Էրդողան. «Թուրքիան ոչ թե հյուր, այլ տանտեր է Եվրոպայում»

Թուրքիան ոչ թե հյուր, այլ տանտեր է Եվրոպայում: Այս մասին հայտարարել է Թուրքիայի նախագահ Ռեջեփ Թայիփ Էրդողանը նախագահական պալատում նահանգապետերի հետ հանդիպման ժամանակ, հաղորդում է Ermenihaber-ը:

«Եվրոպական երկրներին չի հաջողվի հեռացնել Թուրքիային Եվրոպայից: Թուրքիան պատրաստ է դառնալ ԵՄ-ի լիիրավ անդամ, եթե Եվրամիության ղեկավարությունը դադարեցնի իր երկակի ստանդարտների քաղաքականությունը:  Անկարան հոգնել է ԵՄ-ից պատասխան սպասելուց»,-հավելել է Էրդողանը:

ԵՄ-ի կազմում ընդգրկվելու դիմումը Թուրքիան ներկայացրել է 1987թ-ին, իսկ բանակցություններն այդ հարցի շուրջ սկսվել են 2005թ-ից: Թուրքիայի ու ԵՄ-ի միջև ամենավիճելի հարցերից մեկը միգրացիոն քաղաքականությունն է:

2016թ-ի մարտին  կողմերը ստորագրել են համաձայնություն, որում ամրագրվել են Էգեյան ծովով միգրանտների տարանցումը սահմանափակող կոշտ միջոցներ: Մարտ ամսին կնքված այս համաձայնությունը թուրքական իշխանությունների կողմից  ընկալվում է որպես քայլ առաջ երկրի եվրաինտեգրման գործընթացում:

armedia.am/