Бугун шанба, ҳижрий-шамсий 1396 йил дай ойининг 16-си, ҳижрий-қамарий 1439 йил рабиъус-сони ойининг 18-си ва милодий ҳисоб билан 2018 йил 6-январь.

Ассалому алайкум, қадрли тингловчилар!

"Тарихнинг ўчмас кунлари" унвонли кундалик эшиттиришнинг янги сони билан камина Кўҳёр Аршадниё хизматингиздаман.

Бугун  шанба, ҳижрий-шамсий 1396 йил  дай    ойининг 16-си, ҳижрий-қамарий 1439 йил  рабиъус-сони ойининг 18-си ва милодий ҳисоб билан 2018  йил  6-январь.

Бундан 606 йил олдин, яъни милодий 1412 йилнинг 6-январида франциялик буюк шахсиятлардан бири Жанна де Арк  таваллуд топган. Жанна де Арк  ёки орлеанлик  қизни диндор, тақводор, кашфиёт  ва мулоҳаза этиш аҳли ва бир нав   илҳомланган  аёл деб билишади.

Жанна де Арк Англиянинг ҳукмронлигидан  Францияни нажот бериш учун ғайбдан унга бир илҳом келганини  иддао қиларди. Шунинг учун кўп азоб-уқубатлар тортганидан кейин  Франция  ҳарбий кучларининг  бир қисмига қўмондонлик қилишга эришди ва турли тўқнашувларда Англия кучларини мағлуб этди.

Урушлардан бирида  у  жароҳат олганлиги  боис душманнинг қўлига тушади  ва уни муҳокама этишади. Жанна де Арк шижоат ва жасорат билан ўзини  ҳимоя  этади.  Охири  ўрта асрнинг суд маҳкамаси унинг ақидаларини жиноий деб билиб, уни фикрий  фасод ҳамда муртадликда айблаб, тириклайин ёқиб юбориш ҳукмини чиқаради. Жанна  де Аркни милодий 1431 йил  30 май ойида 19 ёшида тириклайин ёқиб юборишди.

Бу курашувчан  аёл  узоқ йиллар ва асрлардан  бери ҳозиргача  Франциянинг миллий қаҳрамонига айланган.

Бугунги кундан 84 йил олдин, ҳижрий-қамарий 1355 йилнинг 18-рабиъус сони ойида Оятуллоҳ  Мирзо Али Шерозий 68 ёшида Ироқнинг шаҳарларидан бири  Нажафда вафот этган. У фиқҳ ва исломий билимларни Оятуллоҳ Фишоракий Исфаҳоний, Мирзо Муҳаммадтақий Шерозий каби устозлардан ўрганган ва 22 ёшида ижтиҳод даражасига етган. Кейинчалик  унинг ўзи  усул, калом, ҳикмат, тиб, тарих ва адабиёт илмларини катта маҳорат билан ўрганади. У бир муддат  мусулмонларнинг  пешвоси ҳам бўлган.

Бундан 58 йил олдин, яъни ҳижрий-шамсий  1338 йилнинг 16-дай ойида Нимо Юшиж тахаллуси билан машҳур бўлган ва Эронда  шеърнинг янги жанрига асос солган   Али Исфандёрий  оламдан ўтган. У Мозандарон вилоятининг Юш қишлоғида туғилган. Болалик даври тугаганидан  кейин Теҳронга боради ва франсуз тилини ўрганишни бошлайди. Нимо Юшиж  араб тилини ҳам яхши биларди. У устозларининг бирининг тарғиботи билан шеър ёзишни бошлайди. Унинг аввалги шеърлари  классик жанрларида ёзилган  эди. Кейинчалик у ҳозирги замон шеъриятида  улкан янгилик ва янги мактаб  яратишга эришади. Унинг янги жанри янги шеър ёки нимоча шеър номи  билан машҳур бўлган. Ушбу жанрдаги шеърлар  жамиятнинг кундалик масаласини  содда ва самимий тилда ҳамда классик жанрларининг қолиб ва қофияларига риоя қилмасдан ёзиларди. Янги услубда ёзилган унинг машҳур шеъри “Афсона” шеъридир.

Азизлар, “Тарихнинг ўчмас кунлари” унвонли ҳафталик эшиттиришнинг янги сони шу ерда ўз ниҳоясига етди. Мен эса сизлар билан хайрлашаман. Саломат бўлинг.