ԱԳ փոխնախարարը ԵԱՏՄ-Իրան համաձայնագրի կնքման գործընթացում մեծ է համարում Հայաստանի դերը
ՀՀ արտաքին գործերի փոխնախարար Շավարշ Քոչարյանը ԵԱՏՄ-ի և Իրանի միջև ազատ առևտրի համաձայնագրի կնքման գործընթացում մեծ ու լուրջ է համարում Հայաստանի դերակատարությունը:
«Արմենպրես»-ի հաղորդմամբ` Քոչարյանը նման տեսակետ հայտնեց ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում «Երրորդ պետությունների, միջազգային կազմակերպությունների կամ միջազգային ինտեգրացիոն միավորումների հետ` Եվրասիական տնտեսական միության միջազգային պայմանագրերի մասին» համաձայնագիրը վավերացնելու մասին օրենքի նախագծի քննարկմանը:
«Եթե միությունում ձևավորվում են առևտրի արտոնյալ պայմաններ որևէ պետության կամ ինտեգրացիոն միավորումների հետ, ապա բնական է, որ դա ձեռնտու է առանձին-առանձին ամեն մի պետությանը, նաև միությանն ամբողջությամբ: Պատահական չէր, որ Իրանի հետ համաձայնագրի գործընթացը հենց Հայաստանի Հանրապետությունն էր նախաձեռնել: Մենք գրավոր դիմել էինք, և գործընթացը սկսվեց: Մենք լուրջ դերակատարություն ունեցանք համաձայնագրի կնքման գործընթացում»,-ասաց Քոչարյանը:
Նա այդ համաձայնագիրը հատկապես Հայաստանի համար շատ կարևոր համարեց, քանի որ Հայաստանը ԵԱՏՄ անդամ միակ երկիրն է, որի հետ Իրանն ունի ցամաքային սահման:
ԵԱՏՄ-ի և Իրանի միջև ազատ առևտրի գոտու ձևավորմանն ուղղված ժամանակավոր համաձայնագիրը սկսել է գործել 2019-ի հոկտեմբերի 27-ից:
armenpress.am
