Nəhcul-Bəlağə pand iyən hikməton

Nəhcul-Bəlağə pand iyən hikməton

2-ə numrəynə hikmət:Əzrəy binəfsihi....hakəs taməh bıko ıştənış həğirış kardə və ikəs ki,ıştə norohətçətiyon(çımi-çəy palu)foşko deştə zılləti rozi bıə iyən əkəs ki,ıştə zıvoni boştə əmir bıko,çəy şəxsiyyət həğir bəbe.

İnson bənə Xıdovəndi zəmini dimisə bıə xəlifə unvoni çı kəroməti ovcədə xəlğ be.bəçəy xoto de hiç qıləy ğeyməti icozəş ni ıştəni exroc və həğir cilvə bıdo.ikəsi həxış ni bə maddi ezrocə dınyo rəseyro ıştə kəroməti ıştə po jiyədə bıno və du bıvoto...ıştə dusti iyən həmko bəhvato..mehtəkirətiko və de korrupsiyə məşğul bıbu. ...bə irğçiyəti iyən diskriminasiyə ğayil bıbu.bəştə sərmoyə kam bıey tarsi xoto çı ikəsi dasti nıqəto...ədoləti bəştə mənfəət iyən ğudrəti ğıboniko və ıştə insoniyə şərofəti hırd nıko.Əmirəl-Muminin Əliyyibni Əbi Tolıbi(ə) Nəhcul-Bəlağədə omə  dıminə hikmətədə bın zəminədə vey ğəşənqə kəlməonku qıləyni əyoe ki,hamyedə:”Əzrəy binəfsihi....hakəs taməh bıko ıştənış həğirış kardə və ikəs ki,ıştə norohətçətiyon(çımi-çəy palu)foşko deştə zılləti rozi bıə iyən əkəs ki,ıştə zıvoni boştə əmir bıko,çəy şəxsiyyət həğir bəbe”.

İmom(ə) bın nuroniyə hikmətədə seqlə bənə taməh,kam zərfiyyəti iyən vey sıxan kardey rəzilətinə sıfəton ki,bə insoni şəxsiyyəti saru eqıniye boyis beydə,çəyku bəhs kardedə və oşkoə surətədə milləti əy əncom doeyku ğədəğənış kardə.

Taməh çı ziyodə təlb kardey mənoədəy iyən çəy rişə çı həddiku ziyodə bə dınyo rəğbət bıeye.ikəs ki,bə mol,məğam,dəbdəbəninə jimoni iyən bə dınyəvi ləzzəton bıə ziyodə meylış bıbu,jıqo çı dınyo maddi jimon çəy çəşon qəteydə ki,bə dınyo kamə ləzzəton rəseyro har qıləy zılləti ğəbul kardedə.qıləy holədə ki,de istiğno iyən bə həyğiyə ruzi doə kəsi bıə umu bə vəsf kardey nıbə ləzzəton rəsey mumkine....

Qıləy heyrətamizə dınyo ki, əmə əyo jimon kardedəmon,qahi zəmon vey çoke ıştə zıvoni bastə holədə oqətəmon və de əmə sehbət kardə milləti fəğət bəvon qıləy təbəssım bıkəmon.çıro ki,qahi vaxt ıştə qəvi oj karde iyən ıştə jimoni muşkiloton bəyon kardey,bə xoş nıomə qıləy mevzu təbdil beydə.

İmom Əli(ə) dıminə hissədə hamyedə:”ikəs ki,ıştə dıli sufrə(çımi-çəy palu qıləy foydə nıbə holədə)ojko (iyən ıştə muşkiloton foşko)bəştə zılləti rozi bıə.boçəvon muşkiloton həll kardero qıləy ğudrətış nıbə şəxson palu ıştə problemonku bəhs kardey,çı qıləy şəxsi xətokorəti iyən ğudrəti oşko kardə holədə,de dust iyən deşmınon mızəmməti dimbədim bome ki,boəy ım vey xarəkə iyən bə xoş nıomə məsələy. həlbəttə ruşine ki,havaxti inson çı doktori palu ıştə dardon bıvoto və çəyku çı damoni roy tələbko və ya bo vom iyən ğarziro ıştə dusti nəzdədə ıştə muşkilotonku bəhsko,qıləy səhfə koş kardəşni və ıştə jimoni anqılon oj kardey dumoye.harçənd bə Xıdovəndi təkyə iyən təvəkkul kardey iyən bandəku tələb nıkardey,vey pəsəndidə iyən bə xoş omə koye.

Qahi zəmon həm iqlə beməno kəlmə bə insonon jimoni qıləy ciddiyə ziyonon daxil kardedə.çən,bəpe sıxan votə zəmonədə komilə surətədə mığət bıey lozıme.məxsusən deşmınon dayima çəmə zəyifə noxtəon pəydu kardey dumon ta jimoni boşmə tiki həm vey saxt iyən de muşkili purkon.