Əli(ə),barzə insoni təcəssımi nımunə

Əli(ə),barzə insoni təcəssımi nımunə

Fatmə binti Əsəd qədə-qədə bə Kəbə kə qəm şoydəbe.əv nəv manq intizori bəpeştə ısət ıştə fərzəndi bə dınyo omə saat və ləzon aşmardedəbe ki,bın saxtə şərayitədə fəğət bə Xıdo pənoh bardedəbe.ome Kəbə kə vədə mande və de imon iyən səfo pur bıə ğəlbi deştə pərvərdıqori jıləvoni aşığonə nəcvoş karde:”Xıdolim ha! az ım dıjdə dınyo,barzə banıkuon və təlotuminə dıyoon və havzə daşton ofəyə Xıdo bıə tıni pərəstı kardedəm və ıştı peyğombəron dinon həm piyedəme və bə İbreym-Xəlili sıxanon həm bovəm heste.çımı Xıdo! Bə ım mığəddəsə Kə xoto və tıni ıştı palu mığərrəb bıə bə həmmə kəson ğəssəm doydəm ki,çın nuyəzandi təvəlludi ki,ıştı oxoş nınbə rəhməti əzəməti nışonəkuye,bomı hostonkə”.

Fatmə binti Əsədi dəvəşə çəşon bə Kəbə kə səmt be.bın zəmon həmonə həssosə ləzə və anədə çı Kəbə kə kəno cəm bıə şoydon heyrət iyən təəccıbi miyono,Xıdo Kə divo təke və poə be.Fatmə binti Əsəd bənav şe və bə Kəbə kə daxil və həmonə təkə və poə bıə vırə ijən sənibəton bə iyande dəçıke.əyo bıə kəson heyrəti dılədə bə Kəbə kə tərəf dastpoçə bin,vitin və deştə daston bə Kəbə kə divo kuşone və piyedəşon be Kəbə kə ojkon,əmmo ojışon karde nızıne və sərəsin ki,ım hodisə Xıdovənde-Xalıği irodəku bıə qıləy nışonəy.Fatmə binti Əsəd ço ruji bəpeştə Xıdo Kəyku xaric be.qıləy holədə ki,qıləy xos iyən reçinə dimış bıə hırdən çəy vanqoyədə be və voteşe:”mı çı vəhışti miyvəonku hardeme və çımı fərzənd bə dınyo omə zəmonədə az piyeme Kəbə kəyku xaric bıbum.hatifi nidoş je və qıləy sədo ome ki,ha Fatmə ha! ıştə fərzəndi nomi Əli bınə.ısət millət bızınon ki,ım mıborəkə mevlud Əliye”....

De ın tərtibi Mıborəkə Rəcəbə manqi senzəminə ruji bənə həzrət Əli(ə) bıə qıləy yolə şəxsiyyət Xıdo kəyədə bə dınyo çəşış oj karde.ım rujon de qıləy yolə şəxsiyyət və barzə məğami soyb bıə insoni vilodəti ruji əmə əziz və çə həzrəti nuroni iyən dayima dəvəşə jimoni boştə ulqu qətedəmon.həzrət Əli(ə0 həxədə sıxan votedəmon.qıləy fevğaladə və İslomi peyğombəri(s) bəpeştə mislış nıbə şəxsiyyət ki,çə həzrəti fikon,ideyaon və əməlon çı torıxi marzonku dəvardə və iqlə cumlə və kəlmədə bəpe votey bıbu və bə ın həyğəti etırof kardey bıbu ki,ımruj dınyo bənə həzrət Əli(ə) bıə qıləy şəxsiyyəti ədolət tələbəti iyən hukmronəti təşnəy.....