Իրաքի Այն ալ-Ասադ ռազմաբազայից ամերիկյան ուժերի դուրսբերման լուրերը հաստատվել են
Իրաքի ԶՈՒ խոսնակը հաստատել է Ալ-Անբար նահանգի Այն ալ-Ասադ բազայից ամերիկյան ուժերի դուրսբերման լուրերը և հայտարարել, որ ԱՄՆ ուժերը մոտ օրերս կազատեն նաև Էրբիլում գտնվող Ալ-Հարիր բազան:
«Սպուտնիկ»-ի փոխանցմամբ, Իրաքի ԶՈՒ խոսնակ Թահսին ալ-Խաֆաջին երկուշաբթի օրը հայտարարել է, որ Այն ալ Ասադ բազայից ամերիկյան զորքերի դուրսբերումն ավարտվել է և այնտեղ ներկա են միայն խորհրդատուները:
Նա հավելել է, որ դեկտեմբերի 31-ին կհայտարարվի Իրաքից ամերիկյան բոլոր զորքերի դուրսբերման մասին։
Թահսին ալ-Խաֆաջին նշել է, որ ամերիկյան խորհրդատվական ուժերը գտնվում են Իրաքի ԶՈՒ վերահսկողության տակ:
Իրաքի խորհրդարանում ընդունված օրենքի համաձայն՝ ամերիկյան զինված ուժերը պետք է այդ երկիրը լքեն մինչև այս տարեվերջ, սակայն Վաշինգտոնը մինչ այժմ օգտագործել է բոլոր միջոցները՝ այդ օրենքի պահանջը կատարելուց խուսափելու և Իրաքում իր ներկայությունը շարունակելու համար:
