Қозоғистоннинг Жамбил вилоятида Ўзбекистон автобуси ЙТҲга учради
-
Қозоғистоннинг Жамбил вилоятида Ўзбекистон автобуси ЙТҲга учради
Қозоғистоннинг Жамбил вилоятида Ўзбекистон давлат рақамига эга бўлган автобус ЙТҲга учраганида 33 киши жароҳат олди.
Жароҳат олганлардан 3 нафари оғир аҳволда эканлигини Спутник хабар қилган.
Қозоғистоннинг Жамбил вилояти Фавқулодда вазиятлар департаменти матбуот хизмати хабарига кўра, ЙТҲ "Олмаота-Тошкент" автомобиль йўлининг 571-километрида, Жамбил вилояти, Жуалин тумани, Бауйржан Момишули қишлоғидан олти километр узоқликда 12 май куни соат 15:50 атрофида содир бўлган.
Хабарга кўра, автобусда Ўзбекистон фуқаролари бўлган. ЙТҲ оқибатида ҳайдовчининг ёрдамчиси ва бир нафар йўловчи қурбон бўлган, 33 киши касалхонага ётқизилгани, улардан уч нафари реанимацияда, - дейилади хабарда.
Дастлабки маълумотларга кўра, об-ҳаво шароитининг ёмонлашиши (ёмғир ва дўл, таҳр.) туфайли автобус ҳайдовчиси бошқарувини йўқотиб, шу йўналишда ҳаракатланаётган трактор тиркамаси билан тўқнашиб кетган.
Мазкур ҳолат юзасидан Қозоғистон Республикаси Жиноят кодексининг 345-моддаси 4-қисми (Транспорт воситасини бошқараётган шахс томонидан икки ёки ундан ортиқ шахснинг ўлимига сабаб бўлган йўл ҳаракати ёки транспорт воситаларидан фойдаланиш қоидаларини бузиш) билан терговга қадар текширув қўзғатилган.
