Յոթ արևմտյան երկրներ դատապարտել են Իսրայելի՝ նոր բնակավայրերի կառուցման ծրագիրը

Յոթ արևմտյան երկրներ դատապարտել են Հորդանան գետի արևմտյան ափին իսրայելական ռեժիմի կողմից բնակավայրերի կառուցման E1 ծրագրի շրջանակում շինարարական մրցույթի փաստաթղթերի հրապարակման որոշումը՝ ընդգծելով, որ այդ որոշումը միջազգային իրավունքի խախտում է։

Pars Today-ը, հղում անելով Իրանի հեռուստատեսությանը, հաղորդում է, որ Մեծ Բրիտանիան, Ֆրանսիան, Գերմանիան, Իտալիան, Նիդեռլանդները, Կանադան և Նորվեգիան հինգշաբթի օրը համատեղ հայտարարությամբ նշել են, որ  E1 բնակավայրերի կառուցման ծրագրի շրջանակում շինարարական աշխատանքների անցկացման մրցույթի փաստաթղթերը հրապարակելու՝ Իսրայելի ռեժիմի որոշումն անընդունելի է, և Թել Ավիվը պետք է անհապաղ հրաժարվի այդ ծրագրից։

Հայտարարության մեջ նշվում է, որ միջազգային հանրությունը վաղուց դեմ է  բնակավայրերի ընդլայնմանը և իր լուրջ մտահոգությունները բազմիցս արտահայտել է ինչպես հրապարակայնորեն, այնպես էլ փակ դիվանագիտական ուղիներով։

Յոթ արևմտյան երկրները նախազգուշացրել են, որ ծրագրի իրականացումը, Հորդանան գետի արևմտյան ափին բաժանարար գոտի ստեղծելով, կխաթարի պաղեստինյան տարածքների տարածքային ամբողջականությունն ու կապակցվածությունը և կթուլացնի անկախ Պաղեստին պետության ստեղծման հեռանկարները։

Հայտարարության մեջ նշվել է, որ միջազգային իրավունքը հստակ սահմանում է Հորդանան գետի արևմտյան ափին իսրայելական բնակավայրերի անօրինական լինելը, և այս դիրքորոշումը բազմիցս հաստատվել է ՄԱԿ-ի Անվտանգության խորհրդի կողմից։