Nəhcul-Bəlağə pand iyən hikməton-22

Nəhcul-Bəlağə pand iyən hikməton

İmom Əli(ə) Nəhcul-Bəlağə 28-ə hikmətədə jıqo hamyedə:”Əfzəluz-zuhdi ihğauz-zuhhdi.həmməysə barzə təğvoəti (həmonə)pərhizkorəti məxfi kardeye”.

İslomi sədr və sıftədə ıştəni bənə mısılmoni nışon doə kali fərdon de kanə oləton bə tan kardey,qədə kanə kəonədə jimon kardedəbin,vey sodə xorəkon hardedəbin və həmonə holədə camiyədə zohir beydəbin.əvon zohirədə zohid,əmmo botınədə mışrik bin.qıləy holədə ki,gəyğiyə zohidon bə Əmirəl-Muminin Həzrət Əli(ə) hamye əsos,bəştə ıştən botıni meyli əks,vey mumkine zohdi tərkiku noçorən ıştə duston cəmədə və deəvon bə ico bıbu və de ın vəsilə ıştə mənəvi sərmoyə çı riya fəsodiku muhafizəko.

İslomi mığəddəsə dinədə zohid əkəse ki,bə Xıdo malikiyyət iyən rububiyyəti,bə İlahi ğəzavu-ğədəri imonış bıbu və harçi ki,bəy iyən bə cokəson rəseydə,çı Xıdo tərəfiku bızıno və bəştə malik bıə çiyon dıl nıdəvasto və bəştə dasto doə çiyon xoto təəssıf nıhardo.çoko ki,Əmirəl-Muminin Həzrət Əli(ə) çı zohdi tarifədə Hədidi mıborəkə surə 23-ə şərifə ayədə istifodəş kardə və hamyedə:”həmmə zohd Ğıroniku dıqlə kəlmə miyone: Subhonə-Xıdo hamyəşe:”şımə dastiku şıə çiyonku (çı dınyo maddiyatiku)təəssıf məhənən iyən Xıdo bəşmə doə çiyon xoto şo məbənən”.hakəs bə dəvardə çiyon xoto ğəmo-ğussə nıho və bo ayəndə iyən vəomə xoto şo nıbu,bə zohdi har dıqlə tərəfi dastış pəydu kardə....

Həlbəttə bəpe dığğət kardey bıbu ki,zohd çı məhrumiyyəti mənoədə ni.bəlkəm çoko ki,Xıdovənde-Xalığ Kərimə-Ğıronədə hamyəşe ki,muminon bəpe çı dınyo təyyib,çok iyən pokə nemətonku oko bıdon,əmmo icozə nıdon ki,çəvon dılon bə həmonə dınyo neməton qıləy məhəbbətışon bıbu.çoko ki,Ərafi mıborəkə surə 32-ə şərifə ayədə omə:ha pəyğombər ha!vuji:Xıdo boştə bandəon bə əməl vardə ziynət əşyo və zər-zivəron iyən  həmçinin pok və pokizə ruziyon kom kəsi həromış kardə?.bıvot:ın neməton dınyo jimonədə bo imon vardə kəsone və ğıyoməti ruji həm bəvon məxsuse.əmə jıləvoni ıştə ayəon bo zınə dastəon ruşinə formə bəyon  kardedəmon.

Bəçəy xoto Xıdo-Rəsuli(s) bə Xıdo həloli hərom kardey nisbətədə çəşnaviş doə və hamyəşe:”zohd ım ni ki,inson Xıdo həloli hərmko.bəlkəm zohd bın mənoədəy ki,inson ıştə dastədə bıə çiyonsə vey bəpe bə Xıdo dastədə bıə çiyon xotırcəmətiş ziyod bıbu”.

Zohid qıləy zəmon ki,dırozə roy iyən ıştə kamə azuğə vindedə,dınyo nəyinki,nopəsənd,bəlkəm kam iyən rədəvardə vindedə.bəhisob çı qıləy əbədi mandə həyğəti dumo nəvedə və bın royədə qəm peqəteydə və bın royədə çı dınyo mığobilədə bıə axırəti dınyo vıjniyedə və bə bın royədə bıə qırd renc.əzob-əziyyət iyən saxtiyon tov vardedə və de qıləy barzə himmət və səyon bəştə məğsədi noyil beydə.