Куба халқи йирик маршда ягона хабар билан чиқди: Вашингтон босимига — йўқ

Вашингтон ва Гавана ўртасидаги кескинлик кучайган бир пайтда, минглаб кубаликлар АҚШнинг ушбу оролга нисбатан таҳдидларига қарши норозилик намойиши ўтказдилар.

Pars Today хабар беришича, Вашингтон ва Гавана ўртасидаги таранглик ортиб бораётган шароитда, Куба фуқаролари тарихий аҳамиятга эга бўлган «анъанавий машъалали марш»да иштирок этиб, АҚШ таҳдидларига нисбатан эътирозларини билдирди. Ушбу маршга раҳбарлик қилган Куба президенти Мигел Диас-Канель тадбир иштирокчилари билан тахминан бир километр масофани бирга босиб ўтди. Бу оммавий сафарбарлик анъанавий равишда 27 январь — Кубанинг миллий қаҳрамони Хосе Марти (1853–1895) таваллудининг арафасида ўтказилади.

Марш АҚШ ҳукуматининг Кубага қарши душманона сиёсат ва ҳаракатларига эътироз сифатида ташкил этилди. АҚШ президенти Доналд Трамп Венесуэлага нисбатан аралашув сиёсати ва ҳарбий тажовузларидан сўнг, энди Кубада ҳокимиятни алмаштиришни мақсад қилган. Трамп маъмурияти Венесуэла нефтининг Кубага етказилишини тўхтатиш орқали ушбу мамлакат ҳукуматига босимни янада кучайтиришни режалаштирмоқда.

Сешанба куни Доналд Трамп Гаванани таҳдид қилиб, Куба «парчаланиш арафасида» эканини ва яқин орада жиддий муаммоларга дуч келиши мумкинлигини даъво қилди. АҚШ президенти Венесуэладан молиявий ресурслар ва нефть оқимининг тўхтатилганига ишора қилиб, Куба қулашига жуда яқин эканини, ушбу мамлакат Венесуэла маблағлари ва нефтига таяниб келгани, аммо «энди уларни олмаётгани»ни иддао қилди.

2026 йил 27 январь, сешанба куни бўлиб ўтган Куба халқининг йирик марши ташқи босимлар олдида миллий бирдамлик ва жамоавий ироданинг камёб намойиши сифатида баҳоланди. Гаванада ва мамлакатнинг бошқа шаҳарларида минглаб фуқаролар кўчаларга чиқиб, АҚШ таҳдидлари ва душманона сиёсатларига қарши эканини очиқ-ойдин билдирди. Бу кенг кўламли иштирок оддий норозилик намойиши бўлиб қолмади, балки ҳам Вашингтон, ҳам жаҳон жамоатчилиги учун равшан ва кўп қатламли сиёсий хабарни ўз ичига олди.