Թեհրանում կայանալու է երկու կարևոր գագաթնաժողով՝ Պուտինի և Էրդողանի մասնակցությամբ
Անկարայում ԻԻՀ դեսպանը հայտնել է, որ Ռուսաստանի և Թուրքիայի նախագահների մասնակցությամբ Թեհրանում կայանալու է երկու կարևոր գագաթնաժողով:
Անկարայում Իրանի դեսպան Մոհամմադ Ֆարազմանդն իր թվիթերյան միկրոբլոգում գրել է. «Հաջորդ շաբաթ Թեհրանում տեղի կունենան Իրան-Թուրքիա հարաբերությունների գերագույն կոմիտեի և Աստանայի նախաձեռնության ղեկավարների երկու կարևոր գագաթնաժողովները, որոնց մասնակցելու նպատակով Թեհրան կայցելեն Ռուսաստանի և Թուրքիայի նախագահներ Վլադիմիր Պուտինը և Ռեջեբ Թայիփ Էրդողանը»։
Մոհամմադ Ֆարազմանդն իր թվիթերյան միկրոբլոգում հավելել է.«Տարածաշրջանային և միջազգային ճակատագրական զարգացումների ֆոնին Թեհրանը մեկ օրում կհյուրընկալի երկու կարևոր գագաթնաժողով՝ «Իրան-Թուրքիա հարաբերությունների գերագույն կոմիտեի յոթերորդ գագաթնաժողովը» և «Աստանայի նախաձեռնության յոթերորդ գագաթնաժողովը», որոնք երկուսն էլ կայանալու են մի քանի տարվա ընդմիջումից հետո»:
Ֆարազմանդն ընդգծել է.«Թեհրանի վարած դիվանագիտական աշխատանքի բազմազանությունն ու ծավալն ուշագրավ են»:
