və çoqlə kırtə ayədə Xıdovəndi vohidəti komilə surətədə vəsf kardedə.bəçəy xoto çın surə coqləyni nom tohide.

İmom Sadığ(ə)-iku nəğl bıə:”yəhudiyon Xıdo-Rəsul(s)-iku tələbışon karde ta Xıdovəndi boəvon tovsif və vəsfko.peyğombər(s) həm bəvon hiç qıləy cəvobış nıdoe və se ruj tamıj ta nəhoyətən ın surə enovniye be və çəvon cəvobış bəyon karde”.

Həmçinin torıxi sənədonədə omə ki,çı mışrik iyən əhli-kitobi Xıdo-Rəsul(s)-iku Xıdo vəsf kardey tələbi bədiqə,ixlosi surə bo Vohidə Xıdo elon kardero nozil be və Xıdovəndış çı harcurnə pı-mo, fərzənd,şərik iyən misl bıeyku pok və mınəzzəhış zıne.

İxlosi mıborəkə surə de qıləy kutoə iborə,Xıdovəndi komilə sıfətış bəyon karde ki,çı həmməysə barzə sıfəti soybe.tohid yəni çı Xıdovəndi zoti vohidəti və harcurnə şəbih iyən mısl nıbeye....

“Vuji:əv vohidə Xıdoye,qıləy Xıdo ki,be ehtiyoce.(və həmmə ehtiyocinə şəxson bəy umuşon heste) (ikəsış)zandəni və (əv)zandey bıəni və boəy şəbih iyən misl ni”.

İxlosi mıborəkə surə iminə ayəonədə omə:(”ğul...bıvot:əv vohidə Xıdoye).ın ayə de ğayibi zəmir və işorə yəni de “huvə” bino beydə və bə ın həyğəti işorə kardedə ki,çı pərvərdıqori mığəddəsə zoti çı insonon məhdudə fikon xariciku zıneydə.harçənd çəy əsər və nışonəon qırd dınyoədə zohir və oşkoye.çoko ki,Fussiləti mıborəkə surə 53-ə ayədə handedəmon:”rəyrə ıştə nışonəon (dınyo) ətroəfədə və ıştə conədə bəvon nışon bədomon ta boəvon ruşin bıbu ki,əv həxe”.

Allah çı Xıdovəndi məxsusə ism və nome.ım nom fəğət bo Xıdovəndi oko doey beydə ki,bə Xıdo qırd cəlal və cəmal sıfəton şomil beydə.qıləy holədə ki,Xıdovəndi co nomon adətən bəçəy sıfətonku qıləyni işorə kardeydə.bənə Alim,Rəzzağ,Həkim və sayirə.Kərimə-Ğıronədə Allah kəlimə vey omə və votey bəbe Ğıronədə Xıdovəndi hiç qıləy əsma və nomonədə bın mığdorədə tikror bıəni.Allah qıləy nome ki,çı insoni dıli ruşin kardedə və bəy ğıvvə iyən oroməti baxş kardedə və əy bə qıləy de nur iyən səfo pur bıə dınyo ğərğ kardedə.....

Tohid iyən Xıdovəndi vohidəti çı islomi iyən qırd İberymiyə dinon etığodi usul və prinsiponkuye. Kərimə-Ğıroni ayəonədə dayimi formaədə bə tohidi məsələ işorə bıə.həmçinin dəvəti iminə mərhələdə çı həzrəte peyğombər(s)-i iminə sıxan bə tohidi səmt dəvət be.joqo ki, hamyedə: ”Ğulu La ilahə....(bıvotən la...ta nicot opəydukənən”. Xıdovənde-Aləm mutləğə vucud və har cəhəto be nəhoyəte.əv qıləy mığğəddəs və noməhdudə zote ki,hestemoni aləm çəyku sərçeşmə seydə və əv vohide.çıro ki,aləmədə dıqlə noməhdudə hestemoni aləm təsəvvır kardey nibəbe.zira,ehanə dıqlə zot bıbu,har dıqləyni məhdud beydə.ım zoti coqlə kəmolatonış ni və əqləyni çəqlə kəmolatonış ni.bın surətədə har dıqılə məhdud beydə.ım ıştən bə Xıdovəndi zoti  vohidəti qıləy ruşinə dəlile.......

Xıdovəndi vohidəti dəlilonku qıləyni çı məxloğaton miyono bıə nəzm və həmahənqətiye.qıləy zəmon ki,bə ın hevujə dınyo nəzəkəmon,sıftədə aləmi pərokəndə bıə əczo surətədə vindedəmon.əmmo,de tikəy dığğət kardey,səbərəsemon ki,çı osmon, zəmin, həşi, ovşım, vo, bandı-ku,daşt iyən dıyoon miyono inev qıləy nəzm və həmohənqəti mevcude və itərəfo əvon həm əvon de insoni ehtiyocon həmahənqe.ım ıştən dınyoədə qıləy heyrət vardə nizomiku hikoyət kardedə və aləmədə qıləy vohidə tədbiri nışon doydə.de qıləy co iborəti çın aləmi zərrə və əczoon jıqo bə iyande anqıl qıniyən ki,məcmu iqlə vohidə formə təşkil doydən və həmməy bə qıləy mıəyyənə ğanuni silsilə tabe beydən və pemandedən.təbiiye ki,çanədə çı bəşəri elm iyən zıney dayirə hevuj həm bıbu,çı dınyo əczo vohidəti  boəy vey ruşin bəbe.hestemoni aləmi nizomi vəhdət və bəy hakim bıə ğanun və çı aləmi əczoon vohidəti.çımiku hikoyət kardedə ki,çı aləmi həmmə mevcudati ofəyə iqlə Xalığe....