Тошкентда ШҲТга аъзо давлатлар Олий судлари раислари йиғилиши ўтказилди

Йиғилиш якунлари бўйича ШҲТга аъзо давлатлар суд ҳокимияти олий органлари ҳамкорлиги истиқболлари тўғрисида Қўшма баёнот имзоланди.

Тошкент шаҳрида 2017 йил 25 октябрь куни Ўзбекистон Республикаси раислигида Шанхай ҳамкорлик ташкилоти (ШҲТ)га аъзо давлатлар Олий судлари раисларининг ўн иккинчи йиғилиши бўлиб ўтди.

Йиғилишда Қозоғистон Республикаси Олий суди раиси К.Мами, Қирғизистон Республикаси Олий суди раиси А.Токбаева, Россия Федерацияси Олий суди раиси В.Лебедев, Тожикистон Республикаси Олий суди раиси Ш.Шоҳиён, Ўзбекистон Республикаси Олий суди раиси К.Комилов, Хитой Халқ Республикаси Олий халқ суди раиси ўринбосари Д.Ванхуа, Покистон Ислом Республикаси Олий суди катта судьяси Г.Аҳмад, Ҳиндистоннинг мамлакатимиздаги Фавқулодда ва мухтор элчиси В.Кумар, шунингдек, ШҲТ Бош котиби ўринбосари С.Имандосов ва ШҲТ Минтақавий аксилтеррор тузилмаси Ижроия қўмитаси директори ўринбосари А.Мукашев иштирок этди.

Тадбирда ШҲТга аъзо давлатлар Олий судлари раисларининг қонун устуворлиги, фуқаролар ҳуқуқлари ва қонуний манфаатларини таъминлаш ҳамда ушбу соҳада тажриба алмашиш борасидаги ҳамкорлигини янада фаоллаштиришга қаратилган қатор долзарб масалалар кўриб чиқилди. Хусусан, инвестицияларни ҳимоя қилишнинг институционал механизмлари, бу соҳадаги низоларни ҳал этишга қаратилган қонунчилик базасини янада такомиллаштириш масаласи атрофлича муҳокама этилди.

Бундан ташқари, ШҲТга аъзо давлатлар Олий судлари раисларининг жиноий ва фуқаролик ишлари бўйича ҳуқуқий ёрдам кўрсатиш самарадорлигини оширишга келишиб олгани жиноятчиликка қарши курашни янада кучайтиришда муҳим ўрин тутади.

Мажлисда ёшларни террористик ва экстремистик гуруҳларга жалб этиш уринишларига қарши курашиш амалиёти тўғрисидаги масала ҳам муҳокама қилинди.

Ўзбекистон Республикаси Президенти Шавкат Мирзиёев Бирлашган Миллатлар Ташкилоти Бош Ассамблеясининг 72-сессиясидаги нутқида халқаро жамоатчилик эътиборини ушбу долзарб муаммога қаратди. Йиғилишда томонлар бу борадаги ўзаро ҳамкорликни янада кучайтириш лозимлигини қайд этди.

Йиғилиш доирасида Ўзбекистон Республикаси Олий суди раиси К.Комилов Россия Федерацияси Олий суди раиси В.Лебедев билан учрашув ўтказди.