UzCard’да яна техник носозлик. Ўзбекистондаги ҳеч қайси миллий пластик карта ишламаяпти

Ўзбекистонда бир неча соатдан буён UzCard фаолиятида навбатдаги техник носозликлар кузатилмоқда. Айни вақтда ҳам бутун республика бўйлаб миллионлаб миллий пластик карталардан фойдаланиб бўлмаяпти. Шунингдек, PayMe ва Click ҳам ишламаяпти.

«Техник носозликлар муносабати билан 15 сентябрь куни соат 18:52дан бошлаб POS, Э-POS терминаллари ва АТМ-қурилмалари процессинг маркази билан вақтинчалик улана олмаяпти», дейилган компания хабарида.

Компания вақтинчалик ноқулайлик учун узр сўраган. Шу билан бирга муаммо қачон бартараф этилишини маълум қила олмаган.

Айни вақтда Тошкентдаги супермаркетларда мижозлар пластик карталари орқали тўлов қила олмаганликлари туфайли олган маҳсулотларини қолдириб кетишга мажбур бўлишмоқда.

Қайд этиш керакки, UzCard фаолиятида узилишлар вақти вақти билан кузатилиб турилади.

Маълумот учун, Ўзбекистондаги барча миллий пластик карталарга битта компания — UzCard хизмат кўрсатади.