Rəməzon,çı fırsəton manq-4

Rəməzon,çı fırsəton manq-4

Xosə Tolışon səlom, de “ Rəməzan, fırsəton manq” nomo co qılə bərnomə bə mıburəkə Rəməzanə manqi 4 minnə ruji pişvoz şeydəmon, umidımon heste ki Xıdo dərqohədə, şımə nımoj-rujəon və ibodəton ğəbul bıbu, və ım manqi bərəkəton iyən məziyyətonku istifodə kənən. Dəvət kardəm de ım bərnomə dəmə bə ico bımandən.

Bəle əzizon, jəqo ki dəvardə bərnoməonədə votımone, ilahiyə neməton ğədrdonəti kardey yaqanə roy, Xıdo ibodət kardeye. əmmo ibodət çiç heste?

Ğasbu ım barədə iminnə çi ki bə çəmə yod omeydə, nımoj və rujə bıbu, əmmo ım çiyon ibodət kardey barədə, fəğət vey oşkoə şikil bə hisob omeydə. Həğiğətədə ibodət kardey zot və həğiğət, Xıdo yod və dıvo kardey zıney bıdə. Jəqo ki Taha surə, 14 minnə ayədə handeydəmon:

“Həyğətən, mı, Allah(Xıdom). sovə mı, co məbud ni. çən, bəmı bandəçəti bıkə, iyən mıni bə yod dənoeyro, nımoj bıvot.”

Xıdo ım ayədə həmmə bandəon bəştə yeqanə bey oqoh və bəştə ibodəti dəvət kardedə. Xıdo əmr kardedə ki nımoj bərpo kənən ta mıni yod bıkənən, peşo nımoji zot həmon Xıdovəni yod iyən dıvo kardeye və ım zot, karde bəzne çəmə həmmə əməlonədə cari bıbu.

Həmçınin Xıdo vəədə kardə ki har kəs bə çəy yod bıbu, Xıdo həm əy yod bəkay, ım sıhbəton nımunə, Bəğərə surə 152 minnə ayədə omə ki Xıdo hamiyəşe: “Çən, mıni bə yod dənən, ta şıməni bə yod dənəm”

Xıdo Rəsul(s) həminə ayə təfsirədə hamiyəşe, əqə şımə ibodət iyən itoət royku bə Xıdo yod bıbənən, Xıdo həm deştə muxtəlifə neməton, ehsanon, rəhmət iyən rizoyəti vositə, şıməni yod kardə.

Əmə karde bəznemon de çəmə bədəni həmmə uzvon, bə Xıdo yod bıbəmon. karde bəznemon de zıvoni vositə, Xıdovəndi de çok iyən ğəşənqə nomon bıhandon, jəqo ki dini yolə şəxsiyəton Xıdo yod kardedən. Im nomonku qıləyni ki Peyğəmbər, vey de çəy vositə Xıdo yod əki, ım dıvo be:

  «یا مُقَلِّبَ القُلُوب ثَبِّت قَلبی عَلی دینِک»

Kərimə Ğıron bəmə umuteydə ki vaxti Həzrəte Yunes de saxtiyəti qiriftor be, Xıdo jıqo yod kardedə be:

«لا اِلهَ الَّا أنت سُبحانَکَ إنِّی کُنتُ مِنَ الظَّالِمین»

Əzizon Islamədə vey tovsiyə bıə ki saxti və muşkilaton zəmonədə de həminə dıvoon vositə Xıdo yod kəmon, əlovə bə ım zıvoniyə dıvoon, karde bəznemon dıl və ğəlbi vositə, Xıdo vey yod bıkəmon.

Əmmo səmimi həmzıvonon, Xıdo mehmonəti manq, yəni mıburəkə Rəmezanə manqədə qıləy çokə fırsət heste ki mısılmonon bəpe ıştə rufi cəlo bıdən və ıştə ğəlb iyən dıli pok kon iyən ım manqədə ilahi nez bey bərəkəton və fəzilətonku istifodəşon bıbu.

Mehribonon, həmmə zıneydəmon ki İnsoni cism har çəxtə ki zumand bıbu, be varzış, vey zəif və lod bəbe. Ruf həm jəqoe, şımə deştəni məşğ doe və ilahi prinsipon rioyət kardey vositə, karde bəzneyon ıştə rufi zumand kənən.

Rujə mo, insoni mənəvi iyən ruhaniyə cəhətiku, qıləy təmrinəkə manq heste. ijən qıləy fırsəte ki karde bəznemon çəyədə, bə çəmə cismoni meylon cəvob nıdoey vositə, çəmə rufi prosnəmon və bə barzə vırə bırosnomon. Həminə barədə Xıdo Bəğərə surə, 183 minnə ayədə rujə qəte illəti, Təğva təmrin zıneydə iyən hamiyəşe:

“Ey imon vardəkəson!rujə bəşmə vacib be,çoko ki, bə şıməku bənav bıəyon vacib bıə be.ğasbu, şımə təğvanin bıbuən.”

Təğva bə ım məenoe ki inson ıştə həmmə əməlon və rəftoronədə mığət bıbu ki bə Xıdo rizoyət və ilahiyə əmri səmti qəm peqəto və həmonə çiyonku ki Xıdo nəzəku vey bevəcə çiyonin, diyəro bımando,ım mığət iyən qınohku diyəro mandey əqə dəvom peydo ko, təğvo məenodəy.

Əmmo təğvo mığobilədə, be diğğət bey iyən be bəsirəti heste. Xıdo, jimonədə muminon ğəflətədə mandey pidəş ni. mumin bəpe ıştə jimoni həmmə baxşonədə, çəy çəşon oj və çəy dıl oğo bıbu.

Peyğəmbəron iminnə və oxonə vəsiyət, təğva heste. Kərmə Ğıroni muxtəlifə surəonədə həm ım mətləb diyə bəbe, ki ilahiyə peyğəmbəron imninnə sıxən ki əy bə millət voteydə bin, təğva barədəy. əqə təğva bıbu, ilahiyə hidoyət həm heste, və əqə təğva nıbu, ilahiyə hidoyət həm komil surəti bə şəxs iyən ictima aid nibəbe. Bəle əzizon rujə qətey, təğva muğəddəməy. Jəqo ki mıtəalə Xıdo Hədid Surə, 28 minnə ayədə hamiyəşe: “ ha muminon ha! Xıdoku bıtarsənən, və bə çəy Peyğəmbəri imon biyənən, ta ıştə rəhmətiku dıqılə səhmi bə şımə əto ko, və bo şımə qıləy nur ğərol bədo ki, de çəy vositə (milləti miyono) roy nışon bıdo və Xıdo vey əbaxş iyən mehribone.”

Əzizon, mıburəkə Rəməzanə manqi mənəviyə hol-həvoədə, har kəs səyo cəhd kardedə ki bə Xıdo nez bey xoto, çokə roy bıvıjno.bə Ğıron və bə çəy ibrəton diğğət kardey, həminə royədə vey nezə royonku bə hisob omeyedə. Həminə barədə Xıdo Rəsul(s) hamiyəşə: “ şımə çəşon Xıdo ibodəti royədə, istifodə kənən” Xıdo Rəsuliku soal bıə: çoknə çəşonku Xıdo ibodətiro istifodə kəmon? ə Həzrət hamiyəşe: “bə Ğıron diyə kardey, Ğıronədə fik kardey iyən Ğıroni mucizəonku ibrət qətey royku”.

Xosə əməson bə ım bərnomə quş doe xoto şıməku təşəkkur kardəm, umidımone əmmə həm karde bıznəmon kərimə Ğıroni dərk kəmon iyən çəy pənohədə bə oroməti və əmniyyəti bırəsəmon, xususi ım əzizə manqədə ki Ğıron və çəy ayəon təlovət kardey manqe.