Թուրքիան ուշադիր հետևում է հայ-ադրբեջանական բանակցություններին. Էրդողան
Թուրքիան ուշադիր հետևում է հայ-ադրբեջանական բանակցություններին։
Այս հայտարարությունն արել է Թուրքիայի նախագահ Ռեջեփ Թայիփ Էրդողանը Արաբական Միացյալ Էմիրությունների նախագահ, շեյխ Մուհամմադ բին Զայեդ Ալ Նահյանի հետ հեռախոսազրույցի ընթացքում։ X-ի էջում տեղեկությունը հայտնում է Թուրքիայի նախագահի մամուլի ծառայությունը։
Նշվում է, որ հեռախոսազրույցի ընթացքում, ի թիվս այլ թեմաների, անդրադարձ է արվել նաև հայ-ադրբեջանական բանակցություններին։
«Էրդողանն ասել է, որ Թուրքիան ուշադիր հետևում է ադրբեջանա-հայկական խաղաղ բանակցություններին, որոնք սկսվել են Աբու Դաբիում կայացած երկխոսությամբ։ Նա նշել է, որ Անկարան շարունակելու է աջակցել Հարավային Կովկասում տևական անդորր հաստատելու ջանքերին»,– ասված է հաղորդագրությունում:
Հիշեցնենք` ՀՀ վարչապետ Նիկոլ Փաշինյանի ու Ադրբեջանի նախագահ Իլհամ Ալիևի վերջին հանդիպումը տեղի է ունեցել հուլիսի 11-ին Աբու Դաբիում և տևել է ավելի քան 5 ժամ։ Հանդիպումը սկսվել է ընդլայնված կազմով, ապա առաջնորդները շարունակել են առանձնազրույցը: Կես ժամ տևած ընդմիջումից հետո հանդիպումը կրկին շարունակվել է պատվիրակությունների կազմով, որոշ ժամանակ անց բանակցությունները շարունակվել են առանձնազրույցի ձևաչափով: Ըստ ՀՀ ԱԳՆ–ի հաղորդագրության` Փաշինյանն ու Ալիևը քննարկել են Հայաստան-Ադրբեջան միջպետական հարաբերությունների կարգավորման օրակարգի տարբեր ասպեկտներ: Հայաստանը հաջողված է համարում հանդիպումը։
