Հարավային Կովկասի երկրներն ունեն ընդհանուր և ռազմավարական նշանակություն շահեր. Փաշինյան
Հարավային Կովկասի երկրները՝ Վրաստանը, Ադրբեջանը, Հայաստանը, ունեն ընդհանուր շահեր և կա հավանականություն, որ այդ ընդհանուր շահերն ունեն ռազմավարական նշանակություն։
Այսօր Թբիլիսիում «Մետաքսի ճանապարհ» համաժողովի ժամանակ հայտարարեց ՀՀ վարչապետ Նիկոլ Փաշինյանը։
Նա բնական համարեց մրցակցությունը, սակայն շեշտեց, որ այդ էներգիան կարելի է օգտագործել գործակցության մթնոլորտ ձևավորելու համար՝ հասկանալով, որ բեռները, խողովակաշարերը, որոնք կանցնեն տարածաշրջանով, եկամուտ են բերելու բոլոր երկրներին։
«Տրանսպորտային կապերը բերում են միասնական օգուտներ, բայց պետք է ուղիղ ասել, որ դրանք բերում են փոխկախվածություններ։ Դա բերում է տնտեսական աճի, բյուջետային եկամուտների աճի, պետական ծախսեր անելու և հանրությունների մակարդակը բարձրացնելու էֆեկտի։ Հանկարծ երկրները հասկանում են, որ փոխադարձաբար հետաքրքրված են միմյանց կայունությամբ, տարածքային ամբողջականությամբ, ինքնիշխանությամբ, երկրների ինքնուրույն որոշում կայացնելու կարողություններով»,- ասաց նա։
Հայաստանի վարչապետն առանձնացրեց երկրների ինքնուրույն որոշում կայացնելը՝ շեշտելով, որ դա էլ բխում է տարածաշրջանի շահից։
Նիկոլ Փաշինյանի խոսքով՝ այսօր ձևավորված մթնոլորտը փաստում է, որ Հայաստանի և Ադրբեջանի միջև խաղաղությունը հաստատված է, քանի որ, ի տարբերություն նախնիների, հասկացել են, որ հակամարտությունը միայն կորուստ է բերում և վտանգում պետականությունը։
