ՌԴ դեսպանը ներկայացրել է Մոսկվայի դիրքորոշումը Սյունիքով երթուղի բացելու հարցում
Ռուսաստանը հանդես է գալիս ոչ թե որպես որևէ կոնկրետ երթուղու ստեղծման, այլ Հարավային Կովկասում տնտեսական և տրանսպորտային հաղորդակցությունների ամբողջական ապաշրջափակման կողմնակից։
Այս մասին odkb-info.org-ին հարցազրույցում ասել է ՀՀ-ում ՌԴ դեսպան Սերգեյ Կոպիրկինը՝ պատասխանելով Սյունիքի մարզով Ադրբեջանից դեպի Նախիջևան երթուղու ստեղծման մասին հարցին:
«Հենց դրանով է զբաղվել 2021 թվականին Ռուսաստանի, Ադրբեջանի և Հայաստանի ղեկավարների որոշմամբ ստեղծված Եռակողմ աշխատանքային խումբը՝ երեք երկրների փոխվարչապետերի համատեղ նախագահությամբ», - ասել է Կոպիրկինը։
Դեսպանի խոսքով՝ եռակողմ աշխատանքային խումբն իրականացրել է ռիթմիկ աշխատանք և հասել զգալի արդյունքների: 2023 թվականի հունիսին խմբի 12-րդ նիստում ընդհանուր փոխըմբռնում է ձեռք բերվել Հայաստանի և Ադրբեջանի միջև երկաթուղային հաղորդակցության վերականգնման և կազմակերպման շուրջ։
«Մենք գրեթե հասել էինք համապարփակ, հավասարակշռված համաձայնության։ Ցավոք, գործընթացը, ոչ մեր մեղքով, կանգ է առել։ «Հավաքական Արևմուտքի» ճնշման տակ Երևանը որոշել է սառեցնել եռակողմ համագործակցությունը նաև այս ուղղությամբ:
Մենք անհրաժեշտ ենք համարում հնարավորինս շուտ վերսկսել եռակողմ աշխատանքային խմբի լիարժեք աշխատանքը՝ ոչ միայն Հարավային Կովկասի տրանսպորտային և կապի համակարգը ապաշրջափակելու, այլև ամբողջ տարածաշրջանում կայուն խաղաղություն և բարգավաճում հաստատելու համար», - եզրափակել է նա։
