Եթե հանկարծ հակառակորդը պատերազմ սկսի, կավարտենք մենք՝ Կուրի մյուս ափին
«2019-ը բանակաշինության համար թռիչքային տարի էր»,- այս մասին «Առաջին լրատվական»-ի հետ զրույցում ասաց ռազմաքաղաքական վերլուծաբան Մհեր Հակոբյանը՝ հավելելով, որ առաջին հերթին նկատի ունի այն, որ ՀՀ ԶՈւ-ն ձեռք բերեց ՍՈւ-30 կործանիչ ինքնաթիռներ, ինչը մեկ բարձրացրեց հայկական բանակի մարտունակությունը:
Վելուծաբանի գնահատմամբ՝ եթե հակառակորդը փորձի կրկնել 2016թ. ապրիլը, ապա ՍՈւ-30-ները էականորեն կնպաստեն հայկական կողմի հաջողությանը: Մհեր Հակոբյանը կարևորեց նաև ՀՀ Զինված ուժերի կողմից ՏՈՌ-երի ձեռքբերումը. «Մեր հակաօդային պաշտպանության առաջին աստիճանը՝ մոտիկ հարվածը և հեռահար հարվածը լավն են, ՏՈՌ-երը լրացնում են միջին հարվածի որոշակի դատարկ տեղը: Մեր վահանն ուժեղացավ»:
«2019թ. մենք կարողացանք մեր բանակը ռազմավարչական առումով ստանդարտ զարգացման մեջ պահել: Սպաների բնակարանային խնդիրները լուծելու ուղղությամբ քայլեր ձեռնարկվեցին, աշխատավարձի բարձրացում եղավ, բարոյահոգեբանական մթնոլորտի բարելավում տեղի ունեցավ, զինվորների սննդի հետ կապված հարցերը լուծվեցին»,- նշեց վերլուծաբանը՝ հավելելով, որ բանակաշինության ոլորտում սահուն զարգացում է ապահովվել, ինչի շնորհիվ 2019թ. Հայաստանի ամենահաջողված ոլորտներից մեկը բանակն է:
Մհեր Հակոբյանը 2020-ին խաղաղություն է մաղթում հայ զինվորին, միաժամանակ վստահ է. «Եթե հանկարծ հակառակորդը պատերազմ սկսի, կավարտենք մենք, և կավարտենք Կուրի մյուս ափին»:
1in.am
