İlahi əsma və nomon

İlahi əsma və nomon

Kərimə-Ğıron ım İlahi kəlome ki,bo bəşəri çı nodonətiku nicot bıdo və bə elmi səmt hidoyət kardero omə qıləy mığəddəsə kitobe və bə dınyəvi ziyodə foydəon dəlili xoto,Məcid tevsif beydə.Məcidə-Ğıron qıləy kitobe ki,bəvədə botıl ro pəydu kardey nibəzıne və çəyku hiççi bəkam bıəni.və har qıləy zəmon iyən şərayitədə bo qırd həyğəton oxonə mərcə və ovard kardə vırəy.liza Xıdovənde-Aləm Ğıroni har qıləy ayədə ki,sıxanış votə,Ğıronış de əzəməti bəyonış kardə.min cumlə ə ayəon ki,Ğıronış de əzəməti zikr kardə,Ğafi mıborəkə surə iminə ayəy ki,əyo hamyedə:ğaf.vəlğuranil məcid.Ğaf.ğəssəm bıbu bə Məcidə Ğıroni.ın ayə ki,de mığəttəə hərf bıə ğaf –i bino bıə və bə Ğıroni əzəmət iyən yolyəti işorə kardedə.çoko ki,məcid çı məcdi kəlməku və hevujə şərofəti mənoədəy.

Ğıron həm ki,qıləy oxoş nıbə əzəmət iyən şərofətış heste,ləyoğətış heste ki,de Məcidi nomi votey bıbu.Kərimə-Ğıroni əzəmət və məcdi çəy ecozədəy ki,bəloğəti elmi məşhuron və ustodon cın iyən insiku çanədə məxloğ cəm bıbon və bə iyande koməkkon həm,bənə əy qıləy kəlom və sıxan vardeyku ocizin.həmçinin Ğıroni əzəmət iyən məcd ğeybi xəbə və ali həyğəton və erjinə hukmon ğolibədə bıə osmoniyə kitobe və navnə peyğombəron təsdığ kardedə.həmçinin Ğıron ıştə tərəfdoron əzəmət iyən hərəbaxtəti təzmin kardedə və çəy tərəfdoronku tələb kardedə ki.dayima bəy çanq və təməssık bıjənon.qıləy rəvoyətədə omə ki,Ğıroni bəsə coqlə kəlom iyən sıxanonsə fəzilət və barzəti bənə Xıdovəndi bəsə coqlə mevcudatonsə bıə barzətiye.həmçinin Ğıroni bə bəşəri vardə Rəəsuli-Əkrəmiku(s) qıləy erjinə hədisədə hamyəşe:az şımə miyono dıqlə dıjdə əmonət noydəm.qıləyni Ğıron iyən coqləyni həm çımı əhli-beyte ki,əvon de tosə çımı palu Kovsəri hovuzu cəm bıey iyandeyku co nibəbeyn.....

Bə həyğiyə şərofəti rəsə qıləy bandə ki,Məcidə Xıdovəndi nomi bəvədə təcəlliş pəydu kardə və qıləy şərəf və buzurquvarətiş pəydu kardə.həlbəttə ikəs ki,ıştəni de Xıdovəndi əxloği dərosto və ıştə nəfsi zohiri iyən botıni şəhvət iyən mırdolətiyonku pokko və çı məsiyət və qınonku bə diyəro mandedə,jıqo qıləy fərd çı Xıdovəndi əzəmət iyən məcdiku qıləy nımunəy.ikəs ki.çı fərizə və vocibotonsə əlovə,de nəvafil iyən mustəhəbbaton həm məşğul beydən və ıştəni bə Xıdovəndi dərqo vey nez kardedə. çən, Xıdovənd həm çəvon dıl və ğəlbonədə çı hikməti çeşməon bə cuş vardedə.qıləy bandə har zəmon bə jəqo qıləy mərtəbə bırəso,bəy vocibe ki.ıştə məxloği bə həxı səmt hidoyətko ta çəy nom de əzəməti zikr kardey bıbu.qıləy rəvoyədə omə ki,həzrəte Davud(ə) coyli bə səhro şe çən,Xıdovəndi bəy vəhyış karde:ha Davud ha! çiç bıə ki,tıni coyli vindedəm?ərzış karde:ha çımı məbud ha!detı vindemoni şevğ de şiddəti jıqo bəçımı coni nışte və çımı deştı məxloği miyono qıləy hayil və maneə heste.Xıdovəndi bəy vəhyış karde: bəçəvon miyon oqard.zira ehanə tı qıləy fərol kardə bandə çımı palu biyoş,ıştı nom lovhədə de tarifinə sıfəti səbt və bənıvıştem....