Ռայիսի. Թմրաբիզնեսի դեմ պայքարում միջազգային մակարդակով վճռականություն չկա
ԻԻՀ նախագահն ասել է. «Պետությունները և միջազգային կազմակերպությունները թմրանյութերի դեմ պայքարում իրենց պահանջների և պարտականությունների չափով չեն գործում»:
Կիրակի օրը, Թմրամիջոցների դեմ պայքարի համաշխարհային օրվա կապակցությամբ տեղի ունեցած միջոցառման ժամանակ, բարձր գնահատելով այդ պայքարի ճանապարհին իրանցի 3800 նահատակների և 12000 վետերանների ջանքերը, ԻԻՀ նախագահը քննադատել է այդ ուղղությամբ մ,յուս երկրների, հատկապես ՄԱԿ-ի անգործությունը:
Անդրադառնալով Աֆղանստանում ԱՄՆ-ի և ՆԱՏՕ-ի գործողություններին, որոնց արդյունքում այդ երկրում աճել են թմրամիջոցների մշակման ծավալները, Ռայիսին հավելել է, որ թմրամիջոցների դեմ պայքարի հարցում բացակայում է միջազգային վճռականությունը:
ԻԻՀ նախագահը նշել է. «Ինչու՞ միջազգային հանրությունը չի կատարում իր իրավական, բարոյական և մարդու իրավունքների վերաբերյալ պարտականությունը և այդ կապակցությամբ պատասխանատվության չի ենթարկում ԱՄՆ-ին և ՆԱՏՕ-ին»:
Նա հավելել է.«Թմրամիջոցների դեմ պայքարում Իսլամական Հանրապետության բոլոր արդյունավետ քայլերը ձեռնարկվել են ԱՄՆ-ի ճնշող պատժամիջոցների պայմաններում»:
