Ўзбекистон президенти ва АҚШ делегацияси Афғонистондаги вазиятни муҳокма қилишди
-
Ўзбекистон президенти ва АҚШ делегацияси Афғонистондаги вазиятни муҳокма қилишди
Шавкат Мирзиёев 16 июль куни Тошкентдаги халқаро конференция доирасида АҚШ президенти маслаҳатчиси Элизабет Шервуд-Рендалл бошчилигидаги делегацияни қабул қилганида Афғонистондаги вазият юзасидан фикр алмашди.
Икки томонлама кун тартибининг долзарб жиҳатлари ва халқаро сиёсат масалалари кўриб чиқилди. Шавкат Мирзиёев кейинги йилларда Ўзбекистон ва АҚШ стратегик шериклик ва кўп қиррали ҳамкорлик муносабатлари жадал суръат билан ривожланиб бораётганини мамнуният билан қайд этди.
Элизабет Шервуд-Рендалл Ўзбекистон Президентига АҚШ президенти Жозеф Байденнинг самимий саломи ва энг эзгу тилакларини етказди. Президентнинг Марказий ва Жанубий Осиё боғлиқлигини мустаҳкамлаш борасидаги ташаббуслари АҚШ маъмурияти томонидан юксак баҳоланаётганини таъкидлади.
Ўзбекистоннинг суверенитети, мустақиллиги ва ҳудудий яхлитлиги, янги Ўзбекистонни барпо этиш бўйича олиб борилаётган ислоҳотлар, Марказий Осиёда ишонч, яхши қўшничилик ва шерикликни мустаҳкамлаш борасидаги саъй-ҳаракатлар қатъий қўллаб-қувватланди.
Учрашувда конструктив сиёсий мулоқотни давом эттириш масалалари, шунингдек, икки томонлама ҳамкорликни кенгайтиришнинг амалий жиҳатлари, шу жумладан, пандемияга қарши курашиш ва аҳолини эмлаш, АҚШнинг етакчи компания ва банклари иштирокида қўшма инвестиция лойиҳаларини илгари суриш муҳокама қилинди.
Афғонистонда юзага келган вазият юзасидан батафсил фикр алмашилди.
