Բերձորցիները պահանջում են չհանձնել իրենց քաղաքը. բնակիչները փակել են ճանապարհը
Բերձորցիները նշում են, որ իրենց ժամանակ է տրվել մինչև օգոստոսի 25-ը լքել քաղաքը։
Sputnik. Արցախի Հանրապետության Քաշաթաղի շրջանի Բերձոր քաղաքի բնակիչները փակել են ճանապարհը և պահանջում են չհանձնել Բերձորը։ Տեղեկությունը հայտնում է yerkir.am-ը։
«Մենք ուզում ենք ռուս խաղաղապահների ղեկավարի հետ խոսենք, տեսնենք` ինչ է լինելու։ Ոստիկաններն էլ չեն թողնում, որպեսզի մենք բողոքի ակցիա անենք, փակենք փողոցը։ Ապրում ենք էստեղ, ո՞ւր գնանք»,– ասում է կանանցից մեկը։
Բնակիչները նաև նշում են, որ իրենց ժամանակ է տրվել մինչև օգոստոսի 25-ը լքել քաղաքը, քանի որ այդ օրը միջանցքը հանձնվելու է Ադրբեջանի հսկողությանը։
Նշենք, որ 2020 թվականի նոյեմբերի 9-ի եռակողմ հայտարարության 6-րդ կետում ասվում է, որ երեք տարում նոր ճանապարհ է կառուցվելու, որը կապելու է Արցախը Հայաստանի հետ։
ՀՀ տարածքային կառավարման և ենթակառուցվածքների նախարար Սանոսյանը օգոստոսի 4-ին հայտնեց, որ Լաչինի միջանցք կոչվող ճանապարհի այլընտրանքային հատվածի կառուցման աշխատանքներն արդեն սկսվել են ու մինչև գարուն կավարտվեն։
