Երուսաղեմի Լացի պատի մոտ կրոնական ազատագրման ակտիվիսները բողոքի ցույց են կազմակերպել
Հրեականության ոչ ուղղափառ հոսանքների տասնյակ հետեւորդներ հավաքվել են Երուսաղեմի Լացի պատի մոտ՝ պահանջելով հավասար իրավունքներ տալ կանանց եւ տղամարդկանց հրեական գլխավոր սրբավայրի պատի մոտ աղոթելիս, փոխանցում է «ՌԻԱ Նովոստի»-ն:
Լացի պատի մոտ, որտեղ կանոնները թելադրում են ուղղափառ հոսանքի ներկայացուցիչները, կան կանանց եւ տղամարդկանց առանձին աղոթավայրեր, ընդ որում, կանանց արգելված է աղոթքի ժամանակ բարձրաձայն կարդալ Թորայից հատվածներ, ինչպես նաեւ օգտագործել ծիսական «թալիթ» սավանը:
Սոցիալական ցանցերում հայտնված տեսանյութերի կադրերում երեւում է, որ կրոնական ազատագրման կողմնակիցները, հետ մղելով ուղղափառների փորձերը, Լացի պատի մոտ սրբազան տեքստեր են կարդում՝ փաթաթված «թալիթներով»:
«Քաղաքացիական անհնազանդության այս աննախադեպ ակտի պատճառը վարչապետ Բենիամին Նեթանյահուի անկարողությունն է կյանքի կոչել Արեւմտյան պատի մասին համաձայնագիրը, որը 2016-ի հունվարին հաստատել էր կառավարությունը»,- ասված է «Պատի կանանց» շարժման հայտարարության մեջ:
Այդ համաձայնագրով նախատեսվում է Լացի պատի մոտ նոր սեկցիա ստեղծել, որտեղ կանայք եւ տղամարդիկ կարող են միասին աղոթել: Դա, ի տարբերություն նախորդի, պետք է լինի հրեականության լիբերալ ուղղությունների եւ «Պատի կանանց» ակտիվիստների հսկողության տակ:
News.am
