Rəməzon,çı fırsəton manq-5

Rəməzon,çı fırsəton manq-5

Mehribonon səlom, de Xıdo dərqohədə ğədrdonəti kardey vositə, ımrujnə bərnomə yəni “Rəmezan, çı fırsəton manq” nomo bıə bərnomə bino kardedəmon, tojədən bə Xıdovəndı xalıği sepas voteydəmon ki co kərə bəmə tovfiğ doəşe ki Rəməzanə mıburəkə manqədə bə bandə bey məşği məşğul bıbəmon, qınohku fasilə bıqətəmon və Xıdo məhzəriku, ilahiyə baxşışi tələb kəmon. Əzizon dəvət kardəm bənə dəvardə rujon de ım bərnomə dəmə bə ico bımandən.

Xosə Tolışon, dəvardə bərnoməonədə votımone ki ilahi neməton şıkkardeyro , bəpe həmişə bə Xıdo yod bıbəmon və fəğət əy ibodət kəmon, əmmo Xıdondi ibodət kardey vey muhimmə royonku qıləyni ıme ki şeytoni vəsvəsəon mığobilədə muğavimət kəmon iyən qınohku diyəro bımandomon.

Xıdo Rəsul(s) bə Həzrəte Əli(ə) vəsiyət ğolibədə həmiyəşe: koonku qıləyni ki millət karde zınəşon ni əncom bıdən, ıme ki həmişə iyən həmmə holətonədə bə Xıdo yod bıbun. Həmişə bə Xıdo yod bey bə ım məenoe ni ki zıvon, həmişə dıvo votey holədə bıbun, bəlkəm bə ım məenoe ki əqə qınoh iyən həromə koon vəziyətədə ğəror bıqətəmon, Xıdoku bıtarsəmon, və qınohku diyəro bımandon.Xıdo Ğıronədə ə şəxson ki qınohon vədə bə Xıdo səmti şeydən və qınohku diyəro mandən bə çəmə yod vardedə, bənə nımunə Həzrəte Yusuf (ə). Vaxti Zuleyxa ki Misri vey ğəşənq və nııfuzış bıə jenonku be, Həzrəte Yusufi bəştə məxfiyə vırə bardeşe, Həzrəte Yusuf(ə) ki həmişə Xıdo nom, çəy ləv iyən Xıdo yod çəy dılədə be, ım yolə qınohku diyəro mandə.

Əzizon, kərimə Ğıronədə vey ayəon heste ki şeytoni iyən çəy vəsvəsəon vədə insoni, imtinon kardey barədəy.bənə Fatiri surə 6 minnə ayədə ki Xıdo hamiyəşe:

“ Beşək, şəyton şımə deşmıne. çən, şımə həm əy deşmın hisob kənən.”

Həmçınin Xıdo Əerafi surə 27 minnə ayədə hamiyəşe:

“Ha çı Odəmi fərzəndona! Məbodə(nıbobənıbu) şəyton şıməni bə dast eğandi.çoko ki,şımə(iminə)pı-moş çı vəhıştiku bə biş beğande.”

Im mığət mande həmon Xıdo yod kardey mənodəy. Rəməzonə mıburəkə manqədə, Xıdo bandəon de xususi əməlon əncom doe vositə, ıştə rufi cəlo dodən və ıştə vıcudədə qınoh zəminəon kam kardedən. İlahiyə ziyofəti manq, insonon rəftoron və əməlon vey çok və ğəşənq kardeydə və bəvon tojə ruf dodə. Və ım mənəviyə holət nışo dodə ki ım manq vey əzəmətin iyən bərəkətinə manqe.

Mehribonə əməson, Rəməzonə manqədə, rujə qətey, insoni ruf və dıli solim kardedə, jəqo ki bo cismi noxəşion çok bey xoto, bəpe bəzi çion hardeyku imtinoş bıbu, bo pisixi noxəşion mıolicəro həm, bəpe kali rəftoronku diyəro bımandomon. Həmmə zıneydəmon ki rufi noxəşi çı cismi noxəşiku vey muhim heste, əqə rufiku muhafizə nıkəmon və noxəş bıbu, çəy noxəşi təsir bə həmmə ictima rəsedə. əqə qıləy şəxs, nımoj votey, rujə qətey iyən mınocot ya dıvo handeyku diyəro bımando, çəy ruf noxəş bəbe və hiç vaxt bə oroməti nibərəse və həmişə əzobədə mandeydə.Xıdo yod iyən Xıdo dərqohədə dıvo kardey, insoni ğəlb və dıliro qıləy şifoe. Jəqo ki Xıdo Rəədi surə 28 minnə ayədə hamiyəşe:

“(Səbəro bıə kəson)Ə kəsonin ki, imonışon vardə, iyən çəvon dılon de Xıdo nomi orom beydə. Oqoh bıbən ki, fəğət de Xıdo zikri dılon orom beydə.”

Əmirəlmumenin Həzrəte Əli(ə) dıli kontrol kardey, bə aliyə vırəon və məğomon rəsey hələkə roonku qıləyni bə hisob vardedə iyən hamiyəşe: “2 qılə royku bə dıl varid bey imkonış bəbe, insoni çəşon və quşon”. Çən aqılmandə inson, ıştə sıxəni bənav, deştə ağıli bəy fik kardedə.

Əzizə duston, Rəməzonə mıburəkə manqədə, de Ğıroni unsiyət qətey, bə rujə əqəton məxsusə hol-həvo doydə. ım yolə kitob, qıləy səadətinə jimoniro vey aliyə prinsiponku şomil bıdə. Bə çəy xoto, Ğıron, bo çok iyən insoniyə jimoniro vey komilə ulqu bə hisob omeydə.İron İslam Respublika, har sor Rəməzonə mıburəkə manqədə, bo Ğıroni mədəniyəti rəvoc doey və dəy unsiyət qəteyro, vey ğəşənqə hərəkət əncom doydə. Imsor həm məçiton və mıtəbərrikə vırəonədə Ğıroni təlovət kardey icloson bərpo bəbe iyən millət yande kənoədə, har ruj 1 qılə Ğıroni cozi,təlovət kardedən. Boçi ki ım manqədə bə Ğıroni təlovət kardey vey təkid bıə.

Əmmo Ğıroni təlovət kardeyro, qıləy adət heste. əcumlə təhorətə. jəqo ki Xıdo təhorəti, Ğıroni təlovət kardey iminnə şərt bəyon kardə və Bəğərə surə 79 minnə ayədə hamiyəşe: “ğərəz pokon, co kəson bəy dast peydo nibəkan”

Bə Ğıroni səhifə diyə kardey, ibodəte. Bə Xıdo Rəsul(s) nəzə əsos, bə 3 qılə çiy diyə kardey ibodət bə hisob omeydə, ım çiyonku qıləyni bə Ğıron diyə kardeye. Co qılə adəton həm ıme ki Ğıroni ayəon məsey zəmonədə, bəpe çəmə sukut de təəmmol və tədəbbori bə ico bıbu, jəqo ki Xıdo Əerafi surə 204 minnə ayədə hamiyəşe:

“Ha faxti Ğıron handey bıbu,bəy quş bıdənən iyən tam bıjənən(ta bıməsənən). ğasbu bəşmə rəhm bıbu.”

Əzizon umidımone ki Xıdovənde Xalıği mislış nıbıə rujonədə ki çəyədə ilahiyə ziyofət heste, de ilahiyə ayəon təlovət kardey vositə, bə ilahiyə əbədiyə kəmol və beheşti tərəf qam peqətəmon, amin.